Read Hindi, Fiji Revelaishan 16 Bible Online

Revelaishan 16 - Hindi, Fiji bible

Revelaishan 16

¹Ham suna ki Mandir ke bhittar se ek awaaj saato ainjals pe chillaais, “Jaao aur Parmeshwar ke gussa ke saato pyaala dharti pe khaali kar deo.”

²Pahila ainjal aapan pyaala dharti pe khaali kar dees. Wahi lage ulog jon ke lage jaanwar ke chhaap raha aur jon muurti ke puuja karat rahin, ulog ke kharaab aur piraay waala ghaao hoy gais.

³Dusra ainjal aapan pyaala samundar meñ khaali karis. Wahi lage samundar mara admi log ke khuun ke rakam hoy gais aur usman jetna jiu jantu rahin, sab mar gain.

⁴Tisra ainjal aapan pyaala nadi aur naara meñ khaali karis. Wahi lage sab khuun meñ badal gais.

⁵Tab ham suna, jon ainjal ke lage paani pe adhikaar hei, bolis, “Tum hardam se raha, aur hardam pawitr Parmeshwar rahega. I rakam nyaay kare ke waaste tumhaar lage adhikaar raha.

⁶Ulog tumhaar log ke aur tumhaar nabi log ke khuun bahaain hei. To tum ulog ke khuun piye ke waaste dia, eisehiyeñ ulog ke hoy ke chaahi!”

⁷Iske baad ham bedi ke pukaar suna, “Haañ, He Sarwshaktimaan Parmeshwar, tumhaar nyaay sachcha aur ṭheek hei.”

⁸Chautha ainjal aapan pyaala suuraj pe giraay dees, aur u log ke aagi ke rakam jaraay laga.

⁹Sab koi etna garam meñ jhaoñs gain, aur sab koi Parmeshwar jon ke i sab museebat pe adhikaar raha, uske saraape lagin. Lekin koi bhi Parmeshwar ke bagal ghuum ke uske baṛaai nai karis.

¹⁰Pañchwa ainjal aapan pyaala u jaanwar ke siñghaasan pe giraay dees. Ekdam wahi lage puura raaj meñ añdhera chhaay gais, aur huañ ke log peeṛa se aapan jeebh kaaṭe lagin.

¹¹Aur ulog aapan peeṛa aur ghaao ke kaaran, swarag meñ jon Parmeshwar raaj kare hei, uske saraapin. Lekin fir bhi ulog aapan bura kaam kare ke nai chhoṛin.

¹²Chhaṭwa ainjal aapan pyaala maha nadi Eufrates meñ khaali kar dees, aur puura ke puura nadi jhuraay gais aur huañ eesṭ ke Raaja log ke waaste ek rasta ban gais.

¹³Dregan ke muh meñ se ek dushṭaatma, jon meḍhak ke rakam raha, nikris. Ek aur dushṭaatma jaanwar ke muh meñ se nikris, aur ek aur jhuuṭa nabi ke muh se nikris.

¹⁴I dushṭaatma ke chamatkaar kare ke sakti raha. Mahaan Parmeshwar ke agaiñsṭ ek sañghe laṛaai kare ke waaste ulog dharti ke sab raaja log ke lage gain. Lekin wahi din Parmeshwar ke waaste jeet ke din hoi.

¹⁵Yaad rakhna Yeeshu kon cheej bolis raha, “Jab ham aayga, to chor ke rakam aayga! Lekin agar tum jaagte aur taiyaar rahega, to Parmeshwar tumme aasheesh dei. Tab tum nañge nai ghuumega aur sarmaayga nai.

¹⁶Sipaahi log ek jagha jon ke Heebru bhaasha meñ Ar-magidon bola jaay hei, huañ baṭurin.

¹⁷Jeise hee satwa ainjal hawa meñ aapan pyaala khaali karis, tab Mandir ke siñghaasan se ek baṛa awaaj sunaai dees, “Hoy gais!”

¹⁸Tab bijli chamkis, baadar garjis, aur sab hisṭri meñ sab se kharaab erthquaik aais.

¹⁹Baibilon ke maha siṭi teen hissa meñ hoy gais, aur sab des ke siṭi gir gain. Tab Parmeshwar Baibilon ke maha siṭi ke u waain ke pyaala piaais jon gussa se bhara raha.

²⁰Sab aaylenḍ miṭ gais aur sab pahaaṛ heraay gain.

²¹Lagbhag pachaas (50) kilo ke ek ek hailstone asmaan se ulog ke uppar gire lagis. Aakhri meñ, log Parmeshwar ke saraape lagin kaahe ke museebat bahut baṛa raha.