Read Hindi, Fiji Heebru 13 Bible Online

Heebru 13 - Hindi, Fiji bible

Heebru 13

¹Ek dusra ke baare meñ Prabhu ke biswaasi ke rakam sochte raho.

²Anjaan log ke ghar meñ hardam welkam karna. Eise kare se, kuchh log aapan ghar meñ bina jaane, ainjals ke pahuna ke rakam welkam karin.

³Prabhu ke log jon jel meñ hei, ulog ke yaad karna aur ulog ke baare meñ sochna. Ulog ke bhi nai bhuulna jon dukh meñ hei, lekin yahi sochna ki ulog meñ se tum ek hei.

⁴Saadi ke aadar karo. Hardam aapan saathi se faitful raho, kaahe ke Parmeshwar u sab ke saja dei jon ke vyohaar achchha nai rahe hei aur jon saadi meñ unfaitful rahe hei.

⁵Peisa se prem nai karo. Wahi se santushṭ raho jon tumhaar lage hei. Prabhu waada karis hei ki u kabhi ham log ke akela nai chhoṛi.

⁶Yahi tumme i bolwaai, “Prabhu hamme madat kare hei! Hamme kaahe ke ḍar hoi u sab ke waaste jon log hamaar sañghe kari?”

⁷Aapan agua log ke nai bhulaana jon tumme Parmeshwar ke sandes dees hei. Yaad rakhna jon rakam ke jindagi ulog bitaain hei aur kosis karna ki wahi rakam ke biswaas tumme bhi hoy.

⁸Yeeshu Maseeh kabhi nai badle hei! U kal, aaj, aur hardam ekke rakam rahi.

⁹Bahut rakam ke strange ṭeeching se beokuuf nai ban jaana. Kuchh rakam ke khaana pe nirbhar hoy se achchha hei ki Parmeshwar ke aaseem daya se sakti leo. Kaahe ke i khaana ulog ke madat nai kare hei jon uske khaay hei.

¹⁰Lekin ham log ke ek bedi hei jahañ ke paadri jon weship ke jagha ke dekh bhaal kare hei, u bhi nai khaay sake hei.

¹¹Baṛa paadri, jab paap ke waaste, jaanwar ke khuun ke balidaan de dewe hei, tab u jaanwar ke boḍi, tambu ke bahire jaraawa jaay hei.

¹²Yeeshu bhi shahar ke faaṭak ke bahire dukh uṭhaais, ki jisse uske khuun, huañ ke log ke pawitr kar dei.

¹³Yahi kaaran ham log ke kemp ke bahire Yeeshu ke lage jaay ke hei aur uske beijjati sahe ke hei.

¹⁴I dharti pe ham log ke u shahar nai hei jon hardam rahi, lekin ham log weisane shahar ke waaste agorta hei.

¹⁵Ham log ke balidaan hei ki ham Yeeshu ke naam se Parmeshwar ke baṛaai karte rahi.

¹⁶Lekin dusra ke madat aur ulog ke sañghe aapan cheej baaṭe ke nai bhulna. I wahi rakam hei jeise tum Parmeshwar ke khusi kare ke waaste balidaan karta hei.

¹⁷Aapan agua log ke baat maano aur wahi karo jon ulog bole hei. Ulog tumhaar uppar aañkhi lagaay rahe hei, aur ulog ke Parmeshwar ke jawaab dewe ke hei. To ulog ke dukhi nai karo jab ulog aapan kaam kare hei. Ulog ke khusi rakkho. Nai to, ulog tumme madat nai kare saki.

¹⁸Ham log ke waaste preya karo. Ham log ke antar aatma safa hei, aur ham log hardam raaiṭ se rahe ke kosis karta hei.

¹⁹Ham khaas kar ke mañgta hei ki tum preya karo ki ham tumme fir se viziṭ kare saki.

²⁰Parmeshwar saanti dewe hei, aur u ham log ke Prabhu Yeeshu Maseeh ke mara meñ se jinda karis. Ab Yeeshu ek mahaan charwaaha ke rakam hei jiske khuun se Parmeshwar ke anant vaacha banaawa gay raha.

²¹Ham binti karta hei ki Parmeshwar tumme taiyaar kari ki tum uske baat maanega aur hardam raaiṭ kaam kare ke hausla rahi. Yeeshu tumme madat kari ki tum wahi karo jon Parmeshwar ke achchha lage. Yeeshu Maseeh ke mahima sada ke waaste rahe! Aameen.

²²Dosto, tum log ke baṛhaawa dewe ke waaste ham khali ek chhoṭa chiṭṭhi likha hei, aur binti karta hei ki tum sab iske dhyaan se sunna ki ham kaa bola hei.

²³Ab tak to tum sab jaan gaya hoyga ki ham log ke dost Ṭimathi jel se bahire aay gais hei. Agar u ṭaaim pe hiañ aay jaai, to ham aapan sañghe uske laayga jab ham hiañ aayga.

²⁴Kirpa kar ke hamaar namaste aapan agua log aur baaki Prabhu ke log ke de dena. Itaalia se uske biswaasi log namaste bheje hei.

²⁵Ham binti karta hei ki Parmeshwar tum sab pe daya kari.