Read Hindi, Fiji Revelaishan 13 Bible Online

Revelaishan 13 - Hindi, Fiji bible

Revelaishan 13

¹Ham samundar se ek jaanwar nikarte dekha. Iske lage das siñg aur saat muuṛ raha, aur ek ek siñg pe taaj raha. Ek ek muuṛ pe eisan naam likha raha jon Parmeshwar ke insalṭ kari.

²Jon jaanwar ke ham dekha raha, uske deñhi cheetaah ke raha, goṛ bhaalu ke, aur sher ke muh raha. Dregan aapan sakti aur siñghaasan aur adhikaar u jaanwar ke de dees raha.

³Uske ek muuṛ meñ bahut kharaab se choṭ laga raha, lekin ab ṭheek hoy gais hei. Dharti pe sab koi jaanwar ke dekh ke achambha karat rahin,

⁴aur ulog dregan ke weship karat rahin jon aapan adhikaar jaanwar ke de dees raha. Ulog jaanwar ke bhi weship karin aur bolin, “Koi bhi i jaanwar ke rakam nai hei! Koi bhi isse laṛe nai sake hei.”

⁵Jaanwar ke aapan baṛaai kare ke aur apne aap ke Parmeshwar bole ke, aur bayaalis (42) mahina tak uske raaj kare ke mauka mila.

⁶Jaanwar, Parmeshwar ke saraap dees, aur Parmeshwar ke naam ke bhi saraapis. Jon jagha Parmeshwar rahat raha, u jagha ke bhi saraapis, aur u sab ke jon Parmeshwar ke sañghe swarag meñ rahat rahin.

⁷Uske mauka raha ki u Parmeshwar ke log se laṛaai kare aur ulog ke haraawe. Uske sab jaat ke log, des, bhaasha, aur jaati ke uppar adhikaar raha.

⁸Sab log uske weship kari, ulog ke chhoṛ ke jon ke naam u buk meñ likhaan raha jon krieishan ke ṭaaim se pahile raha. U buk u Memna ke raha jon ke maara gay raha.

⁹Agar tumhaar kaan hei to suno!

¹⁰Agar tumhaar pakṛaay ke ṭaaim hei to tum pakṛa jaayga. Agar tumhaar talwaar se mare ke ṭaaim hei to tum talwaar se maara jaayga. Iske matlab hei ki Parmeshwar ke log ke keise sahe ke aur imaandaar rahe ke paṛi!

¹¹Ab ham ek dusra jaanwar ke dekha. I waala jameen meñ se aais. Iske lage memna ke rakam dui siñg raha, lekin dregan ke rakam bolat raha.

¹²U jaanwar ke waaste kaam karat raha jon ke gambheer ghaao achchha hoy gais raha. Aur u aapan sab adhikaar aur sakti iyuz karke dharti aur uske log ke jabarjasti u jaanwar ke weship karaawat raha.

¹³U bahut chamatkaari kaam karat raha, aur jab log dekhat rahin, huañ tak u asmaan se aagi nichche laay dees.

¹⁴I dusra jaanwar, pahila jaanwar ke waaste chamatkaar kar ke dharti ke log ke beokuuf banaais. Tab ulog se bol ke u jaanwar ke ek muurti banwaais jon talwaar ke choṭ se bhi u jaanwar nai mara.

¹⁵Uske jaanwar ke muurti ke deñhi meñ jaan ḍaale ke adhikaar mila, ki jisse u bole sake. Jon koi bhi u jaanwar ke muurti ke puuja nai karis raha, uske maar dewa gais raha.

¹⁶Sab log ke jabarjasti aapan raaiṭ haath ya maatha pe ek cheenha lagaay ke raha. Chaahe ulog taagat waala rahin ya kamjor, dhani ya gareeb, ajaad ya gulaam,

¹⁷u sab ke i cheenha lagaay ke raha, nai to ulog kuchh bhi beche ya khareede nai sakat rahin. I cheenha, u jaanwar ke naam ke waaste raha aur naam ke namba ke waaste raha.

¹⁸Jaanwar ke namba samjhe ke waaste tumme buddhi ke jaruurat hei! Lekin agar tum smaat hei, to tum iske jaane sakta hei. Uske namba hei chhe sao chhiyaasaṭ (666), aur i namba koi ek jan ke hei.