Read Hindi, Fiji Revelaishan 9 Bible Online

Revelaishan 9 - Hindi, Fiji bible

Revelaishan 9

¹Jab pañchwa (5th) ainjal aapan bigul bajaais, ham ek taara dekha, jon asmaan se dharti pe gira. Uske ek tunnel ke chaabhi dewa gais jon gahira gaḍḍha ke bagal jaat raha.

²Jeise u taara chaabhi se tunnel kholis, ek baṛa aagi ke dhuañ ke rakam dhuañ aay laga. Suuraj aur hawa dhuañ ke kaaran kariya hoy gais.

³I dhuañ meñ se ṭiḍḍi (locust) nikris aur dharti pe chhaay lees. Ulog ke eisan sakti dewa gais jon dharti pe bichchhu ke mila hei.

⁴Ṭiḍḍi ke bataawa gais raha ki ulog naa to dharti pe ghaas, aur naa to koi hariyar cheej aur naa to koi peṛ ke haani pahuñchaai, lekin u khali log ke haani pahuñchaai jon ke maatha pe Parmeshwar ke muhar nai hei.

⁵U ṭiḍḍi ke koi ke maare ke nai raha, lekin paañch mahina tak ulog ke kaṛa se kaṛa peeṛa sahe ke dewe ke raha. Ulog ke peeṛa eisan hoy ke rahi jeisan bichchhu ke kaaṭe se hoy hei.

⁶U ṭaaim pe log mare maañgi, lekin ulog nai mare paai. Ulog maut maañgi, lekin maut bhi ulog se duur chala jaai.

⁷U tiḍḍi, laṛaai karewaala ghoṛa ke rakam rahin. Ulog muuṛ pe sona ke taaj ke rakam kuchh pahinis raha, aur ulog ke muh insaan ke rakam raha.

⁸Ulog ke baar aurat ke baar ke rakam lamba raha, aur ulog ke daañt, sher ke daañt ke rakam raha.

⁹Ulog chhaati pe loha ke kawach (armour) pahine rahin. Ulog ke pañkha ke awaaj jeise laṛaai meñ jaay waala rath jon ke bahut se ghoṛa dauṛaay ke le jaawat rahin, weise raha.

¹⁰Ulog ke puuchh bichchhu ke puuchh ke rakam raha. Usman ḍañk (sting) raha jon log ke paañch mahina peeṛa dewe sakat raha.

¹¹Ulog ke raaja ek ainjal raha jon gahira kuñḍ ke inchaaj raha. Heebru bhaasha meñ uske naam “Abaddon” aur Greek meñ “Apullyon” raha i duuno ke matlab “Naas” hei.

¹²Sab se pahila museebat abhi hoy gais hei! Lekin ruko. Dui aur museebat jaldi hee hoy waala hei.

¹³Tab chhaṭwa (6th) ainjal aapan bigul bajaais. Ham ek awaaj suna jon sona ke bedi jon Parmeshwar ke saamne raha, uske chaaro bagal se aate raha.

¹⁴I ainjal se u awaaj bolis, “U chaar ainjals ke jon Faraat nadi ke bagal meñ bañdha hei, khol deo.”

¹⁵U chaar ainjals yahi ṭaaim aur mahina aur saal ke waaste taiyaar kara gain raha. Ab ulog ke khol dewa gais raha, ki ulog jaay ke sab log meñ se ek tihaai (3rd) log ke maar dewe.

¹⁶Ham sun ke bataay sakta raha ki dui sao millian se bhi jaada laṛaai ke ghoṛa rahin.

¹⁷Hamaar najar meñ ghoṛa aur us pe sawaar log eisan dekhaai deen, ulog aagi ke rakam laal, gahira bluu, aur yellow kawach (armour) pahine rahin. Ghoṛa ke muuṛ, sher ke muuṛ ke rakam raha, aur ulog ke muh se dhuañ aur gandhak (salfa) nikrat raha.

¹⁸I teen bhayaanak trabal, jeise ki muh se nikre waala aagi, dhuañ aur gandhak se ek tihaai log maara gain.

¹⁹Ghoṛa log ke muh bahut taagat waala raha, aur ulog ke puuch, jahreela saañp ke rakam raha jon kaaṭ ke dukh pahuñchaat raha.

²⁰Jon log i bhayaanak museebat se bach gain raha, ulog abhi bhi muurti puujan se nai haṭin, aur ulog saitaan ke puuja karte rahin. Ulog sona, chaañdi, peetal, patthar aur lakṛi ke banaawal muurti ke puuja karte rahin. I muurti meñ se ek bhi naa to sune ya dekhe ya chale sakat rahin.

²¹Ulog koi naa to hatya kare ya jaadu ṭona ya to chori ya bura kaam kare chhoṛin.