Read Hindi, Fiji Heebru 2 Bible Online

Heebru 2 - Hindi, Fiji bible

Heebru 2

¹Ham log ke sab pe puura dhyaan dewe ke chaahi, jon hamme bataawa gay hei, ki jisse ham log bhaṭak nai jaai.

²Ainjals log jon sandes deen raha, ham log paaya ki u sab sach hei, aur jon sab uske nai maanin, ya kinaare kar deen, ulog ke wahi ke mutaabik saja mila.

³To agar ham i bache waala rasta nai apnaayga, to hamlog keise bache sakta hei? Prabhu apne hee sab se pahile i sab ham log ke bataais raha, aur jon log i sandes sunin raha, paain ki i sab sach hei.

⁴Parmeshwar apne hee sab rakam ke baṛa baṛa chamatkaar aur saain karke dekhaais ki uske sandes sachcha hei. U aapan Pawitr Aatma ke bhi ulog ke dees jon ke u dewe maañgis.

⁵Ham log janta hei ki aage aaywaala sansaar ke Parmeshwar ainjals ke haath meñ nai rakkhis hei.

⁶Kabhi kabhi Baaibal meñ koi Parmeshwar se bole hei, “Manush kaa hei ki tum uske parwaah karta hei? Kaahe ke tum ham kamjor log ke waaste etna chinta karta hei?

⁷Thoṛa ṭaaim ke waaste tum ham log ke ainjals se chhoṭa banaaya raha. Fir bhi tum ham log ke mahima aur ijjat se taaj pahinaaya.

⁸Aur tum sab kuchh ham log ke goṛ ke neeche rakh dia!” Parmeshwar sab kuchh ham log ke adhikaar ke nichche rakh dees hei, aur kuchh bhi nai raha jon ham log ke adhikaar ke nichche nai hei. Lekin ham log abhi i nai dekhe paata ki u sab kuchh ham log ke de dees hei.

⁹Jon cheej ham log dekhta hei, u Yeeshu hei, jon ke thoṛa deri ke waaste ainjals se bhi chhoṭa banaay dewa gay raha. Parmeshwar ke sundar daya ke kaaran, Yeeshu ham sab ke waaste mara. Ab jabki Yeeshu etna jaada sahe ke mar gais hei, u ab mahima aur aadar ke taaj pahin lees hei.

¹⁰Sab kuchh Parmeshwar ke hei, aur sab cheej wahi ke sakti se banaawa gais raha. To Parmeshwar raaiṭ kaam karis jab Yeeshu ke dukh sahe ke baad uske pefekṭ banaay dees, jeise ki Yeeshu bahut se Parmeshwar ke bachchan ke raaiṭ rasta dekhaay ke ulog ke Parmeshwar ke mahima ke sheya kare waala banaais.

¹¹Yeeshu aur u sab log jiske u pawitr karis hei, u sab ekke palwaar ke hei. Yahi kaaran u sab ke u bhaai bahin bolaay meñ saram nai kare hei.

¹²U Parmeshwar se i bhi bolis, “Ham ulog ke tumhaar naam bataayga aur tumhaar gun gaayga jab ulog weship kare aai.”

¹³U i bhi bolis raha, “Ham Parmeshwar pe puura bharosa karega.” Tab u bolis, “Hiañ ham u laṛkan ke sañghe hei jon log ke Parmeshwar hamme dees hei.”

¹⁴Ham log maas aur khuun ke bana hei. Yahi khaatir Yeeshu ham log meñ se ek banis. U maris ki jisse u saitaan ke naas kar dei, jiske sakti maut pe raha.

¹⁵Lekin u i kaaran bhi mara ki ham sab log ke bhi bachaay jon sab roj roj mare ke ḍar se jiye hei.

¹⁶I klia hei ke Yeeshu ainjals ke madat kare nai aais raha, lekin Abraham ke gharaana ke sambhaale aais raha.

¹⁷Uske ham log meñ se ek bane ke raha, ki jisse u ham log ke Parmeshwar ke ek dayaalu aur biswaasi baṛa paadri ke rakam sewa kare saki aur ham log ke paap ke maafi ke waaste balidaan dewe saki.

¹⁸Aur ab jab ki Yeeshu dukh sahis hei aur ṭesṭ bhi dees hei, u koi ke bhi madat kare sake hei jon ke ṭesṭ hoy hei.