Read Hindi, Fiji 1 Yuhanna 2 Bible Online

1 Yuhanna 2 - Hindi, Fiji bible

1 Yuhanna 2

¹Hamaar bachcha log, ham i likhta hei ki tum sab paap nai karega. Lekin agar tum paap karta hei, to Yeeshu Maseeh jon hardam raaiṭ kaam kare hei, ham log ke waaste Pita se baat kari.

²Krisṭ hee hamaar paap ke balidaan hei jon ham log ke aur puura dunia ke log ke paap ke le jaay hei.

³Jab ham Parmeshwar ke baat maanta hei, tab ham uske achchha se jaan leta hei.

⁴Agar ham log bolta hei ki ham uske janta hei lekin uske baat ke nai maanta hei, ham log jhuuṭ bolta hei aur ham log ke dil meñ sachchaai nai hei.

⁵Ham Parmeshwar se sachcha prem tab karta hei jab ham uske weise baat maanta hei jeise maane ke chaahi, aur tab ham sab janta hei ki ham uske hei.

⁶Agar ham boli ki ham uske hei, tab ham log ke Krisṭ ke bataay gay rasta pe chale ke chaahi.

⁷Hamaar dost log, ham tumme nawa komaanḍmant dewe ke waaste nai likhta hei. I wahi hei jon tumme sab se pahile dia gais raha, aur i wahi sandes hei jon tum suna raha.

⁸Fir bhi i sachmuch meñ nawa komaanḍ hei, aur tum iske sachcha matlab janta hei, wahi rakam jeise Krisṭ jaane hei. Tumme dekhaay hei ki añdhera duur howe hei aur sachcha roshni aage se chamkat raha.

⁹Agar ham maanega ki ham roshni meñ hei aur koi se jaran karega, tab ham abhi bhi añdhera meñ hei.

¹⁰Lekin agar ham dusra sab se prem karta hei, tab ham ujaara meñ hei, aur ham koi ke waaste museebat nai khaṛa karta hei.

¹¹Agar ham dusra koi se jaran karta hei, tab ham añdhera meñ rahta aur chalta hei. Ham log nai janta ki ham kahañ jaata hei, kaahe ke ham añdhera meñ nai dekhe sakta hei.

¹²Bachcho, ham tumlog ke lage likhta hei, kaahe ke tum log ke paap Krisṭ ke naam se maaf kar dewa gay hei.

¹³Maata pita, ham tum log ke lage likhta hei, kaahe ke tum log uske jaana jon huañ suru se raha. Naojawaan log, ham tumlog ke lage i khaatir likha, kaahe ke tum log dusṭ ke haraay dia hei.

¹⁴Bachcho, ham tum log ke lage i khaatir likha, kaahe ke tum log Pita ke jaana. Maañ baap, ham tum log ke lage i khaatir likha, kaahe ke tum log uske jaana jon huañ suru se raha. Naojawaan log, ham tum log ke lage likhta hei, kaahe ke tum log ke lage taagat hei. Parmeshwar ke sandes tum log ke dil meñ majbuuti se hei, aur tum log dusṭ jan ke haraay dia hei.

¹⁵Dunia se aur usman jon jon cheej hei usse prem nai karo. Agar tum dunia se prem karega, tab tum Pita se prem nai kare sakta hei.

¹⁶Ham log ke fuulish ghamanḍ i dunia se aay hei, aur ham log ke shareer ke chaahat aur u laalach ki ham log ke paas sab kuchh hoy jaay jon ham dekhta hei, i sab bhi dunia se aay hei. Isman se kuchh bhi Pita ke lage se nai aay hei.

¹⁷Sansaar aur uske chaahat miṭte jaay hei, lekin agar ham log Parmeshwar ke baat maanega, tab ham log hardam rahega.

¹⁸Bachcho, i aakhri ṭaaim hei. Tum to suna hoyga ki Krisṭ ke dusman yahi ṭaaim aage aai, aur bahut se Krisṭ ke dusman aay gain hei. Yahi kaaran ham janta hei ki aakhri ṭaaim aay gais hei.

¹⁹I log ham log ke grup meñ se aain hei, fir bhi ulog ham log meñ se nai rahin. Agar ulog ham log meñ se rahta, to ham log ke sañghe rahta. Lekin ulog chala gain, jon saabit kare hei ki ulog ham log ke grup ke nai raha.

²⁰Krisṭ, jon Pawitr hei tumme aasheesh dees hei, aur tum sab samajh lia hei.

²¹Hamme tumhaar lage sachchaai ke baare meñ nai likhe ke hei kaahe ke tum sachchaai jaan gaya hei. Tum to i bhi janta hei ki jhuuṭa log sachchaai ke nai rahe hei.

²²Aur ek jhuuṭa u hei jon koi bole hei ki Yeeshu, sachcha Krisṭ nai hei. Jon koi bhi i bole hei, u Krisṭ ke dusman hei aur duuno Pita aur Putr ke nai maane hei.

²³Agar ham log Putr ke nai maanega, to ham Pita ke bhi nai maanega. Lekin agar ham bolta hei ki ham log Putr ke apnaay lia hei, to ham log ke Pita hei.

²⁴Jon sandes tum sab se pahile suna hei, wahi ke baare meñ sochte raho, aur tum log hardam Pita aur Putr meñ dil se bana rahega.

²⁵Putr apne aap hamme anant jeewan ke waada karis hei.

²⁶Ham i likhta hei ki ham tum log ke ulog ke baare meñ chetaaoni de saki, jon log tumme ulṭa rasta dekhaai.

²⁷Lekin Krisṭ tumme Pawitr Aatma se aasheesh dees hei. Ab Aatma tum meñ rahe hei, aur tumme aur koi aur ṭeecha ke jaruurat nai hei. Aatma sachcha hei aur tumme sab kuchh sikhaai. Yahi kaaran jeise Aatma tumme sikhaais hei, wahi rakam dil se Krisṭ ke sañghe raho.

²⁸Bachcho, dil se Krisṭ meñ bana raho. Tab jab u lauṭi, ham log ke konfiḍens hoi aur saram se luke ke nai paṛi.

²⁹Tum to janta hei ki Krisṭ hardam raaiṭ kaam kare hei aur jon koi bhi raaiṭ kaam kare hei, u Parmeshwar ke laṛkan hei.