Read Hindi, Fiji Revelaishan 2 Bible Online

Revelaishan 2 - Hindi, Fiji bible

Revelaishan 2

¹Yahi hei jon tumme Efisus chech ke ainjal ke lage likhe ke hei, Hamahi hei jon aapan raaiṭ haath meñ saat taara pakṛa hei, aur ham saat sona ke lempsṭenḍ ke beech meñ chalta hei. Suno ham kon cheej bolta hei.

²Ham u sab janta hei jon tum kara hei, u sab kaṛa kaam bhi aur keise tum sab saha hei. Ham janta hei ki tum koi bhi kharaab log ke saath nai dega. Jab koi koi priṭenḍ kare ki u log prerit hei, tab tum ulog ke ṭesṭ kara aur dekha ki u log jhuuṭṭa hei.

³Tum log hamaar khaatir dukh uṭhaaya aur kaṛa ṭaaim se gujra, aur haar bhi nai maana.

⁴Lekin tumhaar agaiñsṭ hamaar lage kuchh hei! Aur u i hei, ki tumhaar lage otna prem nai hei jetna pahile raha.

⁵Socho tumse kahañ bhuul hoy gais hei, aur sudhre ke kosis karo jeise tum pahile kara raha. Agar tum nai sudhrega, to ham aay ke tumhaar lempsṭenḍ leke chala jaayga.

⁶Lekin ek cheej hei jon tum raaiṭ karta hei. Nikulitans jon kuchh kare usse tum haiṭ karta hei, aur ham bhi.

⁷Agar tumhaar lage kaan hei, to suno Aatma kon cheej sab chech se bole hei. Jon ke jeet hoi, u sab ke ham laaif dewe waala peṛ jon Parmeshwar ke sundar gaaḍan meñ hei, usman se khaay ke dega.

⁸Tumme Smurna ke chech ke ainjal ke lage yahi likhe ke hei. Ham pahila aur aakhri hei. Ham mar gay raha, lekin ab ham jinda hei! Suno ham jon kuchh bolta hei.

⁹Ham janta hei ki tum ketna dukh uṭhaaya aur tum ketna gareeb hei, lekin tum dhani hei. Ham janta hei ki jon log apne aap ke Yahuudi bole hei, tumhaar baare meñ ketna ninda karin. Lekin ulog asal meñ Yahuudi nai hei. Ulog ek grup hei jon Saitaan ke hei.

¹⁰Wari nai karna ki tum dukh uṭhaayga. Saitaan tum meñ se kuchh log ke jel meñ bhej dei, aur tumme das din tak parkha jaai aur dukh uṭhaay ke paṛi. Lekin agar tum jab tak marega nai, tab tak imaandaar rahega, to ham tum log ke ek bahut sundar laaif dega.

¹¹Agar tum log ke kaan hei, to suno Aatma sab chech se kaa bole hei. Jon koi bhi jeet jaai, uske dusra maut se koi dukh nai hoi.

¹²Pergamum ke chech ke ainjal ke lage yahi likhe ke hei, Hamahi hei jon ke lage dui dhaari talwaar hei! Suno ham kaa bolta hei.

¹³Ham janta hei tum wahiñ rahta hei jahañ saitaan ke siñghaasan hei. Lekin tum hamaar naam pe ṭika hei. Ṭheek huañ jahañ saitaan rahe hei, wahiñ se Antipas naam ke hamaar imaandaar gawaah ke le jaawa gay raha aur uske jaan se maar dewa gay raha. Fir bhi tum ham pe biswaas kare ke nai chhoṛa.

¹⁴Hamaar lage tumhaar agaiñsṭ kuchh hei. Tum meñ se kuchh log Balaam ke ṭeeching maanta hei. Bahut din pahile u Balak ke bataais raha ki Israayel ke log ke sikhaao ki muurti pe chaṛhaawal khaana khaawe aur kharaab kaam kare (sekshual).

¹⁵Ab tum meñ se kuchh log Nikulitans ke ṭeeching pe chalta hei.

¹⁶Pichchhe lauṭo! Agar nai lauṭega, to ham jaldi aay ke eisan log se laṛaai karega. Aur hamaar baat talwaar ke rakam kaaṭi.

¹⁷Agar tum log ke lage kaan hei to suno ki Aatma sab chech se kaa bole hei. Sab koi jon jeet gais hei, ulog ke ham kuchh chhipaan khaana dega. Ham u sab log ke ek ek ujjar patthar dega jispe ek nawa naam likhaan rahi. Aur koi u naam nai jaane paai, khali u jaani jon ke patthar dewa gais raha.

¹⁸Yahi hei jon tumme Thuaateera ke chech ke ainjal ke lage likhe ke hei, Ham Parmeshwar ke Laṛka hei! Hamaar aañkhi aagi ke flaims ke rakam hei, aur hamaar goṛ bronze ke rakam hei. Suno ham kon cheej bolta hei.

¹⁹Ham tumhaar baare meñ sab kuchh janta hei, tumhaar prem, biswaas, sewa, aur keise tum dukh uṭhaaya hei. Ham janta hei ki ab tum pahile se bahut jaada karta hei.

²⁰Lekin Jezebel naam ke aurat ke kaaran tumhaar agaiñsṭ hamaar lage kuchh hei. U apne aap ke ek nabi bole hei, aur tum uske i sikhaay deta hei aur hamaar sewak ke bahkaay deta hei ki ulog ganda kaam kare aur muurti pe chaṛhaawal khaana khaay.

²¹Ham uske ek mauka dia raha ki aapan paap se ghuum jaay, lekin u ganda kaam kare se nai rukis.

²²Ham Jezebel ke maar dega. Jon koi bhi uske sañghe eisan ganda kaam kari, u sab ke bhi saja mili, agar ulog i sab kaam kare ke band nai kari.

²³Ham uske biswaasi log ke bhi maar dega. Tab sab chech dekhi ki ham sab ke soch aur man ke bichaar ke janta hei. Ham ek ek ke sañghe weisaiyeñ karega jeise kare ke chaahi.

²⁴Thuaateera meñ tum meñ se kuchh log Jezebel ke ṭeeching nai maanta hei. Tum log kuchh nai janta hei ki uske biswaasi log kon cheej ke, “Saitaan ke gahira bhed” bole hei. To ham tumme aur komaañḍ se nai laadega.

²⁵Lekin jab tak ham nai aayga, tab tak jon ṭeeching tumme mila hei, uske kas ke pakṛe rahna.

²⁶Jon koi bhi jeeti aur aakhri tak hamaar baat maani, ham u sab ke puura jaati ke uppar sakti dega.

²⁷Ham ek ek ke wahi sakti dega jon hamaar Pita hamme dees hei. Ulog puura jaati log ke ek loha ke chhaṛi se raaj kari aur u des ke maṭṭi ke ghaṛa (clay poṭ) ke rakam foṛ dei. Ham ulog ke sabere ke taara bhi dega.

²⁹Agar tum log ke lage kaan hei, suno Aatma kon cheej chech ke bole hei.