Read Hindi, Fiji 1 Yuhanna 3 Bible Online

1 Yuhanna 3 - Hindi, Fiji bible

1 Yuhanna 3

¹Socho ki Pita ham se ketna prem kare hei. U ham se etna prem kare hei ki ham log uske aapan laṛkan kahaata hei, jeise ki ham sab sachche meñ hei. Lekin jab ki i dunia ke log nai jaanat rahin ki Krisṭ kon hei, to ulog i nai jaane hei ki ham sab kon hei.

²Dosto, ham log abhi Parmeshwar ke bachcha log hei, aur aage kaa hoi uske ham log nai dekha hei. Lekin ham log i janta hei ki jab Yeeshu lauṭi, ham log uske rakam rahega, kaahe ke ham log uske wahi rakam dekhega jeise u hei.

³Yahi aasha hame pawitr banaay rakkhe hei, jeise Krisṭ pawitr hei.

⁴Jon koi paap kare hei u Parmeshwar ke kaanuun ke tuuṛe hei, kaahe ke paap kaanuun ke tuuṛe ke baraabar hei.

⁵Tum to janta hei ki Krisṭ paap le jaay ke khaatir aais raha. U paapi nai hei,

⁶aur jon log dil se uske sañghe rahe hei, paap nai karte rahi. Agar ulog paap karte rahi to ulog Krisṭ ke nai jaane hei, aur ulog uske kabhi nai dekhin hei.

⁷Bachcho, dhoka meñ nai rahna. Jon koi bhi raaiṭ kaam kare hei, u achchha hei, ṭheek wahi rakam jeise Krisṭ hei.

⁸Jon koi bhi paap karte rahe hei u saitaan ke hei. U suru se paap karte raha, lekin Parmeshwar ke Putr aais ki u sab cheej naas kar de jon saitaan karis raha.

⁹Parmeshwar ke laṛkan paap nai kare sake hei. Uske jeewan dewe waala sakti ulog meñ rahe hei aur ulog ke uske bachchan banaay hei, ki jisse ulog paap nai karte rahi.

¹⁰Tum log Parmeshwar ke laṛkan ke aur saitaan ke laṛkan se alag bataay sakta hei, kaahe ke jon saitaan ke bilong kare hei ulog kabhi raaiṭ kaam nai kari ya ek dusra se prem kari.

¹¹Suru se tumme bataawa gay raha ki ham log ke ek dusra se prem kare ke chaahi.

¹²Kain ke rakam nai raho, jon saitaan ke bilong karat raha aur aapan bhaiya ke jaan se maar dees. Kaahe ke u aapan bhaiya ke jaan se maaris? U i kaaran karis kaahe ke uske bhaiya achchha raha, aur u dushṭ raha.

¹³Dosto, achambha nai karna agar i dunia ke log tumme haiṭ kari.

¹⁴Ham log ke ek dusra se prem saabit kare hei ki ham log maut se jeewan ke taraf chala gaya hei. Lekin agar tum ek dusra se prem nai karta hei, to tum abhi bhi maut ke sakti meñ daba hei.

¹⁵Agar tum ek dusra se haiṭ karega, tab tum hatyaara hei, aur ham janta hei ki hatyaara log ke anant jeewan nai rahe hei.

¹⁶Ham log janta hei ki prem kon cheej hei kaahe ke Yeeshu aapan jeewan ham log ke waaste de dees raha. Yahi kaaran ham log ke aapan jeewan ek dusra ke waaste dewe ke hei.

¹⁷Agar ham log ke lage u sab hei jon ham mañgta hei aur ham log meñ se koi ek aapan ke lage kuchh nai hei, tab ham log ke ulog pe daya kare ke hei, nai to ham i nai bole sakta hei ki ham Parmeshwar se prem karta hei.

¹⁸Bachcho, tum dusra se prem tabahi dekhaayga jab ulog ke sachche ke madat karega, khali ulog ke baare meñ baat kare se nai.

¹⁹Jab ham log dusra se prem karta hei, ham janta hei ki ham sachchaai meñ rahta hei, aur ham log Parmeshwar ke saamne achchha mahsuus karta hei.

²⁰Lekin agar ham apne aap meñ achchha nai mahsuus karta hei, Parmeshwar ham log ke feelings se baṛa hei, aur u sab kuchh jaane hei.

²¹Dosto, agar ham log Parmeshwar ke saamne achchha mahsuus karta hei, tab ham log meñ himmat rahi ki ham uske lage aay.

²²U ham log ke u sab dei jon ham log usse maañgta, kaahe ke ham log uske baat maanta hei aur wahi karta hei jisse u khusi rahe hei.

²³Parmeshwar chaahe hei ki ham log ke biswaas uske Putr Yeeshu Maseeh meñ rahe aur ham log ek dusra se prem kari.

²⁴Agar ham Parmeshwar ke hukum maanega, to ham log dil se uske sañghe ek hoy ke rahega aur u ham log ke saathe ek ban ke rahi. Jon Aatma u ham log ke dees hei, sabuut hei ki ham log uske sañghe ek hei.