Read Hindi, Fiji 1 Yuhanna 5 Bible Online

1 Yuhanna 5 - Hindi, Fiji bible

1 Yuhanna 5

¹Agar ham biswaas kari ki Yeeshu hee sachcha Maseeha hei, to ham log Parmeshwar ke santaan hei. Jon koi bhi Pita se prem kare hei, u sab uske santaan se bhi prem kari.

²Agar ham Parmeshwar ke baat maani aur usse prem kari, tab ham janta hei ki ham uske santaan se prem karta hei.

³Ham log Parmeshwar se prem tab dekhaata hei jab uske hukum maanta hei, aur uspe chale ke kaṛa baat nai hei.

⁴Parmeshwar ke har ek bachcha dunia ke haraay sake hei, aur ham log ke biswaas hei jon i jeet dewe sake hei.

⁵Koi bhi sansaar ke haraay nai sake hei agar uske biswaas Yeeshu, Parmeshwar ke Putr meñ nai hei.

⁶Khuun aur paani Yeeshu ke bagal meñ se nikris. U khali paani nai raha, lekin khuun aur paani raha. I sab hamme Aatma bataay hei, kaahe ke Aatma sachcha hei.

⁷Asal meñ hiañ teen jan hei jon i sab bataay hei.

⁸U Aatma, paani aur khuun hei, aur i sab ek dusra se agri hoy hei.

⁹Log jon bole hei uspe ham log biswaas karta hei. Lekin jon cheej Parmeshwar bole hei uspe ham aur bhi biswaas kare sakta hei, aur Parmeshwar hee hei jon aapan beṭa ke baare meñ bolis hei.

¹⁰Agar ham log ke Parmeshwar ke Laṛka pe biswaas hei, tab ham log u sab biswaas karta hei jon Parmeshwar bataais hei. Lekin agar ham nai biswaas kara jon Parmeshwar aapan laṛka ke baare meñ bataais hei, tab i wahi rakam hei ki ham Parmeshwar ke jhuuṭa bolta hei.

¹¹Parmeshwar ham log se i bhi bataais ki u hamme anant jeewan dees hei aur ham log ke jeewan uske laṛka ke bagal se aay hei.

¹²Aur tab, agar ham log ke lage Parmeshwar ke laṛka hei, tab ham log ke lage i jeewan hei. Lekin agar ham log ke lage Putr nai hei, to ham log ke i jeewan bhi nai hei.

¹³Tum log sab ke Parmeshwar ke Putr meñ biswaas hei, aur ham i likhta hei ki tumme bataay dei ki tum log ke anant jeewan hei.

¹⁴Ham log achchha se janta hei ki Parmeshwar ham log ke preya ke suni jab ham log u sab mañgta hei jon uske khusi kare hei.

¹⁵Aur agar ham janta hei ki Parmeshwar ham log ke sune hei jab ham preya karta hei, to ham log ke jaane ke chaahi ki ham log ke preya ke jawaab ham log ke mil gais hei.

¹⁶Maan leo tum dekhta hei ki ham log meñ se koi paap kare hei jon gahira paap nai hei, to tum uske waaste preya kare sakta hei, aur u admi ke anant jeewan mili. Lekin u paap utna gahira nai hoy ke chaahi.

¹⁷Koi bhi cheej jon raaiṭ nai hei, paap hei, lekin sab paap maut nai rahe hei.

¹⁸Ham log i achchha se janta hei ki Parmeshwar ke laṛkan paap nai karte rahe hei. Parmeshwar ke Putr khud ulog ke bachaay hei, aur saitaan ulog ke kuchh nai kare sake hei.

¹⁹Ham log achchha se janta hei ki ham Parmeshwar ke paas se aaya hei aur dunia ke baaki log saitaan ke sakti meñ hei.

²⁰Ham log janta hei ki Parmeshwar ke Putr Yeeshu Maseeh aais hei aur ham log ke sachcha Parmeshwar dekhaais hei. Aur Yeeshu ke kaaran, ham log ab sachcha Parmeshwar ke hei jon anant jeewan dewe hei.

²¹Bachcha log, tum sab muurti se ekdam duur rahna.