Read Hindi, Fiji Revelaishan 1 Bible Online

Revelaishan 1 - Hindi, Fiji bible

Revelaishan 1

¹Yahi hei jon Parmeshwar Yeeshu Maseeh ke dekhaais raha, ki jisse u aapan daas log ke bataay sake ki jaldi hee kon cheej hoy waala hei. Maseeh tab aapan ainjal ke ek sandesa de ke aapan daas Yuhanna ke lage bhejis.

²Aur Yuhanna u sab bataais jon u Parmeshwar ke sandesa meñ dekhis raha aur jon cheej Yeeshu Maseeh bolis aur karis raha.

³Parmeshwar u sab ke aasheesh dei jon i profasi dusra ke paṛh ke sunaai, aur uske bhi jon sun ke is pe chali. Ṭaaim ekdam aay gais hei.

⁴Yuhanna ke bagal se Eshia ke saat chech ke lage Ham binti karta hei ki tumme Parmeshwar se jon hei aur raha aur aay hei, usse daya aur saanti ke aasheesh mile. Parmeshwar ke siñghaasan ke saamne se tumme saat aatma se daya aur saanti ke aasheesh mile.

⁵Yeeshu Maseeh jon ek faitful gawaah hei uske bagal se tumme daya aur saanti mile. Yeeshu pahila raha jon maut ke jeetis, aur u ab sab dharti ke raaja log ke uppar raaj kare hei. Maseeh ham log se prem kare hei, aur uske khuun se u ham log ke aapan paap se ajaad karis.

⁶U ham log ke raaja ke rakam raaj karan dei aur aapan Pita Parmeshwar ke paadri log ke rakam sewa karan dei. Uske mahima aur sakti hardam ke waaste rahe! Aameen

⁷Dekho! U baadar ke sañghe aawe hei. Sab koi uske dekhi, ulog bhi jon uske talwaar bhokis raha. Dharti ke sab log uske kaaran roi. Haañ, eisehiyeñ hoi! Aameen.

⁸Prabhu Parmeshwar bole hei, “Ham Alfa aur Omega hei, wahi jon raha aur rahi aur aawe hei. Ham hei Parmeshwar Maha Sakti waala!”

⁹Ham Yuhanna hei, tum sab log ke sañghe ek biswaasi. Ham log sahta hei kaahe ke Yeeshu ham log ke raaja hei, lekin u ham log ke sakti dewe hei ki ham log sahe saki. Hamme Patmas Aaylenḍ bheja gay raha, kaahe ke ham Parmeshwar ke sandes parchaar kara raha aur Yeeshu ke baare meñ bataay raha.

¹⁰Prabhu ke roj aatma hamme kaabu meñ kar lees, aur aapan pichchhe ham ek awaaj suna jon bigul (trumpet) ke awaaj ke rakam raha.

¹¹U awaaj bolis, “Ek buk meñ u sab likho jon tum dekhta hei. Tab uske saat chech, Efisus, Smurna, Pirgamun, Thuaateera, Sardis, Filadelfia aur Laodeekia ke lage bhejo.

¹²Jab ham ghuum ke dekha ki kon hamse baat kare hei, to ham saat sona ke lempsṭenḍ dekha.

¹³U lempsṭenḍ ke sañghe koi raha jon Manush ke Laṛka ke rakam dekhaat raha. U goṛ tak ke ek raub pahine raha, aur ek sona ke kapṛa uske chhaati se lapṭaan raha.

¹⁴Uske muuṛ aur baar snao aur rui ke rakam ujjar raha, aur uske aañkhi aagi ke flaims ke rakam dekhaat raha.

¹⁵Uske goṛ, peetal ke rakam jon ke jab aagi meñ pakaawa jaay weise chamkat raha, aur uske awaaj paani ke jharna ke rakam sunaat raha.

¹⁶Uske raaiṭ haath meñ saat taara raha, aur uske muh meñ se dui dhaari talwaar nikrat raha. Uske muh to eise chamkat raha jeise baarah baje ke suuraj.

¹⁷Jab ham uske dekha, ham uske goṛ pe ek mara admi ke rakam gir paṛa. Lekin u aapan raaiṭ haath ham pe rakkhis aur bolis, Ḍaro nai! Ham pahila hei, aur aakhri bhi,

¹⁸aur jinda bhi hei. Ham mar gay raha, lekin ab ham hardam ke waaste jinda hei, aur hamaar lage maut ke, aur maut ke dunia ke chaabhi hei.

¹⁹Wahi likhna jon tum dekha hei aur jon kuchh howe hei aur iske baad jon kuchh hoi.

²⁰Jon saat taara tum hamaar raaiṭ saaiḍ dekha raha aur saat sona ke lempsṭenḍ ke seekraṭ ham samjhaayga. U saat taara saat chech ke ainjals log hei, aur saat lempsṭenḍ saat chech hei.