Read Hindi, Fiji Revelaishan 15 Bible Online

Revelaishan 15 - Hindi, Fiji bible

Revelaishan 15

¹Iske baad, ham asmaan ke bagal dekha aur kuchh adbhut (strange) aur khaas dekhaai dees. Saat ainjals saat aakhri maha trabal ke laawat rahin. Jab i sab khalaas hoy jaai to Parmeshwar kabhi gussa nai hoi.

²Tab ham aagi meñ milaan glaas ke samundar dekha, aur uspe log khaṛa rahin. U wahi log rahin jon jaanwar, muurti aur u namba jon jaanwar ke naam bataat raha uske haraay deen raha. Parmeshwar ulog ke harp dees raha,

³aur ulog wahi gaana gaawat rahin jon uske sewak Maozas aur Memna gaais raha. Ulog eise gaat rahin, “He sarwsaktimaan Prabhu Parmeshwar, tum bahut baṛa aur adbhut kaam kara. Tum sab des ke raaja hei, aur tum wahi karta hei jon sahi aur sachcha hei.

⁴Prabhu, kon tumhaar naam ke jayjaykaar aur baṛaai nai kare hei? Tum akele pawitr hei, aur sab des aai aur tumme weship kari, kaahe ke tum dekhaaya hei ki tum sachchaai se nyaay karta hei.”

⁵Iske baad, ham swarag meñ kuchh aur dekha. Jon seikraḍ tambu Mandir meñ iyuz kara jaay hei, u khul gais hei.

⁶Aur jon saat ainjals maha museebat laawat rahin usman se nikrin. Ulog linan ke ekdam safa aur ujjar raub aur asli sona ke belt pahine rahin.

⁷Chaaro meñ se ek praani u saat ainjals ke ek ek sona ke pyaala dees. U pyaala meñ Parmeshwar ke gussa bhara raha jon hardam ke waaste rahi.

⁸Mandir meñ jaldi se Parmeshwar ke sakti aur mahima ke dhuañ bhar gais. Huañ koi nai aay sakat raha, jab tak u saato ainjals aakhri saat museebat usman giraay ke khalaas nai kar dei.