Read Hindi, Fiji Jeims 4 Bible Online

Jeims 4 - Hindi, Fiji bible

Jeims 4

¹Tum kaahe ke ek dusra se laṛta aur jhagaṛta hei? Kaa i to nai ki tumhaar aapan selfish chaahat hei jon jhagaṛ ke deñhi ke kaabu meñ kare maañge hei?

²Tum kuchh mañgta hei jon tumhaar lage nai hei, aur tum kuchh bhi karega ki u tumme mil jaay. Hiañ tak ki tum hatya bhi karega! Lekin fir bhi tumme u nai mili jon tumme chaahi, aur tum laṛ jhagaṛ ke bhi uske nai paayga. Tumme uske waaste preya kare ke paṛi.

³Tum preya kar ke bhi mañgta hei lekin tumme u nai mile hei kaahe ke tumhaar neeyat achchha nai rahe hei.

⁴Tum log Parmeshwar se faitful nai hei! Kaa tum nai janta ki agar tum dunia se prem karta hei, to Parmeshwar ke dusman hei? Aur agar tum maana ki dunia ke dost rahega, to tum apne aap ke Parmeshwar ke dusman banaayga.

⁵Kabhi nai sochna ki Baaibal meñ kuchh jhuuṭ hei jab usman likhaan hei, “Parmeshwar jon Aatma hamaar bhittar rakkhis hei, uske u bahut parwaah kare hei?”

⁶Asal meñ Parmeshwar ham log ke bahut daya se dekh bhaal kare hei, jeise Baaibal bole hei. “Parmeshwar ghamanḍi log ke nai maañge hei, lekin jon naram swabhaao ke rahe hei uspe daya kare hei.”

⁷Parmeshwar ke aage sarranḍa hoy jaao! Saitaan ke saamna karo, aur u tumhaar lage se bhaag jaai.

⁸Tum paapi log, Parmeshwar ke nagichche aao, aur u tumlog ke nagichche aai. Tum log jon ḍisaaiḍ nai kare paata hei, aapan dil ke safa karo.

⁹Udaas raho aur bilaap karo aur ro. Hasi band karo aur rowe ke suru karo. Khusi hoy ke badle shok manaao.

¹⁰Prabhu ke aage naram se pesh aao, aur u tumhaar aadar kari.

¹¹Hamaar dost log, dusra ke baare meñ kaṛa baat nai bolo! Agar eise karega, ya dusra ke neecha dekhaayga, tab tum Parmeshwar ke kaanuun ke neecha dekhaata hei. Aur agar tum kaanuun ke neecha dekhaayga, tab tum apne aap ke kaanuun se uppar rakkhega, aur uske nai maanega

¹²aur Parmeshwar ke bhi nai jon kaanuun dees hei. Parmeshwar ham log ke nyaay de hei, aur u ham log ke bachaay bhi sake hei aur naas bhi kare sake hei. Tum log ke kaa hak hei ki koi ke neecha dekhaao?

¹³Tumme achchha se jaane ke chaahi ki eise nai bole ke hei, “Aaj ya kal ham log shahar jaayga. Ham log huañ ek saal ke waaste biznes karega aur bahut ḍher peisa kamaayga!”

¹⁴Kal ke baare meñ tum kaa janta hei? Keise tum aapan laaif ke khaatir etna shua hei? U to bhaaf ke rakam hei, jon thoṛa deri dekhaai aur fir chala jaai.

¹⁵Tumme i bole ke hei, “Agar Prabhu hamme jiye ke dei, to ham log i sab kaam karega.”

¹⁶Fir bhi tum beokuuf ke rakam sekhi karta hei, aur etna ghamanḍ kare ke bhi raaiṭ nai hei.

¹⁷Agar tum u nai kara jon tum janta hei ki raaiṭ hei, tab tum paap kara hei.