Read Hindi, Fiji Revelaishan 17 Bible Online

Revelaishan 17 - Hindi, Fiji bible

Revelaishan 17

¹Saat ainjals meñ se ek ainjal aapan pyaala khaali kar ke hamaar lage aay ke bolis, “Aao! Ham tumme dekhaayga ki Parmeshwar keise u besaram veshya jon bahut se paani pe beiṭhe hei, uske saja dewe hei.

²Dharti ke sab raaja log uske sañghe sutis hei, aur uske besaram chaal se dharti pe rahe waala log nasa meñ hoy gain hei.”

³Aatma ke madat se, ainjal hamme ḍezaṭ meñ le gais, jahañ pe ham ek aurat ke laal jaanwar ke uppar beiṭhe dekha. Saat muuṛ aur das siñg waala jaanwar ke uppar eisan eisan naam likhaan raha jon se Parmeshwar ke ninda hot raha.

⁴U aurat beijani aur laal rang ke kapṛa pahine rahis, aur sona, moti aur keemti patthar ke gahna pahinis raha. Uske haath meñ ek sona ke pyaala raha jisman uske bura bura kaam jon u karis raha, u sab bhara raha.

⁵Uske maatha pe ek anjaan (mysterious) naam likhaan raha, HAM BAIBILON KE MAHA NAGAR HEI, DHARTI KE SAB BURA AUR GHINN WAALA KAAM KE MAIYA HEI.

⁶Ham bataay sakta raha ki u aurat Parmeshwar ke pawitr log jon Yeeshu ke waaste aapan jaan de dees raha ulog ke khuun pee ke nasa meñ rahi. Uske eise dekh ke ham chakit bhaya,

⁷aur u ainjal bolis, Tum kaahe ke etna chakit hei? Ham i aurat aur u saat muuṛ aur das siñg waala jaanwar jis pe u beiṭhis hei, uske baare meñ samjhaayga.

⁸Jon jaanwar ke tum dekha hei, u raha to lekin ab nai hei. U gahira gaḍḍha se aapan binaash ke waaste aay waala hei. Dharti pe rahe waala jon ke naam dunia ke bane se pahile laaif ke buk meñ nai likha raha, ulog ab chakit hoi. Ulog u jaanwar jon kabhi raha aur ab nai hei, lekin fir se lauṭ ke aay jaai, uske dekhi.

⁹Jon koi ke dimaag hei u i baat samajh lei. U saat muuṛ jis pe aurat beiṭhis hei, saat pahaaṛ hei. U muuṛ bhi saat raaja log hei.

¹⁰Usman se paañch raaja mar gain hei. Ek abhi raaj kare hei, ek aur abhi nai aais hei. Lekin jab aai, to khali thoṛa roj raaj kari.

¹¹Tum ek jaanwar ke dekha jon pahile raha aur ab nai hei. U jaanwar u saato meñ se ek raaja hei, jon aṭhwa raaja ke rakam lauṭi lekin naas hoy ke khaatir.

¹²Jon das siñg tum dekha, u aur das raaja log hei, jon abhi tak raaj nai karin hei, aur ulog jaanwar ke sañghe thoṛa ṭaaim ke waaste raaj kari.

¹³U sab ekke rakam soche hei aur aapan sakti aur adhikaar jaanwar ke de dei.

¹⁴I raaja log Memna ke agaiñsṭ laṛaai kari. Lekin u ilog ke haraay dei, kaahe ke wahi sab Raaja ke Raaja aur sab Prabhu ke Prabhu hei. Uske pichchhe chalewaala log chuna gain hei aur khaas aur imaandaar hei.

¹⁵Jon paani tum dekha jis pe veshya beiṭhi rahi, u sab log ke bheeṛ, sab jaati aur bhaasha hei.

¹⁶U das siñg aur jaanwar u besaram aurat se haiṭ kare lagi. Ulog uske kapṛa faaṛ dei aur uske nañga chhoṛ dei. Tab ulog uske gos khaay lei aur uske deñhi ke jetna bacha hei uske aagi meñ feñk dei.

¹⁷Parmeshwar hee hei jon i sab raaja log ke ekke rakam soche ke banaais aur ilog aapan adhikaar jaanwar ke de dei. Aur ilog eise hee karte rahi jab tak jon cheej Parmeshwar bolis hei, sach nai hoy jaai.

¹⁸U aurat jon ke tum dekha hei, u ek baṛa siṭi hei jon dunia ke sab raaja ke uppar raaj kare hei.