Read Hindi, Fiji Heebru 4 Bible Online

Heebru 4 - Hindi, Fiji bible

Heebru 4

¹Araam karewaala jagha jaay ke waada abhi bhi hei, aur ham log ke i dekhe ke hei ki tum meñ se koi chhuuṭ nai jaay.

²Ham log sandes suna hei, jeise ulog sunin raha. Lekin ulog biswaas nai karin, aur u sandes ulog ke waaste koi matlab nai rakkhis.

³Khali wahi log jiske biswaas hei, araam waala jagha jaay saki. I wahi rakam hei jeise Baaibal bole hei, “Parmeshwar gussaay gais raha aur log ke bataais, ‘Tum log hamaar araam kare waala jagha meñ kabhi nai aay sakega!” I Parmeshwar bolis raha, jab ki sansaar ke suru hoy se pahile se i sab taiyaar raha.

⁴Hiañ tak ki, Baaibal meñ kahiñ bataawe hei ki satwa roj, Parmeshwar aapan sab kaam khalaas kar lees raha, aur u araam karis.

⁵Ham log i bhi paṛha ki baad meñ u bolis raha, “Tum log koi bhi hamaar araam kare waala ghar meñ nai aayga!”

⁶Iske matlab i hei ki u waada abhi bhi laagu hei, kaahe ke jon sab uske pahile sunis raha, uske baat nai maanis raha aur ulog araam waala jagha nai aain raha.

⁷Bahut din baad Parmeshwar, Ḍeiviḍ ke bataais ki u waada fir se karo, jeise ki ham pahile bola raha, “Agar tum i awaaj aaj suno, to jiddi nai bano!”

⁸Agar Joshua sachmuch meñ log ke araam deta, to Parmeshwar ke waaste i jaruurat nai hota ki dusra araam ke roj ke waaste charcha kare.

⁹Lekin Parmeshwar ham log ke waaste sabat ke waada karis hei jab ham log ke araam kare ke hei, jab ki u abhi aais nai hei.

¹⁰U roj Parmeshwar ke log aapan kaam se araam kari, jeise Parmeshwar aapan kaam se araam lees raha.

¹¹Ham log ke puura kosis kare ke hei ki araam ke jagha jaai, kahiñ eise naa hoy ki ham uske baat nai maan ke huañ pe aapan jagha khoy dei, jeise ulog khoy deen raha.

¹²Jon Parmeshwar bolis raha, u khali jeewit aur activ nai hei! U dui dhaari talwaar se bhi chok hei. Uske vachan praan aur aatma aur joints aur merrow sab ke kaaṭ dewe sake hei, jab tak u ham log ke dil bichaar aur chaahat ke nai jaan lewe hei.

¹³Parmeshwar se kuchh bhi nai chhupa hei! Sab cheej ke beech se dekh lewe hei, aur ham log ke usse sach bole ke hei.

¹⁴Ham log ke ek baṛa paadri hei, jon swarag chala gais hei, aur u Parmeshwar ke Putr Yeeshu hei. Yahi kaaran ham log ke u sab ke kas ke pakṛe ke hei jon ham log uske baare meñ bola hei.

¹⁵Yeeshu ham log ke ek ek kamjori ke samjhe hei, kaahe ke u bhi ham log ke rakam ṭesṭ meñ paṛis raha. Lekin u paap nai karis raha!

¹⁶To jab bhi kabhi ham jaruurat meñ rahta hei, tab ham log ke himmat se dayaalu Parmeshwar ke siñghaasan ke aage aay ke hei. Huañ pe ham log bahut jaada daya paayga, aur ham log ke madat bhi mili.