Read Hindi, Fiji Revelaishan 21 Bible Online

Revelaishan 21 - Hindi, Fiji bible

Revelaishan 21

¹Ham ek nawa asmaan aur nawa dharti dekha. Pahila asmaan aur pahila dharti heraay gais aur koi samundar bhi nai bacha.

²Tab ham u pawitr siṭi, nawa Yarushalam ke Parmeshwar ke lage se swarag se aate dekha. U eise sajis raha jeise ek dulhin aapan pati ke mile ke waaste sajis hei.

³Siñghaasan se ham ek awaaj jor se chillaate suna, Parmeshwar ke ghar ab uske aapan log ke sañghe hei. U wahi log ke sañghe rahi, aur ulog wahi ke rahi. Haañ, Parmeshwar aapan ghar aapan log meñ banaai.

⁴Ulog ke aañkhi se aañsu wahi pochhi, aur huañ kabhi maut, museebat, peeṛa aur rona nai rahi. I sab puraana jamaana ke baat ab hardam ke khaatir chala gais hei.

⁵Tab u jon siñghaasan pe beiṭha raha, bolis, Ham sab cheej nawa kar dia hei. Jon cheej ham bola hei u sab likho. Hamaar vachan sach hei aur biswaas kare laayk hei.

⁶Sab kuchh khatam hoy gais hei! Ham Alfa aur Omega hei, suru aur ant. Jon pyaasa hei, uske ham jeewan ke jal ke sota se free meñ paani piaayega.

⁷Jon koi baaji jeet lei, ulog ke aasheesh dega. Ham ulog ke Parmeshwar rahega, aur ulog hamaar aapan log rahi.

⁸Lekin jon log ḍarpok hei, aur u sab log jon imaandaar nai hei, kharaab soche waala log hei, jon jaan se maar dewe hei, ya kharaab kaam kare hei, jaadu kare hei, muurti ke puuja kare hei, ya jhuuṭa hei, ham bataayga ki ulog ke kaa hoi. Ulog ke aagi aur salfa ke kuñḍ meñ feñk dewa jaai. I dusra maut hei.

⁹Ham saat ainjals meñ se ek ke dekha jiske lage saat aakhri bhayaanak trabals se bhara pyaala raha. U ainjal hamaar lage aay ke bolis, “Aao! Ham tumme dulhin, yaane ke Memna ke waaif ke dekhaayga.”

¹⁰Tab Aatma ke madat se, u hamme ek bahut uucha pahaaṛ ke uppar le gais. Tab u hamme pawitr siṭi Yarushalam dekhaais jon swarag se Parmeshwar ke lage se aat raha.

¹¹Parmeshwar ke mahima u siṭi ke braaiṭ banaay dees. U ek mahañga patthar ‘jasper’ ke rakam ekdam ujjar chamkat raha.

¹²U siṭi ke baarah gaiṭ raha aur uske diwaar moṭa aur uucha raha, aur ek ek gaiṭ pe ainjal pahra det rahin. Ek ek gaiṭ pe Israayel ke baarah ṭraaib ke naam likhaan raha.

¹³Isman se teen gaiṭ eesṭ meñ raha, teen noth meñ raha, teen aur saauth meñ raha, aur baaki teen wesṭ meñ raha.

¹⁴U siṭi baarah faaunḍeishan patthar pe bana raha. Ek ek patthar pe Memna ke baarah prerit ke naam likhaan raha.

¹⁵Jon ainjal ham se baat karis raha, uske lage siṭi aur uske gaiṭ aur diwaar naape ke waaste sona ke naape waala sṭik raha.

¹⁶Siṭi ek kiub (cube) ke rakam bana raha, kaahe ke u otna uucha raha jetna chauṛa raha. Jab ainjal log siṭi ke naapin, tab u pandra (15) sao meel uucha aur pandra sao meel chauṛa raha.

¹⁷Tab ainjal diwaar naapis, aur ham log ke naap ke mutaabik u kareeban dui sao solah (216) feet uucha raha.

¹⁸Diwaar ek mahañga patthar (jasper) ke bana raha, aur siṭi asli sona ke bana raha, jon safa glaas ke rakam raha.

¹⁹U siṭi ke baarah faaunḍeishan ke patthar sab rakam ke mahañga patthar raha. Pahila jasper (clear) raha, dusra sapphire (blue), tisra agaiṭ (brown aur waaiṭ), chautha emerald (green),

²⁰pañchwa onyx (striped), chhaṭwa carnelian (red), satwa chrysolite (golden), aṭhwa beryl (blue/green) nauwa topaz (yellow), daswa chrysoprase (apple green), gyaarawa jacinth (reddish orange), aur baarahwa amethyst (purple) raha.

²¹Baarah gaiṭ baarah soliḍ moti ke raha. Siṭi ke rasta asli sona ke bana raha, aur glaas ke rakam raha.

²²Ham huañ pe Mandir nai dekha. Maha Shaktiwaala Prabhu Parmeshwar aur Memna uske Mandir rahin.

²³Aur siṭi ke chaañd aur suuraj ke jaruurat nai raha. Parmeshwar ke mahima uspe chamkat raha, aur Memna uske laaiṭ raha.

²⁴Sab jaati ke log u siṭi ke laaiṭ meñ chali, aur raaja log aapan khajaana usman laai.

²⁵Uske gaiṭ din bhar khula rahat raha, aur raat kabhi nai aat raha.

²⁶Sab jaati ke mahaan khajaana u siṭi meñ laawa jaai.

²⁷Lekin koi bhi apawitr cheej usman nai aay saki. Koi bhi jon kharaab kaam kari ya jhuuṭ boli huañ nai rahi. Khali wahi jon ke naam Memna ke jeewan ke buk meñ likhaan hei, wahi siṭi meñ rahi.