Read Hindi, Fiji 2 Yuhanna 1 Bible Online

2 Yuhanna 1 - Hindi, Fiji bible

2 Yuhanna 1

¹Chech ke agua log ke bagal se. Ek khaas aurat aur uske laṛkan ke khaatir. Ham tum log se bahut prem karta hei, aur u sab log bhi jon sachchaai jaane hei.

²Ham log tum se prem karta hei kaahe ke ham log ke dil meñ ab sachchaai hei, aur u hardam rahi.

³Ham preya karta hei ki Parmeshwar Pita aur uske Putr Yeeshu Maseeh ham sab pe daya kari! Saait i sab se hamme saanti aur sachchaai aur prem mili.

⁴Hamme bahut khusi bhais raha i jaan ke ki tumhaar kuchh laṛkan sachchaai ke maane hei, jeise Pita ham log ke kare ke bataais raha.

⁵Dost log, ham i nai likhta hei ki tumme aur tumhaar laṛkan se boli ki u kaam karo jon tum sab pahile nai kara hei. Ham likhta hei ki tum log ke bataai ki ek dusra se prem karo, jon ki pahila cheej tumme kare ke bataawa gay raha.

⁶Prem ke matlab hei ki ham wahi kari jon Parmeshwar ham log ke bataay hei. Aur suru se, u hamme bataais raha ki usse prem karo.

⁷Bahut jhuṭṭa log dunia meñ ghuume lagin hei. I log sab ke bharmaay hei ki insaan ke deñhi meñ Yeeshu Maseeh nai hei. Lekin ilog jhuṭṭa log hei aur Maseeh ke dusman hei.

⁸Yahi khaatir hamme saaodhaan rahe ke hei ki jon kuchh ham log kamaaya hei uske heraay nai dei. Agar eise hoi to tumme puura inaam nai mili.

⁹Krisṭ ke baare meñ jon kuchh bhi seekha hei, uske badalte nai raho, nai to Parmeshwar tumhaar sañghe nai rahi. Lekin agar tum jon cheej seekha hei, uske kas ke pakaṛ ke rakkhega, to Pita aur Putr duuno tumhaar sañghe rahi.

¹⁰Agar log uske ṭeeching se agri nai hoi, to ulog ke aapan ghar meñ welkam nai karo aur namaste bhi nai karo.

¹¹Ulog se namaste kare ke matlab hei ki tum ulog ke bura kaam meñ bhaag leta hei.

¹²Hamme tum se bahut kuchh kahe ke hei, lekin ham pen aur iñk se nai likhe mañgta hei. Ham mañgta hei ki ham aay ke tum se aamne saamne baat kari, kaahe ke i ham log ke bahut khusi kari.

¹³Tumhaar khaas bahini ke laṛkan ke bagal se namaste.