Read Hindi, Fiji Revelaishan 3 Bible Online

Revelaishan 3 - Hindi, Fiji bible

Revelaishan 3

¹Sardis ke chech ke ainjal ke lage yahi likhe ke hei, Hamaar lage Parmeshwar ke saat aatma aur saat taara hei. Suno ham kon cheej bolta hei. Ham janta hei tum kon cheej karta hei. Sab koi sochi ki tum jinda hei, lekin tum mara hei.

²Jaago! Tumhaar lage khali thoṛa taagat bacha hei, aur u bhi ekdam jaay waala hei. To taagatwaala bane ke kosis karo. Hamme pata laga ki tum ekdam se Parmeshwar ke baat nai maanta hei.

³Yaad rakkho jon tumme sikhaawa gay raha aur tum suna raha. Uske kas ke pakṛe raho aur aapan paap se haṭ jaao. Agar tum nai jagega, to ham tab aayga jab tum taiyaar nai rahega, jeise ek chor kare hei.

⁴Tum Sardis log meñ se kuchh log paap se aapan kapṛa nai meila kara hei. Tum hamaar sañghe ujjar kapṛa pahin ke chalega, kaahe ke tum iske laayk hei.

⁵Sab jon jeet jaai, u ujjar kapṛa pahini. Ulog ke naam laaif ke buk meñ se nai miṭi, aur ham aapan Pita aur uske ainjals se bolega ki i log hamaar biswaasi hei.

⁶Agar tumhaar lage kaan hei to suno ki Aatma chech se kaa bole hei.

⁷Filadelfia ke chech ke ainjal ke lage yahi likhe ke hei, Hamahi hei jon pawitr aur sachcha hei, aur hamaar u chaabhi hei jon Ḍeiviḍ ke raha. Jab ham palla kholega, tab uske koi nai band kare saki. Aur jab ham palla band kar dega to uske koi khole nai saki. Suno, ham kon cheej bolta hei.

⁸Ham u sab janta hei ki tum kaa kara hei. Aur ham tumhaar aage ek khula palla rakkha hei jon ke koi band nai kare sake hei. Tum kamjor raha, lekin hamaar sandes ke maana aur naa nai kara ki tum hamaar biswaasi log hei.

⁹Ab tum dekhega ki ham ilog ke kaa karta hei jon Saitaan ke grup ke hei. Ilog bole hei ki ilog Yahuudi hei, lekin ilog jhuṭṭa hei. Ham ilog ke laayga aur tumhaar aage ghuṭna ṭekaayga. Tab ilog jaani ki ham tum se prem karta hei.

¹⁰Tum hamaar sandes suna aur dukh uṭhaaya. To ham tum log ke parkhe ke ṭaaim, jisman se dunia ke sab log ke jaay ke hei, usse bachaayga.

¹¹Ham jaldi aay waala hei. To jon tumhaar lage hei, uske kas ke pakṛo, aur tumhaar lage se koi bhi u taaj nai le jaai jon tumme inaam ke ruup meñ dewa jaai.

¹²Jon koi bhi jeeti, ulog ke hamaar Parmeshwar ke Mandir meñ ek khamba banaawa jaai, aur ulog huañ hardam ke waaste rahi. Ham ek ek ke uppar aapan Parmeshwar ke naam aur uske ṭaaun ke naam likh dega. I nawa Yarushalam hei jon hamaar Parmeshwar swarag se bheji. Ham ulog ke uppar bhi aapan nawa naam likh dega.

¹³Agar tumhaar lage kaan hei to suno, Aatma chech se kaa bole hei.

¹⁴Laodeekia ke chech ke ainjals ke lage yahi likhe ke hei, Ham hei jon ke Aameen bola jaay hei! Ham imaandaar hei aur Parmeshwar jon cheej banaais hei uske sachcha gawaahi aur suruwaat hei. Suno, ham kon cheej bolta hei.

¹⁵Ham u sab janta hei jon tum kara hei, aur tum naa to ṭhañḍa hei naa garam. Achchha hota ki tum isman se ek hota.

¹⁶Lekin jab ki tum gungun hei aur naa hee garam ya thañḍa, to ham tumme aapan muh se thuuk deta hei.

¹⁷Tum bolta hei ki tum dhani hei aur kaamyaab hei aur tumhaar lage sab cheej hei jon ke tumme jaruuri hei. Lekin tum nai janta ki tum ketna kañgaal hei. Tum gareeb, dukhi, añdha, aur nañga hei.

¹⁸Aapan sona ham se khareedo. U aagi meñ taapa gay hei, aur i tumme dhani banaai. Ham se ujjar kapṛa khareedo. Uske pahino aur aapan saramnaak nañgaapan ke chhupaay leo. Aapan aañkhi ke waaste dawaai khareedo, ki jisse tum dekhe sako.

¹⁹Ham jon se prem karta hei uske saja deta hei aur sudhaarta hei. To aapan maainḍ banaao aur paap se ghuum jaao.

²⁰Suno! Ham duaari pe khaṛa hei aur nok karta hei. Agar tum hamaar awaaj sune sakta hei to palla kholo, ham bhittar aayga aur ham log ek sañghe khaana khaayga.

²¹Jon koi bhi jeet jaai, u hamaar siñghaasan pe hamaar sañghe beiṭhi, jeise ki jab ham jeeta raha to aapan Pita ke sañghe uske siñghaasan pe beiṭha raha.

²²Agar tumhaar lage kaan hei to suno, Aatma chech se kaa bole hei.