Read Hindi, Fiji Revelaishan 14 Bible Online

Revelaishan 14 - Hindi, Fiji bible

Revelaishan 14

¹Ham dekha ki Memna, Zion pahaaṛ pe khaṛa hei! Uske sañghe 144,000 log rahin jon ke maatha pe uske aur uske Pita ke naam likhaan raha.

²Tab ham swarag se eisan awaaj suna jon baaṛh ke garjan, baaṛh ke bhaari baadar ke garje ke rakam raha. U awaaj sune meñ harp ke miuzik lagat raha.

³Parmeshwar ke siñghaasan ke saamne, aur chaaro jinda praani aur baṛkuan ke saamne ek nawa gaana gaawa jaat raha. U 144,000 log jon ke dharti se bachaawa gais raha, ke chhoṛ ke aur koi u gaana ke nai seekhe sakat rahin.

⁴I sab wahi kuaara log hei, aur ilog Memna ke pichchhe jahañ bhi u jaay chala jaay hei. Ulog bachaawa gain ki ulog ke Parmeshwar aur Memna ke saamne dharti ke sab se pyaara log ke rakam bheñṭ kara jaay.

⁵Ulog kabhi jhuuṭ nai bole hei, aur ulog bahut bhola hei.

⁶Ham ek aur ainjal ke dekha. U asmaan meñ uṛat raha aur dunia ke sab jaati ke log ke, ṭraaib ke, bhaasha ke aur des ke bataay ke waaste uske lage anant susamaachaar raha.

⁷Ainjal jor se chillaais, “Parmeshwar ke aadar aur weship karo! Ṭaaim aay gais hei ki u sab ke nyaay kari. Uske saamne ghuṭna ṭeko jon dharti, swarag, samundar, aur ek ek nadi naara banaais hei.”

⁸Ek dusra ainjal uske pichchhe aais aur bolis, “Baibilon ke mahaan siṭi gir paṛa! Yahi u siṭi hei jon sab ke bura kaam kare ke khaatir nasa piyaais raha. Ab Parmeshwar gussaay gay hei, aur Baibilon gir gais hei.”

⁹Aakhri meñ, ek tisra ainjal aais aur chillaais, Agar tum u jaanwar aur uske muurti ke puuja karega aur jaanwar ke cheenha aapan maatha ya haath pe rakkhega to yahi rakam hoi.

¹⁰Tumme u waain piye ke paṛi jon Parmeshwar u sab ke dei jon uske gussa karaais hei. Tumme lagi ki u bahut gussa meñ aai, aur tumme aagi aur jarte gandhak (salfa) se sataawa jaai, jab ki pawitr ainjals aur Memna dekhte rahi.

¹¹Agar tum jaanwar aur muurti ke weship karega aur uske naam ke cheenha ke apnaay lega, tab tumme raat aur din sataawa jaai. Tumme sataay waala ke dhuañ hardam uppar jaai aur tum kabhi bhi araam nai kare paayga.

¹²Parmeshwar ke log ke sahe ke waaste seekhe ke paṛi. Ulog ke uske hukum ke maane ke paṛi aur Yeeshu pe biswaas rakkhe ke paṛi.

¹³Tab ham suna swarag se ek awaaj bole hei, “Iske likh leo. Ab se, Prabhu u sab log ke aasheesh dei jon ke mare ke ṭaaim uspe bharosa hei. Aatma jawaab dees, “Haañ, ulog aapan kaṛa kaam se araam kari, aur ulog jon kuchh bhi karin hei uske waaste inaam mili.”

¹⁴Ham ek chamke waala baadar dekha, aur ek Manush ke Laṛka ke rakam koi baadar pe beiṭha raha. U aapan muuṛ pe sona ke taaj pahine raha aur haath meñ ek chok hasua pakṛe raha.

¹⁵Mandir meñ se ek ainjal aay ke chillaais, “Hasua se kaaṭe ke suru karo! Kaaṭe waala seezan aay gay hei, aur dharti ke sab anaaj pak gais hei.”

¹⁶Jon baadar pe beiṭha raha, u aapan hasua ghumaais aur anaaj kaaṭe laga.

¹⁷Swarag ke Mandir meñ se ek aur ainjal ek chok hasua leke aais.

¹⁸Iske baad, ek ainjal jon ke lage aagi pe adhikaar raha, bedi se nikar ke aais aur u ainjal jiske lage hasua raha, uske uppar chillaais. U bolis, “Dharti pe sab añguur pak gais hei! U sab ke aapan chok hasua se kaaṭ leo.”

¹⁹U ainjal dharti pe aapan hasua ghumaais aur sab añguur ke kaaṭ lees. U sab ke ek gaḍḍha meñ feñk dees, jahañ pe Parmeshwar ke gussa dekhaay ke waaste u sab kachra gais.

²⁰U gaḍḍha siṭi se bahire raha, aur jab añguur ke kuchar dewa gay, usman se khuun bahire nikra. U khuun nadi meñ badal gais jon teen sao kilomeeṭa ke lambaai aur ghoṛa ke ḍuube ke baraabar gahira raha.