Read Hindi, Fiji 2 Peeṭa 3 Bible Online

2 Peeṭa 3 - Hindi, Fiji bible

2 Peeṭa 3

¹Pyaare dost log, i hamaar dusra chiṭṭhi hei jon ham tum log ke lage likhta hei ki tumhaar hausla baṛhe aur tum achchha se soche sako. Ham nai mañgta hei ki tum i bhulaao

²jon Parmeshwar ke nabi log bolin raha ki hoi. Tum u sab kabhi nai bhulaana jon pawitr nabi log bahut din pahile sikhaain raha. Aur tum yaad rakhna jon prerit log bataain raha ki ham log ke Prabhu aur Muktidaata ham log ke kare ke hukum dees raha.

³Lekin sab se pahile tumme i cheej ke jaane ke chaahi ki aakhri roj pe log aapan chaahat ke siwaay aur kuchh ke baare meñ nai sochi. Ulog tumhaar hasi uṛaai

⁴aur boli, “Kaa tumhaar Prabhu waada nai karis raha ki u fir se aai? Hiañ tak ki pahila agua log mar gain, aur dunia kuchh bhi nai badlis.”

⁵Ulog i sab i kaaran boli ki ulog beeta baat bhulaay maañge hei jab ki asmaan aur dharti Parmeshwar ke hukum se bana raha. Dharti paani se nikar ke aais aur paani se bana.

⁶Baad meñ u baṛa baaṛh ke paani se naas bhais raha.

⁷Lekin Parmeshwar hukum dees hei ki abhi ke asmaan aur dharti nyaay ke din tak rahi. Uske baad usman aagi lagaay dewa jaai, aur adharmi log usman naas hoy jaai.

⁸Pyaare dost log, i nai bhuulo ki Prabhu ke waaste ek roj ek hajaar saal ke baraabar hei, aur ek hajaar roj ek din ke baraabar hei.

⁹Prabhu aapan waada puura kare meñ nai chuuke hei, jeise kuchh log uske soche hei. Lekin, Parmeshwar dheeraj waala hei, kaahe ke u maañge hei ki sab koi paap chhoṛ de aur naas nai howe.

¹⁰Prabhu ke lauṭe ke roj, ham log ke ek chor ke rakam chakit kar dei. Asmaan ek baṛa garjan ke sañghe heraay jaai, aur puura dharti suuraj ke garmi se gal jaai. Tab dharti aur uspe jon sab kaam bhais hei, sab bhasam hoy jaai.

¹¹Sab kuchh naas hoy jaai. Yahi kaaran jon rakam tum aapan jeewan bitaata hei usse Parmeshwar ke aadar aur sewa karte rahna.

¹²U din ke waaste tum rasta dekhte rahna jab Parmeshwar sab ke nyaay kari, aur tumme u din ke jaldi laay ke kosis kare ke hei. U roj asmaan jar ke raakhi hoy jaai, aur baaki sab cheej garam se gal jaai.

¹³Lekin Parmeshwar hamme nawa swarag aur dharti ke waada karis hei, jahañ pe nyaay raaj kari. Ham log wahi ke besabri se waiṭ karta hei!

¹⁴Dosto, jab tum sab waiṭ karta hei, tab tumme dekhe ke hei ki Parmeshwar tumme ekdam safa, bina daag ke, aur saanti se rahte paay.

¹⁵I nai bhulna ki Prabhu ke lage bahut dheeraj hei kaahe ke u admi log ke bachaay maañge hei. Ham log ke pyaara dost Pol bhi yahi bolis raha, jab u aapan u gyaan se likhis raha jon Parmeshwar uske dees raha.

¹⁶Pol aapan sab chiṭṭhi meñ yahi baat bolis hei, lekin jon cheej u bole hei usman se kuchh baat nai samjhaay hei. Kuchh muurakh aur chilbilla log uske baat ke ghumaay firaay ke apne aap ke naas kar le hei. Yahi rakam ulog baaki sab vachan ke sañghe bhi kare hei.

¹⁷Dosto, tum log ke pahile se chetaaoni mil gais hei! To dushṭ log ke galti ke pichchhe chal ke aapan stirtha (balance) nai khoy dena.

¹⁸Lekin ham log ke Prabhu aur muktidaata Yeeshu Maseeh ke sundar daya aur samajh, tumme madat kari ki tum aage baṛhte jaao. Yeeshu Maseeh ke baṛaai abhi aur hardam karte rahna. Aameen.