Read Hindi, Fiji Jeims 3 Bible Online

Jeims 3 - Hindi, Fiji bible

Jeims 3

¹Hamaar dost log, ham sab log ke ṭeecha bane ke kosis nai kare ke chaahi. I to ham janta hei ki, ṭeecha log ke aur log se jaada ṭesṭ kara jaai.

²Ham log sab bahut ulṭa kaam karta hei. Lekin agar tum aapan jeebh sambhaal ke rakkhega, yahi meñ tumhaar baṛappan hei aur tum puura deñhi pe kaabu kare sakega.

³Ghoṛa ke muh meñ lagaam lagaay ke ham uske koi bagal bhi ghumaay sakta hei.

⁴Ek baṛa jahaaj ke aage chalaay ke waaste bahut tej hawa ke jaruuri hei, lekin kepṭan ek chhoṭa se raḍar ke dwaara uske koi bagal bhi ghumaay de hei.

⁵Ham log ke jeebh bhi chhoṭa hei, aur fir bhi u baṛa baṛa baat banaay le hei. Ek chhoṭa se añgaar jañgal meñ aagi lagaay sake hei.

⁶Jeebh ek añgaar ke rakam hei. I ek dushṭ shakti hei jon puura deñhi ke meila kar de hei aur manush ke puura jeewan meñ, u flaim jon narak se aay hei usse aagi lagaay de hei.

⁷Sab rakam ke jaanwar, chiṛia, reñge waala jaanwar (reptiles), aur samundar ke jantu ke bas meñ kara jaay sake hei aur bas meñ bhi kara gais hei.

⁸Lekin ham log ke jeebh ham log ke kaabu meñ nai rahe hei. Isman eisan buraai hei jon kabhi shaant nai rahe hei aur naas kare waala jahar se bhara rahe hei.

⁹Pyaara dost log, aapan jeebh se ham baṛaai aur saraap duuno bolta hei. Ham log aapan Prabhu aur Pita ke baṛaai karta hei, aur u sab manush jon Parmeshwar ke rakam banaawa gay hei, uske saraap deta hei, i achchha nai hei.

¹¹Kaa ek sota meñ se meeṭha aur khaara paani ek sañghe nikri?

¹²Kaa anjeer (fig) ke peṛ se jaituun (oliv) fari? Kaa meeṭha paani khaara paani waala kuaañ se nikri?

¹³Kaa tum meñ se koi samajhdaar aur akkil waala hei? Tab aapan achchha chaal chalan aur naram swabhaao aur sab kaam kar ke dekhaao.

¹⁴Lekin agar tumhaar dil jaran aur selfishnes se bhara hei, to sach ke chhupaay ke waaste baṛa baṛa baat ya jhuuṭ nai bolo.

¹⁵U rakam ke akkil swarag se nai aay hei. I to dunia ke hei aur selfish hei aur khud saitaan se aay hei.

¹⁶Jab bhi log jaran kare hei ya selfish hoy hei, ulog museebat khaṛa kar de hei aur sab rakam ke kruel cheej kare hei.

¹⁷Lekin jon akkil uppar se aay hei u hamme pawitr, milansaar, naram, sensibal, dayaalu, madat karewaala, jenwin aur sinsia banaay hei.

¹⁸Jab saanti karaay waala saanti ke bia bowe hei, ulog nyaay kaaṭi.