Read Hindi, Fiji 1 Peeṭa 1 Bible Online

1 Peeṭa 1 - Hindi, Fiji bible

1 Peeṭa 1

¹Pol ke bagal se jon Yeeshu Maseeh ke prerit hei. Parmeshwar ke u sab log ke khaatir jon pardesi ke rakam Pontus, Galeshia, Kappduukia, Eshia, aur Bithunia meñ idhar udhar hei.

²Parmeshwar Pita i disaaiḍ karis ki tum log ke aapan log ke rakam chuni, aur uske Aatma tum log ke pawitr kar dees hei. Tum Yeeshu Maseeh ke baat maana aur uske khuun tumhaar uppar chhiṛkaan hei. Ham preya karta hei ki Parmeshwar tum pe daya kari aur hardam tumme saanti dete rahi!

³Parmeshwar, Prabhu Yeeshu Maseeh ke Pita ke jay hoy. Parmeshwar bahut achchha hei, aur Yeeshu ke jinda kar ke, u ham log ke nawa laaif aur ek aasha jon hardam rahi, dees hei.

⁴Parmeshwar tum sab ke waaste swarag meñ kuchh bachaay ke rakkhis hei, jahañ pe u sab kabhi saṛi nai aur kharaab bhi nai hoi ya to heraai.

⁵Tumme Parmeshwar pe biswaas hei, jiske sakti tumme aakhri dam tak bachaay rakkhi. Jab Parmeshwar sab ke nyaay kari, tab u tumme bachaay rakkhi, jeise u hardam plen karis raha.

⁶U roj tum khusi hoyga, bhale hee kuchh ṭaaim ke waaste tum bahut se dukh uṭhaayga.

⁷Tumhaar biswaas u sona ke rakam rahi jon aagi meñ parkha gais hei. Aur i sab dukh i saabit kari ki tumhaar biswaas u sona se kahiñ jaada keemti hei jon naas hoy sake hei. I sab i dekhaai ki tumme aadar aur mahima mili jab Maseeh lauṭi.

⁸Tum Yeeshu ke kabhi nai dekha, aur abhi bhi nai dekhta hei. Lekin tum abhi bhi usse prem karta hei aur uspe tumhaar biswaas hei, aur tum nai bataay sakta hei ki tum ketna khusi hei

⁹ki tumme bache ke hei. Yahi khaatir tum meñ biswaas hei.

¹⁰Kuchh nabi bataain raha ki Parmeshwar tum pe ketna daya rakkhe sake hei, aur ulog bahut kosis karke aur jaada rasta khojin ki keise tum bache sakta hei.

¹¹Yeeshu ke Aatma ulog meñ raha aur bataat raha ki keise Maseeh dukh uṭhaai aur uske bahut baṛa mahima mili. To ulog khojin ki kon raaiṭ ṭaaim Krisṭ rahi jab i sab hoi.

¹²Lekin ulog ke bataawa gay hei ki ulog tumhaar sewa kare hei apne aap ke nai. Pawitr Aatma ke sakti se jon swarag se bheja gais raha, ulog usse tumme parchaar karin. Aur uske sandes khali tumhaar khaatir raha, jab ki ainjals log uske baare meñ aur jaane maañgi.

¹³Saaodhaan raho aur seedha socho. Aapan puura aasha Parmeshwar meñ rakkho, ki jab Yeeshu Maseeh lauṭi to u tum log pe ketna daya rakkhi.

¹⁴Aagya maane waala laṛkan ke rakam aapan chaal chalan rakkho. Aapan jeewan ke weise chaahat ke kaabu meñ nai chhoṛo, jeise u pahile se raha.

¹⁵Hardam Parmeshwar ke pawitr log ke rakam raho, kaahe ke Parmeshwar hee tumme chunis, aur u pawitr hei.

¹⁶Yahi kaaran Baaibal bole hei, “Ham pawitr Parmeshwar hei, aur tumme bhi pawitr rahe ke hei.”

¹⁷Tum bolta hei ki Parmeshwar tumhaar Pita hei, lekin Parmeshwar koi ke pach nai le hei! U sab ke wahi rakam nyaay kare hei, jeisan kaam ulog karin hei. To tum jab tak i dharti pe anjaan admi ke rakam rahta hei, tab tak Parmeshwar ke aadar karo.

¹⁸Tumhaar bekaar jeewan jon tum aapan baap daada se seekha raha usse tumme bachaawa gais raha. Lekin tum janta hei ki tumhaar chhuṭkaara u sab cheej jon kharaab hoy jaay hei jeise ki sona aur chaañdi se nai hei.

¹⁹Krisṭ, jon bina daag ke aur bhola bhaala memna (lamb) hei, tum uske keemti khuun se bachaawa gaya hei.

²⁰Krisṭ ke to dunia bane se pahile se chuna gay raha, lekin tumhaar khaatir, u yahi aakhri ṭaaim pe aais.

²¹Aur jab u aais, tab u tumme Parmeshwar, jon uske jinda karis aur mahaan rakam se aadar karis, uske biswaas meñ aguaai kare ke waaste aais. Yahi kaaran tum aapan aasha aur biswaas Parmeshwar meñ rakkha hei.

²²Tum sachchaai ke maana, aur tum log ke dil safa kara gais. Aur ab tum log ek dusra se gahira prem karta hei. Lekin tum, sab ke dil se prem karte rahna.

²³I sab karo kaahe ke Parmeshwar tumme aapan sandes jon hardam rahi usse nawa jeewan dees hei.

²⁴Baaibal bole hei, “Manush graas ke rakam sukhaay jaay hei, aur ulog ke mahima, jañgli fuul ke rakam maddhim paṛ jaay hei. Graas jhuraay jaay hei, aur fuul jameen pe gir jaay hei.

²⁵Lekin Prabhu jon cheej bolis hei u hardam ke waaste rahi.” Ham log ke susamaachaar tumhaar waaste wahi hei jon Prabhu bolis hei.