Read Hindi, Fiji 1 Peeṭa 3 Bible Online

1 Peeṭa 3 - Hindi, Fiji bible

1 Peeṭa 3

¹Agar tum patni hei, tab tum aapan pati ke aage rakkho. Agar tumhaar pati vachan ke agaiñsṭ jaay hei, to tum aapan chaal chalan se uske jeet lega. Koi aur ke usse kuchh aur bole ke nai rahi,

²kaahe ke u dekhi ki keise tum Parmeshwar ke aadar karta hei aur ek pawitr laaif bitaata hei.

³Dekhaaoṭi siñgaar jeise ki fensi baar aur sona ke gahna ya keemti kapṛa jon tumme sundar banaay uspe bharosa nai karo.

⁴Naram chaal chalan se aapan dil meñ sundar bano. I rakam ke sundarta sab din rahi, aur Parmeshwar yahi ke khaas samjhe hei.

⁵Bahut din pahile u aurat log jon Parmeshwar ke weship karat rahin, ulog aapan pati ke aage rakh ke apne aap ke sundar banaain.

⁶Ek ekzaampal Sarah hei, Abraham ke baat maanis aur uske aapan swaami bolaat rahi. Tum uske sachcha laṛkan hei, agar tum raaiṭ kaam karta hei aur koi cheej se ḍarta nai hei.

⁷Agar tum pati hei, to tum aapan patni ke saathe samajhdaari se raho. Uske aadar karo, kaahe ke u tumhaar rakam sṭrong nai hei, aur u tumhaar sañghe jeewan ke gifṭ baaṭe hei. Tab koi bhi cheej tumhaar preya ke rasta nai roki.

⁸Aakhri meñ, sab ke sab ek man se raaji hoy ke aur ek dusra ke khaatir prem aur daya dekhaao. Tum sab dayaalu aur naram bhi raho.

⁹Buraai ke badla buraai se nai deo, aur gaari ke badle gaari nai deo. Uske badle, sab ke uppar daya karo. Tum sab Parmeshwar ke chuna log hei, aur u tum log ke aasheesh dei. Baaibal bole hei,

¹⁰“Kaa tum sachmuch meñ jindagi se prem karta hei? Kaa tum khusi rahe mañgta hei? Tab kaṛua baat bole ke band kar deo aur jhuuṭ bole ke band kar deo.

¹¹Aapan kharaab rasta chhoṛ deo aur raaiṭ kaam karo, jeise tum u rasta khoj leta hei, tab uspe chalo jon saanti ke bagal le jaay hei.

¹²Prabhu u sab ke uppar dekh bhaal kare hei jon uske baat maane hei, aur ulog ke preya ke bhi sune hei. Lekin ulog ke agaiñsṭ jaay hei jon kharaab kaam kare hei.”

¹³Kaa achchha kaam kare ke hausla ke, tumme koi nuksaan pahuñchaay sake hei?

¹⁴Agar tumme achchha kaam ke waaste dukh uṭhaay ke paṛi, to Parmeshwar tumme aasheesh dei. To ḍaro nai aur chinta bhi nai karo ki log kon cheej kari.

¹⁵Krisṭ ke aadar karo aur uske aapan jeewan ke Prabhu banan deo. Jab koi tumhaar aasha ke baare meñ puuchhi to hardam jawaab dewe ke waaste taiyaar raho.

¹⁶Daya aur aadar se jawaab deo aur aapan man safa rakkho. I rakam se tum ulog ke sarmaay dega jon Krisṭ ke biswaasi hoy ke kaaran tumhaar achchha chaal ke baare meñ kharaab bole hei.

¹⁷I tumhaar waaste achchha hei ki Parmeshwar ke baat maano aur achchha kaam kare ke waaste dukh uṭhaao naa ki kharaab kaam kare ke waaste.

¹⁸Krisṭ ek dafe ham log ke paap ke waaste maris. Ek bhola bhaala admi paapi log ke waaste maris. Krisṭ i karis ki jisse u tumme Parmeshwar ke lage laay, jab uske deñhi maara gais raha aur uske Aatma ke jinda kara gais raha.

¹⁹Krisṭ tab keidi Aatma ke lage jaay ke parchaar karis.

²⁰Ulog Parmeshwar ke baat nai maanin raha jab Noa jahaaj banaat raha, lekin Parmeshwar ulog ke sañghe dheeraj rakkhis raha. Jahaaj meñ aaṭh log gain aur baaṛh se bach ke nikar aain.

²¹U baaṛh ke paani baptisma ke rakam raha jon abhi tumme bachaay hei. Lekin baptisma tumhaar deñhi ke dhowe se jaada maane rakkhe hei. Iske matlab hei Parmeshwar ke bagal safa man se ghuum jaao, kaahe ke Yeeshu Maseeh ke murda meñ se jinda kara gay raha.

²²Krisṭ ab swarag meñ hei, jahañ pe u Parmeshwar ke raaiṭ saaiḍ beiṭhis hei. Sab ainjals, adhikaari log, aur sakti uske kaabu meñ hei.