Read Hindi, Fiji Revelaishan 10 Bible Online

Revelaishan 10 - Hindi, Fiji bible

Revelaishan 10

¹Fir hamme ek aur taagatwaala ainjal swarag se utarte dekhaan, u baadar se ḍhaka raha aur uske muuṛ pe rainbao raha. Uske muh suuraj ke rakam raha, aur uske goṛ aagi ke khuuṭa ke rakam raha,

²aur uske haath meñ ek chhoṭa skrol raha jon khol dewa gay raha. U aapan raaiṭ goṛ samundar meñ aur lefṭ goṛ jameen pe rakkhis raha.

³Tab u ek baṛa awaaj meñ chillaais jon sher ke garjan ke rakam raha. Saat dafe baadar garjis.

⁴Jab garjan ruka, tab ham likhe waala raha ki u kaa bolis raha. Lekin swarag se ek awaaj chillaay ke bolis, “Iske seekraṭ rakkho! I sab nai likho.”

⁵Jon ainjal ke ham samundar aur dharti pe khaṛa dekha raha, u aapan raaiṭ haath asmaan ke bagal uṭhaais.

⁶U Parmeshwar jon hardam rahe hei aur swarag, dharti, samundar aur sab jiu jantu ke banaais hei uske naam se waada karis. Ainjal bolis, “Tumme bahut deri waiṭ nai kare ke hei.

⁷Parmeshwar aapan sewak log, jon nabi log raha, ulog ke seekraṭ plen bataais hei aur i sab tab tak hoy jaai jab tak satwa ainjal aapan bigul bajaai.”

⁸Ek dafe fir swarag se ek awaaj ham se bolis, “Jaao, aur khula skrol ke u ainjal jon samundar aur dharti pe khaṛa hei, uske haath meñ se le leo.”

⁹Jab ham jaay ke u ainjal se chhoṭa skrol maañga, u ainjal bolis, “Skrol le jaao aur khaay leo! Tumhaar peṭ khaṭṭa hoy jaai, lekin tumhaar muh ke sawaad madh (honey) ke rakam meeṭha hee rahi.”

¹⁰Ham chhoṭa skrol ainjal ke haath meñ se leke khaay lia. U madh ke rakam meeṭha raha, lekin hamaar peṭ kaṛua hoy gais.

¹¹Tab kuchh awaaj bolis, “Sab se bataate raho ki sab log ke, des ke, jaati ke, bhaasha ke aur raaja log ke sañghe kon cheej hoi.”