Read Hmar INṬANNA 12 Bible Online

INṬANNA 12 - Hmar bible

INṬANNA 12

¹Chun, LALPAIN Abram kuoma chun, “I khuoa inthawk le i laibunghai laia inthawk le i pa ina inthawk chu suok la, ram ka lân entir ding che tieng chun fe rawh:

²Chuongchun, chi ropuitakah siem ka ti che a, mal khawm sâwm ka ti che a, i hming sukropui bawk ka tih: nang malsâwmna nîng i tih.

³Chun, malsâwmtu che taphawt chu malsâwm ka ta, ṭawngsie inphurtu che chu ṭawngsie inphur ka tih: nangmaa chun hnam tin la thawveng an tih,” a ta.

⁴Chuongchun, Abram chu LALPAIN a kuoma a hril angin a fe ta a; Lota chu ama leh a fe ve a. Abram chu Harana inthawka a suok lai chun kum sâwmsari le panga mi a nih.

⁵Chun, Abramin a nuhmei Sarai le, a unaupa naupasal Lota le an sum themsuok po po le, Harana an mi neihai chu a ṭhuoi a; Kanaan rama fe dingin an suok a. Kanaan ram chu an tlung chun,

⁶Abram chu chu rama Sekem hmun chen, More thingsaisuo hmun chen chun a fe pei a. Chuong lai chun Kanaan mihai chu chu rama chun an um a.

⁷Chun, LALPA chu Abram kuomah ân lâr a, “Hi ram hi i thlahai kuomah la pêng ka tih,” a ti a; chuongchun, chutaka chun a kuoma inlâr LALPA ta ding chun maichâm a siem a.

⁸Chutaka inthawk chun Bethel saktienga tlânga chun ân tâwl a, chutaka chun puon in a zar a, a thlangtieng chun Bethel chu a um a, a sak tieng chun Ai khuo a um a; chutaka chun LALPA ta dingin mâichâm a siem nâwk a, LALPA hming chu a lam a.

⁹Chun, Abram chu Negeb[6] panin a lân tâwl ta rawp a.

¹⁰Chun, chu rama chun ṭâm a hung tla a; chu rama chun ṭâm chu a nasa êm leiin Abram chu Aiguptaa um hri dingin a zu fe ta a.

¹¹Aigupta a lût ding lai chun a nuhmei Sarai kuoma chun, “Ngai ta, nuhmei hmêl ṭhatak i nih ti ka hriet;

¹²chuleiin, Aigupta mihaiin an hmu pha che chun, ‘Hi hi a nuhmei a ni hi,’ tîng an ta, kei chu mi that an ta, nang ruok chu hlâng an ti che.

¹³I zâra ṭhataka ka um theina ding le, nangma leia ka hring theina dingin, ‘A farnu ka nih,’ ti pei raw aw,” a ti a.

¹⁴Chun, Abram chu Aigupta a lût chun Aigupta mihai chun nuhmei chu an hmu a, a hmêl chu ṭha an ti êm êm a.

¹⁵Pharao milienhai khawmin an hmu a, Pharao kuomah a ṭhatzie an hril a; chuongchun, nuhmei chu Pharao inah an ṭhuoi lût ta a.

¹⁶Chun, ama chun Sarai lei chun Abram chu ṭhatakin a sawngbâwl a; chuongchun, berâm dâm, bâwng dâm, sabengtung chal dâm, suokpa dâm, suoknu dâm, sabengtung pui dâm, sanghâwngsei dâm a nei pha ta a.

¹⁷Nisienlakhawm, LALPA chun Abram nuhmei Sarai lei chun Pharao le a sûnghai chu hripui nasatak ân tuortir a.

¹⁸Chuongchun, Pharao chun Abram chu a ko a, “Ka chunga i thilthaw hi iengtizie am a ni ta leh? I nuhmei a nih ti iengdinga i mi hril naw am a na?

¹⁹Iengdinga ‘ka farnu a nih’ i ti? Chu lei chun an nâwm ka nuhmeia ka lo nei ta hiel hi: en rawh, taka hi i nuhmei, ṭhuoi la, fe hmang dai rawh,” a ta.

²⁰Chun, Pharao chun a chungchâng thua chun mi kuomah thu a pêk a; chuongchun, ama an hang inthla ta a, a nuhmei leh, a nei po po le chun.