Read Hindi, Fiji Revelaishan 8 Bible Online

Revelaishan 8 - Hindi, Fiji bible

Revelaishan 8

¹Jab Memna satwa (7th) muhar kholis, tab swarag meñ aadha ghañṭa tak ek saaylans chhaay gais.

²Ham dekha ki jon ainjals Parmeshwar ke saamne khaṛa rahin, ulog ke ek ek bigul dewa gais.

³Dusra ainjal, jon ke lage sona ke bartan meñ agarbatti raha, aay ke bedi ke bagal meñ khaṛa hoy gais. Iske bahut se agarbatti dewa gais ki u sona ke bedi pe, siñghaasan ke aage Parmeshwar ke log ke saathe preya kare hei.

⁴Tab agarbatti ke dhuañ, aur log ke preya ek saathe, ainjal ke haath se Parmeshwar ke lage gais.

⁵Iske baad, ainjal agarbatti ke bartan meñ bedi se aagi bharis, aur jameen pe feñk dees. Baadar garjis, bijli chamkis, aur dharti hilis.

⁶Saato ainjals bigul bajaay ke waaste taiyaar hoy gain.

⁷Jab pahila ainjal bigul bajaais, tab hail aur aagi, jon khuun se mila raha, dharti pe feka gais. Dharti ke ek tihaai, (3rd) peṛ, aur ek tihaai hariar graas jar gais.

⁸Jab dusra ainjal aapan bigul bajaais, to jeise aagi meñ jarte baṛa pahaaṛ ke rakam koi cheej samundar meñ chhoṛ dewa gais raha. Samundar ke ek tihaai khuun meñ badal gais,

⁹samundar meñ ek tihaai jinda praani jar ke bhasam hoy gain, aur ek tihaai jahaaj naas hoy gain.

¹⁰Jab tisra ainjal bigul bajaais, ek baṛa taara asmaan se gira. U ṭoch ke rakam barat raha, aur u tisra nadi pe aur tisra paani ke sota pe gira.

¹¹U taara ke naam Kaṛuwaahaṭ raha, aur ek tihaai paani kaṛua hoy gais. Bahut se log mar gain kaahe ke paani etna kaṛua raha.

¹²Jab chautha ainjal aapan bigul bajaais, suuraj ke ek tihaai, chaañd ke ek tihaai, aur taara ke ek tihaai pe museebat aais. Jisse i sab ke ek tihaai laaiṭ chala gais. To din ke ek tihaai ṭaaim laaiṭ nai raha, aur ek tihaai raat bhi bina laaiṭ ke raha.

¹³Tab ham dekha ki ek akela baaj asmaan meñ uṛe hei. U chillaay ke bole hei, “Dharti pe sab log pe museebat, museebat, museebat! Teen aur ainjals log aapan aapan bigul bajaay jaay hei.”