Read Hindi, Fiji Heebru 7 Bible Online

Heebru 7 - Hindi, Fiji bible

Heebru 7

¹Malikisidak, Shalom ke raaja aur Mahaan Parmeshwar ke paadri duuno raha. Wahi raha jon jaay ke Abraham ke aasheesh dees raha, jab Abraham raaja log ke maar ke lauṭis raha.

²Tab Abraham aapan sab kuchh meñ se daswa hissa uske de dees raha. Malikisidak naam ke matlab hei, “Nyaay ke Raaja” Lekin jab ki Shalom ke matlab hei “Shaanti,” tab u bhi, “Shaanti ke Raaja bhais.”

³Hamlog ke i nai bataawa gais raha ki uske lage maañ baap ya baap-daada, ya suruwaat ya ant hei. U Parmeshwar ke Putr ke rakam hei aur hardam paadri rahi.

⁴Dekho Malikisidak ketna mahaan hei! Ham log ke naami ensesṭa Abraham, daswa hissa jon dusman se lees raha, uske dees raha.

⁵Kaanuun sikhaay hei ki Abraham ke ḍisenḍañṭs ke jaruur se aapan kamaai meñ se daswa hissa dewe ke hei. Aur i ulog ke aapan palwaar log ke dewe ke hei, jon Levi ke santaan hei aur jon paadri hei.

⁶Jabki Malikisidak, Levi ke ḍisenḍañṭ nai raha, fir bhi Abraham aapan meñ se uske daswa hissa dees raha. Tab Malikisidak Abraham ke aasheesh dees, jon ke Parmeshwar waada karis raha.

⁷Sab koi samjhe hei ki jon koi bhi aasheesh dewe hei, u aasheesh paay waala se baṛa hei.

⁸Paadri log ke aapan kamaai meñ se daswa hissa dewa jaay hei. Lekin sab paadri log mar jaay hei, Malikisidak ke chhoṛ ke, aur Baaibal bataay hei ki u jinda hei.

⁹Levi ke santaan hei jon ke log se daswa hissa mile hei. Ham log i bole sakta hei ki jab Abraham, Milikisidak ke daswa hissa dees raha, Levi bhi daswa hissa dees raha.

¹⁰Iske kaaran i raha ki Levi ke janam Abraham ke palwaar meñ baad meñ bhais raha, jon daswa hissa Malikisidak ke dees raha.

¹¹Jab ki Maozas ke kaanuun bataawe hei ki sab paadri log ke Levi ke santaan hoy ke chaahi, fir bhi u paadri log koi ke pefekṭ nai banaay sake hei. To Malikisidak ke rakam paadri hoy ke chaahi, Eran ke reeti ke rakam palwaar nai.

¹²Aur jab paadri chune ke ruuls badal jaay hei, tab kaanuun ke bhi badle ke jaruuri hei.

¹³Jon admi ke baat ham log karta hei, u ham log ke Prabhu hei, jon u ṭraaib se aais raha jisman koi bhi bedi pe paadri ke kaam nai karis raha.

¹⁴Sab koi jaane hei ki u Juḍa ṭraaib se aais raha, aur Maozas i to nai bolis raha ki paadri log wahi ṭraaib se aai.

¹⁵I sab samajh meñ aai, jab Malikisidak ke rakam koi ke paadri banaawa jaai.

¹⁶Iske, aapan baap-daada ke kaaran nai chuna gais raha, lekin i kaaran ki uske jeewan ke kabhi bhi ant nai hoi.

¹⁷Iske baare meñ Baaibal bole hei, “Tum hardam ke khaatir paadri rahega, ṭheek Malikisidak ke rakam.”

¹⁸Yahi rakam ek kamjor aur bekaar aagya ke bagal kar dia gais raha,

¹⁹kaahe ke kaanuun koi ke pefekṭ nai banaay sake hei. Wahi ṭaaim, ham log ke ek aur achchha aasha mile hei, aur wahi aasha ham log ke Parmeshwar ke nagichche laay sake hei.

²⁰Parmeshwar apne khud waada karis raha jab i paadri ke chuna gais raha. Lekin jab dusra paadri log chuna gais raha to u i rakam ke waada nai karis raha. U i waada karis raha, “Ham, tum log ke Prabhu, waada karta hei ki tum hardam ke khaatir paadri bana rahega! Aur ham kabhi bhi aapan maainḍ nai badlega!”

²²Iske matlab i hoy hei ki Yeeshu ham log ke Parmeshwar se aur achchha agrimenṭ ke garanṭee kare hei.

²³Bahut se aur paadri log rahin, aur u sab mar gain hei.

²⁴Lekin Yeeshu kabhi nai mari, aur u hardam ke waaste paadri rahi!

²⁵U hardam ulog ke bachaay saki jon log ke u Parmeshwar ke bagal le jaay hei, kaahe ke u hardam Parmeshwar se ulog ke khaatir baat kare ke waaste jinda rahi.

²⁶Yeeshu hee u baṛa paadri hei jon ke jaruurat ham log ke hei. U pawitr aur seedha saada aur nirdos hei, ham paapi log ke rakam nai. Swarag meñ Yeeshu ke sab se uupar ke darja mile hei,

²⁷aur u sab baṛa paadri log se achchha hei. Yeeshu ke aapan aur fir baaki log ke paap ke waaste har roj balidaan nai dewe ke hei. U ekke roj u balidaan dees, jab u apne aap ke bali chaṛhaay dees.

²⁸Kaanuun ulog ke paadri chun lewe hei jon ke lage kuchh kamjori hoy hei. Lekin Parmeshwar ke waada, jon kaanuun ke baad meñ aais hei, aapan Putr ke appoinṭ karis. Aur wahi pefekṭ aur har dam ke waaste mahaan paadri hei.