Read Hindi, Fiji 3 Yuhanna 1 Bible Online

3 Yuhanna 1 - Hindi, Fiji bible

3 Yuhanna 1

¹Chech ke agua log ke bagal se. Hamaar pyaara dost Gaius ke naam. Ham tum se prem karta hei kaahe ke ham log sachchaai pe chalta hei,

²pyaara dost, aur ham preya karta hei ki tumhaar waaste sab kuchh ṭheek rahe. Hamme aasha hei ki tum aapan deñhi se otna majbuut hei jetna ham sochta hei ki tum aatma meñ hei.

³Hamme bahut khusi lage hei jab Prabhu ke biswaasi log aay ke khullam khulla baat kare hei ki keise tum sachchaai ke maanta hei.

⁴Isse jaada khusi aur nai mile hei jab ham sunta hei ki hamaar laṛkan sachchaai pe chale hei.

⁵Hamaar dost, tum hardam Prabhu ke biswaasi log ke imaandaari se madat kara hei, ulog ke bhi jon ke tum pahile se nai janta raha.

⁶Ulog tumhaar prem ke baare meñ chech ke bataay deen hei. Ulog tumhaar achchhaai ke baare meñ bolin ki tum ulog ke welkam kara aur ulog ke maksad pe Parmeshwar ke sewak ke rakam bhej dia.

⁷Jab ulog dusra se Prabhu ke baare meñ bataay ke waaste chala gain, tab ulog tay karin ki jon bhi Prabhu ke biswaasi nai hei, ulog se madat nai lei.

⁸Ham log ke eisane log ke madat kare ke chaahi, ki jisse ham log ulog ke sañghe mil ke sachchaai baaṭe meñ bhaag le saki.

⁹Ham chech ke lage likha raha. Lekin Diotrefes maañge hei ki wahi sab ke agua bana rahe, aur u ham log ke bagal dhyaan nai dewe hei.

¹⁰To agar ham aayga, to ham uske bataayga ki keise u ninda kar ke ham log ke dos lagaay hei. U khali yahi nai karis hei, lekin u koi bhi Prabhu ke biswaasi jon ke jaruurat rahe hei, ulog ke welkam nai kare maañge hei. Aur jab dusra chech ke log ulog ke welkam kare maañge hei, tab ulog ke u chech se bahire nikaar de hei.

¹¹Hamaar dost, dusra ke bura rasta nai apnaana! Ulog ke dekhaay waala rasta pe chalna, jon achchha kaam kare hei. Ulog Parmeshwar ke laṛkan hei, lekin jon hardam bura kaam kare hei, ulog Parmeshwar ke kabhi dekhin bhi nai hei.

¹²Sab koi Demetriyus ke baṛaai kare hei, aur wahi rakam ke sachcha sandes bhi u sikhaay hei. Ham bhi uske baare meñ achchha bolta hei, aur tum to janta hei ki ham jon bhi kuchh bolta hei, u sachcha hei.

¹³Hamme, tum se aur bhi bahut kahe ke hei, lekin ham pen aur iñk se nai likhe mañgta hei.

¹⁴Aasha hei ki ham tumme jaldi dekhega, aur ham log tab baat karega.

¹⁵Ham preya karta hei ki Parmeshwar ke saanti ke aasheesh tum pe rahi! Tumhaar dost log tumme namaste bheje hei. Huañ pe ek ek ke naam leke hamaar namaste dena.