Read Hmar INṬANNA 1 Bible Online

INṬANNA 1 - Hmar bible

INṬANNA 1

¹A tîrin Pathienin hnuoi le vân a siem a.

²Chun, hnuoi hi a sie le a ruok ngawt a na, tui inthûktak chung chu ân thim mup a. Pathien Thlarau chun tui chunghai chu a awp zing a.

³Chun, Pathienin, “Var hung um raw se,” a ta; chuongchun, var a hung um ta a.

⁴Chun, Pathienin var chu a en a, ṭha a ti hle a: chuongchun, Pathien chun var le inthim chu a ṭhe ta a.

⁵Pathienin var chu “Sûn” ân bûk a, inthim chu “Zân” ân bûk a. Chuongchun, zântieng a um a, zîngtieng a um bawk a; chu chu ni khatna.

⁶Chun, Pathienin, “Tui le tui kâra chun boruok lientak um sienla, chu chun tui le tuihai chu ṭhe raw se,” a ta.

⁷Chuongchun, Pathienin boruok lientak chu a siem a, boruok lientak hnuoia tui umhai le boruok lientak chunga tui umhai chu a ṭhe ta a: chuong angtak chu a lo ni ta a.

⁸Chun, Pathienin boruok lientak chu “Vân” ân bûk a. Chuongchun, zântieng a um a, zîngtieng a um bawk a; chu chu ni hnina.

⁹Chun, Pathienin, “Vân hnuoia tui umhai chu hmun khatah luong khâwm sienla, khawmuol chu inlang raw se,” a ta: chuongchun, chuong angtak chun a hung ni ta a.

¹⁰Pathienin khawmuol chu “Hnuoi” ân bûk a, tui um khâwmhai chu “Tuipuihai” ân bûk a: Pathienin chu chu a en a, ṭha a ti hle a.

¹¹Chun, Pathienin, “Hnuoi hin hlo dâm, thlai chi nei dâm, thei kûng hnuoi chunga mâni chi um dân ding anga ra, a ra sûnga a chi um dâm chu hung insuo raw se,” a ta: chuong angtak chun a hung um ta a.

¹²Hnuoi chun hlo dâm, thlai mâni um dân ding anga chi nei dâm, thing mâni chi um dân ding anga ra, a ra sûnga a chi um dâm chu ân suo ta a: Pathienin a en a, ṭha a ti hle a.

¹³Chuongchun, zântieng a um a, zîngtieng a um bawk a, chu chu ni thumna.

¹⁴Chun, Pathienin, “Sûn le zân ṭhêna dingin vân boruok lientaka chun varhai um sienla, chuonghai chu inchikna dâm, hunbi dâm, ni dâm, kum dâm hrietna ding ni raw se;

¹⁵hnuoi chung elvar dingin vân boruok lientaka chun varhai ni bawk raw hai se,” a ta: chuong angtak chun a hung ni ta a.

¹⁶Chuongchun, Pathienin var ropuitak pahni khi a siem ta a; var ropui lem chu sûn rorêltu dingin, var ropui naw lem chu zân rorêltu dingin: arasihai khawm a siem bawk a.

¹⁷Pathienin chuonghai chu vân boruok lientaka khin a sie ta a: hnuoi chung sukvar ding le,

¹⁸sûn le zân chunga rorêl ding le var le inthim chu ṭhe dingin. Pathienin chu chu a en a, ṭha a ti hle a.

¹⁹Chuongchun, zântieng a um a, zîngtieng a um bawk a, chu chu ni lina.

²⁰Chun, Pathienin, “Tuihai chun thilsiem chângthei hringna neihai tamtak insuo ṭeu hai sienla, vatehai khawm chu hnuoi chunga vân boruok lientaka hin vuong raw hai se,” a ta.

²¹Chuongchun, Pathienin tuipuia thilhring lientak takhai chu a siem a, thilsiem hringna nei le chângthei tinrêng tuiin a insuo ṭeuhai chu anni chi um dân ding ang sengin a siem bawk a, vate thla nei tinrêng khawm anni chi um dân ding ang sengin a siem a: Pathienin chu chu a en a, ṭha a ti hle a.

²²Chun, Pathienin, “Chi tamtak inthlain hung pung unla, tuipuia tuihai suksip ro, vatehai khawm hnuoiah pung raw hai se,” tiin mal a sâwm a.

²³Chuongchun, zântieng a um a, zîngtieng a um bawk a; chu chu ni ngana.

²⁴Chun, Pathienin, “Hnuoi chun thilsiem hringna neihai, anni chi um dân ding ang sengin: ran, thilhring hnuoia bawkinvâka lâwnhai le ramsahai, anni chi um dân ding ang sengin insuo raw se,” a ta: chuong angtak chu a hung ni ta a.

²⁵Chuongchun, Pathienin, ram sa anni chi um dân ding ang sengin, ran dâm anni chi um dân ding ang sengin, thilhring hnuoia bawkinvâka lâwnhai po po, anni chi um dân ding ang sengin a siem a: Pathienin chu chu a en a, ṭha a ti hle a.

²⁶Chun, Pathienin, “Ei angpuiin, eini angtakin, mihriem siem ei ta, anni chu tuipuia nga chunga dâm, chunglêng vate chunga dâm, ran chunga dâm, hnuoi chung po poa le thilhring hnuoia bawkinvâka lâwn po po chunga dâm, thu inneitir ei tiu,” a ta.

²⁷Chuongchun, Pathienin ama angpuiin mihriem a siem a, Pathien angpui ngeiin a nih a siem chu, pasal le nuhmeiah a siem a nih.

²⁸Chun, Pathienin anni chu mal a sâwm a, Pathien ma chun an kuomah, “Chi tamtak thlain hung pung unla, hnuoi hi hluo sip unla, in thu thuin inumtir ro; tuipuia nga chunga dâm, chunglêng vate chunga dâm, thilhring hnuoi chunga bawkinvâka lâwn po po chunga dâm thu nei bawk ro,” a ta.

²⁹Chun, Pathien bawkin,“Ngai ta u, hnuoi chung po poa um thlai chi nei tinrêng le thing tinrêng chi nei ra um hai chu ka pêk cheu a nih: in bu ding nîng an tih.

³⁰Chun, hnuoia sa tinrêng kuoma dâm, chunglêng vate tinrêng kuoma dâm, thilhring hnuoia bawkinvâka lâwn tinrêng kuoma dâm, hringna nei taphawt kuoma chun, an bu dingin hlohna tinrêng ka pêk a nih,” a ta: Chuong angtak chu a hung ni ta a.

³¹Chun, Pathienin a thilsiem tinrêng chu a en a, ngai ta, ṭha a ti êm êm a. Chuongchun, zântieng a um a, zîngtieng a um bawk a, chu chu a ni rukna a nih.