Read Hindi, Fiji Revelaishan 6 Bible Online

Revelaishan 6 - Hindi, Fiji bible

Revelaishan 6

¹Wahi ṭaaim jab ham dekha ki Memna pahila muhar khole hei, ham suna ki chaar jinda praani meñ se ek eise chillaais jeise ki baadar garjis. U bolis, “Bahire aao!”

²Tab ham ek ujjar ghoṛa ke dekha. Aur jon uspe beiṭha raha, ek dhanush liye raha aur uske ek taaj mila. U abhi tak khaafi jeet lees raha aur aage bhi jeete ke waaste chala gais.

³Jab Memna dusra muhar kholis, ham suna ki dusra jinda praani bolis, “Bahire aao!”

⁴Tab ek aur ghoṛa aais. U ekdam laal raha. Uspe jon beiṭhis raha, uske sakti mila ki dharti se puura saanti le lewe, ki jisse u ek dusra ke jaan se maar dewe. Uske ek talwaar bhi dewa gais raha.

⁵Jab Memna tisra muhar kholis, ham suna ki tisra jinda praani bolis, “Bahire aao!” Tab ham kariya ghoṛa dekha, aur jon uspe beiṭha raha uske ek haath meñ taraaju (balance scale) raha.

⁶Ham u chaaro praani ke beech meñ koi ke i bolte suna, “Ek kilo geñhu tum log ke ek din ke talab ke keemat meñ mili! Teen kilo barley bhi tum log ke ek din ke talab ke keemat meñ mili. Lekin oliv ke tel aur waain ke haani nai karo.”

⁷Jab Memna chautha muhar kholis, ham suna ki chautha praani bole hei, “Bahire aao!”

⁸Tab ham ek halka green ghoṛa ke dekha. Jon uspe sawaar raha uske naam Maut raha, aur Maut ke raaj uske pichchhe pichchhe aais. Ulog ke dharti pe ek chauthaai (chaar hissa) sakti mila, aur ulog sab ke talwaar se, jhuura se, bimaari se aur jañgli jaanwar se maare sakat rahin.

⁹Jab Memna pañchwa muhar kholis, tab ham bedi ke nichche u sab ke praan ke dekha jon Parmeshwar ke sandes sunaay ke waaste aur aapan biswaas ke baare meñ sachche bole pe maara gain raha.

¹⁰U sab chillaain, “E pawitr aur sachcha Prabhu! Ketna din lagi jab tum dharti ke ulog ke jon hamme maarin hei, ulog ke nyaay kar ke saja dega?”

¹¹Tab jon jon log maara gain raha, ulog ke ujjar raub dia gais aur bataawa gay ki thoṛa deri ke waaste araam kar lewe. Ulog ke waiṭ kare ke paṛi jab tak Prabhu ke sab sewak log maar nai dewa jaai.

¹²Jab ham dekha ki Memna chhaṭwa (6th) muhar khole hei, tab ham taaka aur ek bhayankar erthquaik dekha. Suuraj kariya hoy gais aur chaañd khuun ke rakam laal hoy gais.

¹³Asmaan ke taara jameen pe gir paṛa, jeise ki ek aañdhi meñ anjeer ke kachcha fal jameen pe gir paṛa hei.

¹⁴Tab asmaan skrol ke rakam lapṭaay gais, aur sab pahaaṛ aur aaylenḍ aapan aapan jagha se haṭ gain.

¹⁵Dharti ke raaja log, naami log, aur aami ke agua log sab jaay ke kaivs meñ ya pahaaṛ ke patthar ke pichchhe luk gain. Dhani, taagatwaala log aur naukar aur ajaad log sab ek sañghe huañ lukin raha.

¹⁶Tab ulog pahaaṛ aur patthar se chillaay ke bolin, “Ham log ke uppar giro! Jon siñghaasan pe beiṭha hei aur Memna ke gussa se ham log ke lukaay leo.

¹⁷U bhayaanak roj aay gais hei! Parmeshwar aur Memna duuno aapan gussa dekhaai, aur kon ulog ke saamna kari?”