Read Hindi, Fiji Revelaishan 18 Bible Online

Revelaishan 18 - Hindi, Fiji bible

Revelaishan 18

¹Ham ek dusra ainjal ke swarag se aate dekha. Iske lage bahut sakti raha, aur uske mahima se dharti chamkat raha.

²Ainjal chillaais, “Gir gais! Maha siṭi Baibilon gir gais aur ab dushṭaatma ke ghar hei. Aur ab sab rakam ke meila aatma aur meila pakchhi aur sab rakam ke meila jaanwar ke aḍḍa ban gais hei.

³Baibilon ke kharaab aur gañda waain sab des ke nasa meñ kar dees hei. Sansaar ke sab raaja log uske sañghe sutis raha, aur dunia ke sab vyaapaari uske bura chaahat ke kaaran dhani hei.”

⁴Tab ham swarag se dusra awaaj ke chillaate suna, “Hamaar log, tumme Baibilon se bache ke hei. Uske paap meñ bhaag nai leo aur uske saja nai baaṭo.

⁵Uske paap asmaan tak lada hei. U jon sab kharaab kaam karis raha Parmeshwar u sab ke yaad karis.

⁶Uske sañghe wahi rakam karo jeise u dusra ke sañghe karis hei. Jeisan kaam u karis hei uske dugna saja uske deo. Jon cheej milaay ke u dusra ke piyaais hei uske usse dugna piye ke deo.

⁷U aurat apne aap ke jeewan meñ sab sukh paay ke bitaais. Ab uske dukh aur peeṛa sahe ke inaam deo. “Uske dil ke gahraai meñ Baibilon bolis, ‘Ham Raani hei! Ham kabhi bhi bidhwa nai hoyga ya jaane paayga ki dukhi hoy ke matlab kaa hei.’

⁸Aur tab, u peeṛa, dukh, bhuuk aur maran ekke roj meñ sahi. Uske mara deñhi ke aagi naas kar dei, kaahe ke uske nyaay kare waala Mahaan Prabhu Parmeshwar hei.”

⁹Dharti ke sab raaja log jon jon uske sañghe sutin raha aur uske sab sukh baaṭin raha, ulog dukh manaai. Jab ulog u aagi meñ se dhuañ dekhi to roi.

¹⁰Uske dukh aur peeṛa se ulog ḍari, aur duur khaṛa hoyke ulog boli, “Haay! Haay! he mahaan aur sakti shaali Baibilon ke siṭi! Ek ghañṭa meñ tumme saja mil gais.”

¹¹Dharti ke ek ek saudaagar roi, kaahe ke ab koi bhi uske maal nai khareedi.

¹²Koi bhi ulog ke sona, chaañdi, gahna, moti, achchha kapṛa, beijani kapṛa, silk, laal kapṛa, achchha mahke waala lakṛi, haathi ke daañt aur lakṛi ke banaawal cheej, aur iske sañghe peetal, loha aur maabal ke bana cheej nai khareedi.

¹³Koi bhi ulog ke daalcheeni, masaala, agarbatti, itr, lohbaan aur waain, oliv ke tel, geñhu, aaṭa, gaay-beil, bheṛ-bakri, ghoṛa, rath, gulaam, aur baaki manush nai khareedi.

¹⁴Baibilon, jon sab cheej tum chaahta raha u sab tum se bach ke duur chala gais hei. Tumhaar puura mahima aur sab sukh de waala cheej hardam ke waaste gaayab hoy gais hei. Tum kabhi bhi fir se u sab ke nai paayga.

¹⁵Uske kaaran sab saudaagar dhani hoy gain hei. Lekin jab ulog uske dukh dekhin to ḍar gain. Ulog duur khaṛa hoy ke, rowat aur dukhi hot rahin.

¹⁶Tab ulog chillaain, “Haay! Haay! Baibilon ke mahaan siṭi! Jon sundar kapṛa aur beijani aur laal rang ke kapṛa pahinat rahi. Uske gahna sona aur mahañga patthar aur moti ke rahat raha.

¹⁷Fir bhi ghañṭa bhar meñ uske sab dhan naas hoy gais.” Jahaaj ke kepṭan aur yaatri, aur u sab log jon samundar meñ biznes karat rahin, sab duur khaṛa hoy gain.

¹⁸Jab ulog uske aagi ke dhuañ dekhin to chillaain, “I siṭi sab se mahaan raha!”

¹⁹Ulog jor jor se roin, aur aapan dukh meñ aapan muuṛ pe raakhi bahaain aur bolin, “Haay! Haay! Baibilon ke mahaan nagri! Jon koi bhi i samundar se gujrin, iske dhan se dhani hoy gay rahin. Lekin ek ghañṭa meñ puura siṭi naas hoy gais raha.

²⁰Swarag aur pawitr log prerit aur nabi log i sab se khusi hoy ke chaahi. Parmeshwar ulog ke waaste iske saja de dees hei.”

²¹Tab ek balwaan ainjal ek baṛa se patthar uṭhaay ke samundar meñ feñk dees. Ainjal bolis, “Yahi rakam Baibilon ke mahaan nagri feka jaai, aur fir se kabhi nai khaṛa hoi.

²²Aur tum meñ bina bajaay aur gaana gaay waala baañsuri bajaay aur bigul fuuke waala log ke kabhi nai sunaay dei. Koi bhi kaam kare waala i siṭi meñ aapan dukaan nai kholi, aur chakki peese ke awaaj kabhi bhi sunaay nai dei.

²³Baibilon meñ koi bhi jagha batti nai bari, aur dulha dulhin huañ saadi nai kari. Uske saudaagar dunia pe raaj karin, aur uske jaadu se u sab des ke pagla banaain.

²⁴Baibilon ke saṛak pe nabi log ke Parmeshwar ke log ke aur baaki log ke khuun paawa gais.”