Read Hindi, Fiji Heebru 3 Bible Online

Heebru 3 - Hindi, Fiji bible

Heebru 3

¹Dosto, Parmeshwar tumme chunis hei ki tum uske pawitr jan bano. To Yeeshu ke baare meñ socho, jiske ham log prerit aur baṛa paadri bolta hei!

²Yeeshu, Parmeshwar pe bharosa karis raha, wahi rakam jeise Maozas sab ke sewa kare meñ bharosa paais raha.

³Lekin Maozas se jaada maan Yeeshu ke hoy ke chaahi, jeise jon ghar banaay hei uske maan ghar se jaada hoy hei.

⁴Kaahe ke, ek ek ghar ke koi banaay hei, aur Parmeshwar hei jon sab kuchh banaais hei.

⁵Maozas ek biswaasi sewak raha aur Parmeshwar ke log ke bataais ki aage chal ke kon cheej bataawa jaai.

⁶Lekin Yeeshu hee u Putr hei jon Parmeshwar ke log ke jimmewaar hei. Aur ham log u sab hei, agar ham log majbuut bana rahi aur niraas nai hoi.

⁷I wahi rakam hei jeise Pawitr Aatma bole hei, “Agar tum Parmeshwar ke awaaj aaj sunega,

⁸to jiddi nai banna! Ulog ke rakam ribel nai karna jon ke ḍezaṭ meñ ṭesṭ lewa gais raha.

⁹Chaalis (40) saal tak tum log ke baap-daada log Parmeshwar ke ṭesṭ leen aur jon kaam u karis raha u sab ke dekhin.

¹⁰“Tab Parmeshwar, ulog se thak gais aur bolis, ‘Tum log kabhi bhi achchha samajh nai dekhaaya hei, aur tum log nai samjha ki ham tum log ke kaa kare ke mañgta hei.’

¹¹Parmeshwar gussaay gais aur sab log ke bataais, ‘Tum log kabhi bhi hamaar araam kare waala jagha nai aay paayga!”

¹²Dosto, saaodhaan raho! Bura bichaar aur ḍaauṭ ke tum sab ke jeewit Parmeshwar se duur nai karan deo.

¹³Tum log har roj ek dusra ke himmat deo, jab tak “Aaj” ke din hei. Agar i nai karega, tab paap tum meñ se kuchh log ke bahkaay dei, aur tum log ke jiddi banaay dei.

¹⁴Ham log Krisṭ ke baare meñ shua raha, jab ham sab se pahile uske bhaya. To ham log ke aakhri tak aapan biswaas ke kas ke pakṛe rahe ke hei.

¹⁵Baaibal bole hei, “Agar tum uske awaaj aaj sunega, ulog ke rakam jid nai karna jon sab ribel kare rahin.”

¹⁶Ulog kon raha, jon Parmeshwar ke awaaj sun ke gussa bhain aur uske agaiñsṭ hoy gain? Kaa wahi log nai rahin jon Ijipt se nikar ke Maozas ke sañghe aain raha?

¹⁷U kon log rahin jon chaalis (40) saal pahile Parmeshwar ke gussa karin raha? Kaa ulog nai rahin jon paap karin raha aur ḍezaṭ meñ mar gain raha?

¹⁸Aur kon se Parmeshwar bolis raha ki ulog uske araam kare waala jagha nai aai? Kaa wahi log nai raha jon uske baat nai maanin raha?

¹⁹Ham log dekhta hei ki ulog araam kare waala jagha nai gain kaahe ke u log ke lage biswaas nai raha.