Read Hindi, Fiji Revelaishan 12 Bible Online

Revelaishan 12 - Hindi, Fiji bible

Revelaishan 12

¹Koi khaas cheej asmaan pe aais. U ek aurat rahi jiske kapṛa suuraj ke rakam raha. Uske goṛ ke nichche chaañd raha, aur muuṛ pe ek taaj raha jisman baarah taara laga raha.

²U bachcha peida kare waali rahi, aur peeṛa se chillaat rahi.

³Asmaan meñ kuchh aur aais. U ek baṛa se laal dregan raha jiske saat muuṛ aur das siñg raha, aur ek ek taaj saato muuṛ pe raha.

⁴Aapan puuñchh se, ek tihaai taara ke nichche asmaan se ghaseeṭ ke nichche dharti pe feñk dees. Tab u dregan aurat ke bagal ghuumis, kaahe ke u maañgat raha ki jeise bachcha peida hoi, u uske khaay lei.

⁵U aurat ek laṛka ke peida karis, jon puura dunia pe kaṛaai se raaj kare sakat raha. U laṛka ke chheen lewa gais aur Parmeshwar ke lage le jaawa gais aur siñghaasan pe rakkha gais.

⁶U aurat ḍezaṭ meñ dauṛ gais jahañ uske waaste Parmeshwar ek jagha taiyaar karis raha. Huañ pe uske 1260 roj tak dekh bhaal kara jaai.

⁷Swarag meñ ek laṛaai suru hoy gais. Maaikal aur uske ainjals, dregan aur uske ainjals se laṛaai karat rahin.

⁸Lekin dregan u laṛaai haar gais. Dregan aur uske ainjals ke swarag se jabarjasti bahire kar dia gais

⁹aur nichche dharti pe feñk dewa gais. Haañ, u puraana saañp aur uske ainjals swarag se bahire feka gain! U saañp, jon dharti pe sab ke pagla banaat raha, Saitaan aur devil ke naam se jaana jaat raha.

¹⁰Tab ham suna ki swarag se ek awaaj chillaais, “Hamaar Parmeshwar aapan bachaay waala sakti dekhaais, aur uske raaj aay gais hei! Parmeshwar jiske chunis hei, u Maseeha aapan adhikaar dekhaais. Parmeshwar ke saamne raat aur din Saitaan hamaar log pe dos lagaais. Ab uske bahire feñk dewa gais hei!

¹¹Memna ke khuun aur Parmeshwar ke vachan ke kaaran Saitaan ke ham log ke log haraay deen hei. Ulog aapan praan dewe ke waaste raaji rahin.

¹²Swarag khusi manaao, u sab log ke sañghe, jon huañ rahe hei. Lekin dharti aur samundar pe taras khaao, kaahe ke nichche dharti pe devil ke feka gais raha. U jaane hei ki uske lage ṭaaim nai hei, aur u bahut gussa hei.”

¹³Jab dregan ke pata laga ki uske nichche dharti pe feñk dewa gais hei, tab u aurat jon laṛka ke peida karis raha, uske sataay ke kosis karis.

¹⁴Lekin u aurat ke baaj ke rakam dui pañkha dewa gais raha, ki jisse u ḍezaṭ meñ uṛe sake. Tab u saañp se bache saki aur uske ek ṭaaim, dui ṭaaim aur aadha ṭaaim ke waaste dekh bhaal kara jaai.

¹⁵Tab saañp u aurat ke pichchhe aapan muh se nadi ke paani bahaais ki usman u bahe jaay.

¹⁶Lekin dharti uske madat karis, aur sab paani sok lees jon dregan ke muh se nikra raha.

¹⁷Isse dregan aurat ke uppar bahut gussa bhais. Tab u uske baaki laṛkan se laṛaai kare lagis. Ulog wahi hei jon Parmeshwar ke baat maane hei aur jon cheej Yeeshu karis aur sikhaais hei usse imaandaar rahe hei

¹⁸U dregan samundar ke kinaare khaṛa hei.