Read Hindi, Fiji Revelaishan 19 Bible Online

Revelaishan 19 - Hindi, Fiji bible

Revelaishan 19

¹Iske baad, ham swarag meñ maano bahut jan ke awaaj suna, aur ulog chillaat rahin, “Prabhu ke Jay! Ham log ke Parmeshwar ke lage bachaay ke waaste mahaan sakti hei,

²kaahe ke uske nyaay sachcha aur feya rahe hei. U meili veshya aapan saramnaak kaam se dharti ke naas kar dees hei. Lekin Parmeshwar uske nyaay karis hei aur uske sewak log ke khuun ke badla lewe ke khaatir uske daam bhare ke paṛa.”

³Tab bheeṛ chillaais, “Prabhu ke Jay! Uske jarte deñhi se dhuañ nikre ke kabhi band nai hoi.”

⁴Iske baad, chaubees (24) baṛkuan aur chaar jinda praani, sab siñghaasan ke saamne ghuṭna ṭek ke uske weship kare lagin. Ulog bolin, “Aameen! Prabhu ke Jay!”

⁵Siñghaasan se ek awaaj bolis, “Agar tum weship karega aur hamaar Parmeshwar se ḍarega, to uske baṛaai karo chaahe tum jon koi bhi ho.”

⁶Tab ham suna, jeise ek baṛa bheeṛ jon bharbhaṛaate baaṛh aur garajte baadar ke rakam ek sañghe mil gain hei. Ulog bolat rahin, “Prabhu ke Jay! Ham log ke Mahaan Prabhu Parmeshwar ab raaja ke rakam raaj kare hei.

⁷To ham log aanand aur khusi hoy ke aur uske baṛaai karega. Memna ke saadi ke din aay gais hei, aur uske dulhin taiyaar hei.

⁸Uske chamke waala, ujjar aur linan se banaawal dulhin ke dres dewa jaai. I linan ke matlab hei u sab achchha cheej jon Parmeshwar ke log karin hei.”

⁹Tab u ainjal hamme bataais, “Iske likho. Parmeshwar u sab ke aasheesh dei jon ke Memna ke saadi meñ bulaawa gais hei.” Ainjal i bhi bolis, “I sab cheej jon Parmeshwar bolis hei, sab sach hei.”

¹⁰Ham ainjal ke goṛ pe gir paṛa aur uske weship kare laga. Lekin ainjal bolis, “I nai karo! Ham ek naukar hei, ṭheek tumhaar aur sab ke rakam jon Yeeshu ke baare meñ parchaar kare hei. Parmeshwar ke chhoṛ ke aur koi ke weship nai karo. Jon koi bhi Yeeshu ke baare meñ bataay hei, u Aatma ke sakti se kare hei.”

¹¹Ham dekha ki swarag khula hei, aur ek ujjar ghoṛa huañ pe hei. Uske sawaar ke "Sach aur Faitful" bola jaat raha, aur u hardam feya rahe hei jab u koi ke nyaay kare hei ya laṛaai pe jaay hei.

¹²Uske aañkhi aagi ke flaims ke rakam raha, aur u bahut se taaj pahinis raha. Uske naam uspe likhaan raha, lekin khali wahi jaanat raha ki uske naam ke matlab kaa hei.

¹³U sawaar jon kapṛa pahinis raha u khuun se ḍuba raha, aur uske i naam se jaana jaat raha, “Parmeshwar ke Vachan.”

¹⁴Swarag ke sena log ekdam ujjar linan ke kapṛa pahin ke uske pichchhe chalat rahin.

¹⁵Uske muh se ek chok talwaar nikar ke sab jaati ke log ke aṭek karis. U loha ke ḍañḍa se raaj kari aur Mahaan Parmeshwar ke gussa, u gaḍḍha meñ jahañ waain bane hei, graip ke kachar ke dekhaai.

¹⁶Uske kapṛa aur jaañgh pe i naam likhaan rahi, “RAAJAAOÑ KE RAAJA AUR PRABHUOÑ KE PRABHU”

¹⁷Tab ham ek ainjal ke dekha jon suuraj pe khaṛa raha, aur u asmaan meñ jetna chiṛia uṛat rahin u sab pe chillaais, “Aao aur Parmeshwar ke baṛa bhoj meñ bhaag leo!”

¹⁸Tum raaja, agua, leeḍas, ghoṛa, sawaar, aajaad log, naukar log, khaas log aur sab koi ke gos khaay sakta hei.”

¹⁹Ham jaanwar aur dharti ke sab raaja log ke bhi ek sañghe hote dekha. U sab u ujjar ghoṛa ke sawaar aur uske sena log se laṛaai karin.

²⁰Lekin u jaanwar aur sab jhuuṭa nabi pakṛaay gain. I wahi nabi hei jon jaanwar ke waaste chamatkaar karis raha, ki jisse u sab ke pagla banaai jon sab ke lage jaanwar ke cheenha raha aur muurti ke puuja karat rahin. Jaanwar aur jhuuṭa nabi jinde ek sañghe jarte salfa ke nadi meñ feñk dewa gais.

²¹Lekin baaki sena, talwaar se maara gain jon ghoṛa ke sawaar ke muh se nikris raha. Chiṛia log mara boḍi pe khuub maja uṛaain.