Read Hindi, Fiji 1 Yuhanna 4 Bible Online

1 Yuhanna 4 - Hindi, Fiji bible

1 Yuhanna 4

¹Dost log, u sab ke nai biswaas karna jon log bole hei ki ulog ke lage Parmeshwar ke Aatma hei. U sab ke ṭesṭ karo aur dekho ki kaa u sachche ke Parmeshwar ke lage se aain hei. Bahut se jhuuṭa nabi dunia meñ chala gain hei,

²aur tum jaane sakta hei ki kon Parmeshwar ke lage se aais hei. Uske Aatma bole hei ki Yeeshu Maseeh ke paas sachche ke insaan ke deñhi hei.

³Lekin jab koi Yeeshu ke baare meñ i nai bole hei, tab tum jaan lena ki u admi ke lage u ek aatma hei jon Parmeshwar ke lage se nai aay hei aur u Krisṭ ke dusman hei. Tum to janta raha ki i dusman dunia meñ aai aur ab aay gais hei.

⁴Bachcha log, tum Parmeshwar ke bilong karta hei, aur tum i dusman log ke haraay dia hei. Tum meñ jon Parmeshwar ke Aatma hei, u usse bahut tagṛa hei jon dunia meñ hei.

⁵I dusman log i dunia ke hei, aur dunia i log ke sune hei, kaahe ke ilog wahi bhaasha bole hei.

⁶Ham log Parmeshwar ke hei, aur jon sab log Parmeshwar ke jaane hei, ham log ke suni. Lekin jon log Parmeshwar ke nai jaane hei, ham log ke nai suni. Yahi rakam se ham log bataay sakta hei ki kon Aatma sachche bole hei aur kon jhuuṭ.

⁷Dost log, ham log ke ek dusra se prem kare ke hei. Prem Parmeshwar se aay hei, aur jab ham log ek dusra se prem karta hei, to i dekhaay hei ki ham log ke nawa jeewan mila hei. Ab ham log Parmeshwar ke santaan hei, aur ham log uske janta hei.

⁸Parmeshwar prem hei, aur jon koi dusra se prem nai kare hei, uske kabhi nai jaane hei.

⁹Parmeshwar aapan prem ham log ke waaste dekhaais raha, jab u aapan eklauta beṭa ke i dunia meñ hamme jeewan dewe ke waaste bhejis raha.

¹⁰Sachcha prem, Parmeshwar ke waaste hamaar prem nai hei, lekin uske prem jon ham se hei. Parmeshwar aapan laṛka ke bhejis ki hamaar waaste u aapan balidaan dewe jisse ham log ke paap ke maafi mile.

¹¹Dost log, jab ki Parmeshwar ham se etna prem karis, to ham log ke ek dusra se prem kare ke chaahi.

¹²Koi bhi abhi tak Parmeshwar ke nai dekhis hei. Lekin agar ham ek dusra se prem karega, to Parmeshwar ham meñ rahi, aur uske prem sachchaai se ham log ke dil meñ bana rahi.

¹³Parmeshwar hamme aapan Aatma dees hei. Yahi rakam ham janta hei ki ham log uske sañghe ek hei, jeise ki u hamaar sañghe ek hei.

¹⁴Parmeshwar aapan laṛka ke bhejis ki u dunia ke muktidaata bane. Ham log uske laṛka ke dekha aur ab dusra log ke uske baare meñ bataata hei.

¹⁵Parmeshwar wahi ke sañghe rahe hei jon khula ruup se bataay hei ki Yeeshu, Parmeshwar ke Putr hei. Yahi rakam ham Parmeshwar meñ juṛa rahega,

¹⁶aur hame ekdam biswaas hei ki Parmeshwar ham se prem kare hei. Parmeshwar prem hei. Agar ham dusra log se prem karte rahega, tab ham log Parmeshwar ke dil meñ juṛa rahega, aur u bhi ham log meñ juṛa rahi.

¹⁷Agar ham sachmuch meñ dusra se prem karta hei, aur wahi rakam rahi jeise Krisṭ i sansaar meñ raha, tab hamme nyaay ke din ke chinta nai kare ke hei.

¹⁸Dusra ke waaste ek sachcha prem, chinta ke duur bhagaay dei. I soch ke ki hamme saja mili, ham ḍarta hei. I dekhaay hei ki ham sachche ke prem kare ke nai seekha hei.

¹⁹Ham log prem karta hei kaahe ke Parmeshwar ham se pahile prem karis raha.

²⁰Lekin agar ham boli ki ham Parmeshwar se prem karta hei aur ek dusra se prem nai kari, tab ham log jhuuṭa hei. Ham log Parmeshwar ke nai dekhe sakta. To ham keise Parmeshwar se prem kare sakta hei, agar ham log ulog jon ke dekhe sakta hei, ulog se prem nai karta?

²¹Parmeshwar ke komaanḍmant jon ham log ke dees hei i hei, “Parmeshwar se prem karo aur ek dusra se bhi!”