Read Hindi, Fiji 1 Peeṭa 5 Bible Online

1 Peeṭa 5 - Hindi, Fiji bible

1 Peeṭa 5

¹Ham, jon chech ke agua hei, baaki sab chech ke agua log se apeel karta hei. Ham Krisṭ ke dukh ke dekha hei, aur ham bhi uske mahima jon ham log ke dekhaawa jaai, usman bhaag lega. Ham tum log se apeel karta hei.

²Jeise charwaaha log bheṛa ke dekhe hei, wahi rakam tum bhi u sab ke dekho jon ke Parmeshwar tumhaar dekh bhaal meñ chhoṛis hei. Parmeshwar ke khusi kare ke waaste i sab dil se karo, nai ki tum sochta hei ki tumme kare ke hei. I kaam u rakam karo jon tum kare mañgta hei, i nai ki tum peisa banaay mañgta hei.

³Jon log tumhaar nichche hei ulog ke bosaai nai dekhaao, lekin ulog ke waaste ek ekzaampal bano.

⁴Tab Krisṭ jon sab se baṛa rakhwaala hei, lauṭi, tab tumme ek taaj mili, jiske mahima kabhi nai murjhaai.

⁵Tum sab jawaan log aapan baṛa log ke baat maano. Asal meñ, sab log ke chaahi ki aur sab se naram byohaar kare. Baaibal bole hei, “Parmeshwar ghamanḍi log ke nai laaik kare hei lekin u sab ke madat kare hei jon naram dil ke hei.”

⁶Parmeshwar ke mahaan sakti ke aage naram bano, aur jab ṭaaim aai to u tumme aadar kari.

⁷Parmeshwar tumhaar parwaah kare hei, yahi khaatir aapan sab chinta uske de deo.

⁸Saaodhaan raho aur jaagte raho. Tumhaar dusman, saitaan, ek garjewaala sher ke rakam hei, jon chuppe chuppe ghuume hei ki u koi pe hamla kare.

⁹Lekin tumme saitaan ke duur rakkhe ke hei aur aapan biswaas meñ majbuut rahe ke hei. Tum janta hei ki dunia bhar meñ sab bagal Prabhu ke biswaasi log yahi rakam dukh uṭhaay hei jeise tum uṭhaata hei.

¹⁰Lekin Parmeshwar aapan daya jon ham log ke nai mile ke chaahi sab pe dekhaais hei. Yahi kaaran u Maseeh Yeeshu ke rakkhis ki u tumme chuni aur aapan anant mahima meñ bhaag lewe dei. Tum thoṛa din ke waaste dukh uṭhaayga, lekin Parmeshwar tumme puura, sthir (steady) aur majbuut banaai.

¹¹Parmeshwar sab ṭaaim konṭrol meñ rahi! Aameen.

¹²I chhoṭa se chiṭṭhi likhe ke khaatir, Silbaanas hamme madat karis hei, aur ham uske Prabhu ke ek biswaasi samajhta hei. Ham tumhaar hausla baṛhaay mañgta hei aur bataay mañgta hei ki Parmeshwar ketna dayaalu hei, ki jisse tumhaar biswaas usman bana rahe.

¹³Baibilon se Prabhu ke biswaasi ke bagal se namaste. Ulog Parmeshwar ke chuna log hei. Maak, jon hamaar laṛka ke rakam hei, aapan namaste bheje hei.

¹⁴Ek dusra ke gale mil ke namaste bolna. Ham preya karega ki Parmeshwar u sab ke saanti dei jon Krisṭ ke hei.