Read Hindi, Fiji 1 Peeṭa 2 Bible Online

1 Peeṭa 2 - Hindi, Fiji bible

1 Peeṭa 2

¹Chhal kapaṭ nai karo! Koi ke beokuuf nai banaao, aur sachcha bane ke suru karo. Koi ke baare meñ kaṛa baat nai bolo aur jaran nai karo.

²Jeise ek niubon bachcha, sudh (pure) duudh piye hei, weisaiyeñ aatmik duudh ke madat se tum baṛho aur bacho.

³Tum apne dekh lia hei ki Prabhu ketna achchha hei.

⁴Yeeshu Maseeh ke lage aao. U jeewit patthar hei jis ke log ṭhukraay dees hei, lekin uske Parmeshwar chunis hei aur baṛa sammaan dees hei.

⁵Aur ab tum log jinda patthar hei, jon ke Aatmik ghar banaay meñ kaam meñ laawa jaay hei. Tum pawitr paadri log ke ek jhunḍ hei, aur Yeeshu Maseeh ke madat se tum u balidaan chaṛhaao ki Parmeshwar khusi hoy jaay.

⁶I wahi rakam hei jeise Parmeshwar Baaibal meñ bole hei, “Dekho! Ham Zion meñ ek chuna gay keemti patthar kona meñ rakhta hei. Aur jon us pe biswaas kare hei u kabhi niraas nai hoi.”

⁷Tum Prabhu ke biswaasi hei, aur u patthar tumhaar waaste bahut keemti hei. Lekin ulog ke waaste u keemti nai hei jon usman biswaas nai kare hei. Ulog to u kaapenṭa hei, jon u patthar jon sab se keemti hei, uske bahaay deen raha.

⁸Ulog sandes ke nai maanin aur dhakka khaay ke wahi patthar pe gir paṛin, kaahe ke ulog ke kharaab din aay gay raha.

⁹Lekin tum log Parmeshwar ke khaas chuna gay log meñ se hei. Tum log Raaja log ke paadri aur pawitr raaj ke ek jhunḍ hei. Parmeshwar tum log ke añdhera se nikaar ke aapan sundar roshni meñ laais hei. Ab tum log u sab sundar sundar cheej ke baare meñ bataayga jon u tumhaar sañghe karis hei. Baaibal bole hei,

¹⁰“Ek ṭaaim tum kuchh nai raha. Ab tum sab Parmeshwar ke log hei. Ek ṭaaim koi bhi tum pe daya nai karat raha. Ab Parmeshwar tumme daya se dekhe hei.

¹¹Dosto, tum log i dharti pe pardesi aur anjaan log hei. Ham binti karta hei ki tum log aapan u chaahat jon tum sab ke agaiñsṭ laṛe hei, u sab ke chhoṛ deo.

¹²Hardam dusra ke i dekhe deo ki tumhaar achchha chaal chalan hei, chaahe u log tumme abhi bhi kharaab kaam kare ke khaatir badnaam kare hei. Tab nyaay ke roj, ulog tumhaar achchha kaam ke baare meñ bataay ke, Parmeshwar ke mahima kari.

¹³Prabhu maañge hei ki tum sab manush ke adhikaar ke maano, khaas karke u Maharaaja ke, jon sab ke uppar raaj kare hei.

¹⁴Tum bhi gavna log ke baat maano, kaahe ke ulog ke raaja bheje hei ki jon koi bhi kharaab kaam meñ pakṛa jaay uske saja de, aur jon achchha kaam kare hei, uske baṛaai kare.

¹⁵Parmeshwar chaahe hei ki tum raaiṭ kaam kar ke beokuuf aur naasamajh log ke muh band karaay deo.

¹⁶Tum ajaad hei, fir bhi tum Parmeshwar ke sewak hei, aur tum aapan aajaadi leke kharaab kaam kare ke bahaana nai banaao.

¹⁷Sab ke aadar karo aur Parmeshwar ke log ke khaas prem dekhaao. Parmeshwar ke aadar karo aur raaja ke aadar karo.

¹⁸Naukar, tum log aapan maalik ke baat maano aur hardam ulog ke aadar karo. I sab tum khali dayaalu aur soch bichaar kare waala ke waaste nai karo, lekin ulog ke waaste bhi karo jon bahut kharaab hei.

¹⁹Parmeshwar tumme aasheesh dei, u ṭaaim bhi jab dusra log tumme dukh dei kaahe ke tum Parmeshwar ke maanta hei.

²⁰Tum kuchh nai paayga jab tumme saja mili kaahe ke tum kuchh kharaab kaam kara hei. Lekin Parmeshwar tumme aasheesh dei, agar tumme kuchh achchha kare pe bhi saja mili.

²¹Tum to yahi kaaran chuna gaya hei ki Krisṭ, jon tumhaar waaste dukh uṭhaay ke ek ekzaampal ban gais hei, uske pichchhe chal ke dukh uṭhaao.

²²Maseeh paap nai karis raha ya kabhi jhuuṭ bolis raha.

²³Uske sataawa gay, fir bhi u kabhi nai badla lees. Jab u dukh uṭhaais, u koi ke dhamki nai dees. Uske badle, uske Parmeshwar meñ biswaas raha, jon ṭheek se nyaay kare hei.

²⁴Krisṭ ham log ke paap ke bojha uṭhaais. Uske kros pe chaṛhaawa gay, ki jisse ham log paap nai kari aur seedha rasta pe rahi. Uske choṭ se tum sab changa bhaya hei.

²⁵Tum bheṛa log ke rakam bhaṭak gay raha. Ab tum sab lauṭ aaya hei u ek ke lage jon tumhaar charwaaha hei aur tumme bachaay waala hei.