Read Hindi, Fiji Jeims 5 Bible Online

Jeims 5 - Hindi, Fiji bible

Jeims 5

¹Tum dhani log ke rowe ke aur bilaap kare ke hei! Tum log ke waaste bahut kharaab hoi.

²Tum log ke dhan saṛ gais hei, aur kirwa tum log ke kapṛa ke khaay lees hei.

³Tum log ke peisa meñ murcha lag gais hei, aur yahi murcha tum log ke agaiñsṭ gawaahi rahi, jab u tum log ke deñhi aagi ke rakam jaraay hei. Fir bhi tum log yahi aakhri ṭaaim meñ aapan dhan bachaay ke rakhta hei

⁴Tum u mazduur log ke talab nai dia jon tumhaar khet meñ kaam karin raha, aur ab u talab ke karja tumhaar agaiñsṭ awaaj uṭhaay hei. Maha shakti waala Prabhu abhi tak u majduur log jon tumhaar khet meñ kaam karin raha, ulog ke rowaai sun lees hoi.

⁵Abhi hiañ dharti pe, tum khali aapan peṭ bhare ke aur achchha ṭaaim ke baare meñ socha. Lekin ab tum moṭa taaja beil ke rakam hoy gaya hei, jiske maare ke ṭaaim aay gais hei.

⁶Tum bhola bhaala log ke, jon apne aap ke bachaay nai sake, ulog ke neecha dekhaaya aur maar ḍaala.

⁷Hamaar dost log, Prabhu ke lauṭe tak dheeraj rakkho. U kisaan ke socho, jon waiṭ kare ki kab pahila aur aakhri paani barsi, ki jisse ulog ke fasal taiyaar hoy jaai.

⁸U kisaan log ke rakam dheeraj rakkho aur haar nai maano. Prabhu jaldi lauṭ aai!

⁹Ek dusra ke agaiñsṭ nai bhunbhunaao nai to tumhaar nyaay kara jaai, aur jaj ṭheek duaari ke bahire hei.

¹⁰Hamaar dost log, u nabi log jon Prabhu se baat karin raha, ulog ke rakam karo. Jab ki ulog ke sahe ke paṛa, ulog ke lage dheeraj raha.

¹¹Asal meñ, jon sab se jaada sahe hei, uske ham baṛaai karta hei. Tumme yaad hei Job ke dheeraj ke, aur keise Prabhu aakhiri meñ uske madat karis raha. Prabhu i waaste karis raha ki u dayaalu aur mesiful hei.

¹²Hamaar dost log, sab se khaas i baat hei ki, kasam nai khaana. Tum swarag ke ya dharti ke ya aur koi ke kabhi kasam nai khaana. Khaali “Haañ” ya “Naa” bole ke hei. Agar tum isse jaada bolega tumme saja mili.

¹³Agar tum museebat meñ hei, tab tumme preya kare ke chaahi. Aur agar tum khush hei to, to tumme baṛaai ke bhajan gaay ke hei.

¹⁴Agar tum bimaar hei, chech ke agua log ke bulaao. U log se bolo ki tel mal ke Prabhu ke naam se tumhaar waaste preya kare.

¹⁵Agar tumme biswaas hei jab tum koi bimaar log ke waaste preya karta hei, tab ulog ṭheek hoy jaai. Prabhu ulog ke changa kar dei, aur agar ulog paap karis hei, tab Prabhu ulog ke maaf kar dei.

¹⁶Agar tum paap kara hei, tab tum ek dusra ke bataao ki tum kaa kara hei. Tab tum ek dusra ke waaste preya kare sakta hei aur changa bhi hoy sakta hei. Ek bhola bhaala jan ke preya bahut shakti waala hoy hei, aur u bahut madat kare sake hei.

¹⁷Ilaayja bhi ham log ke rakam admi raha, aur teen aur aadha saal tak uske preya paani barse se rokis.

¹⁸Lekin jab u paani ke waaste preya karis, tab paani barsis aur anaaj jamis.

¹⁹Hamaar dost log, agar koi biswaasi sachchaai se bhaṭak gais hei, tumme chaahi ki ulog ke fir se lauṭaay laao.

²⁰Agar tum paapi log ke bhaṭke se rok lega, tum ulog ke mare se bachaay lega, aur ulog ke bahut se paap maafi hoy jaai.