Read Hmar INṬANNA 13 Bible Online

INṬANNA 13 - Hmar bible

INṬANNA 13

¹Chun, Abram chu Aiguptaa inthawk chun a suok a, ama le a nuhmei le, a nei po po, ama ruolin Lota leh, Negeb-a chun an hang fe ta a.

²Chun, Abram chu ran dâm, tangka dâm, rângkachak dâmin a hausa êm êm a.

³Chun, Negeba inthawk chun Bethel tlung rakin a fe pei a, Bethel le Ai khuo inkârah, a tîrtaka a puon in umnaa khan;

⁴a tîra a maichâm siemna ngeia khan; chun, chutaka chun Abram chun LALPA hming a lam a.

⁵Chun, Lota, Abram le fe ve khawm khan berâm ruol dâm, bâwng ruol dâm, puon in dâm a nei ve a.

⁶An um rêlna dingin ramin a dai ta naw a, an thil nei chu a nasa hle si a; chuongchun, an um hmunkhat thei ta dêr da el a.

⁷Chuongchun, Abram ran puhai le Lota ran puhai inkâra chun insêlna a hung suok ta a: chuong lai chun Kanaan le Periz mihai chu chu rama chun an um a.

⁸Chuongchun, Abramin Lota kuomah, “Lunginsiettakin, kei le nanga inkârah, ka ran puhai le i ran puhai inkâra khawm, insêlna um naw raw se; unau ei ni si a.

⁹Ram chu a pumin a um duoi a ni naw am a nih? Lunginsiettakin, ka kuoma inthawk hin insuktum el rawh: nang vawitieng i fe chun kei changtieng fêng ka ta, annawleh, nang changtieng i fe chun kei vawitieng fêng ka tih,” a ti a.

¹⁰Chuongchun, Lota chu a dâk suok a, Zoar pan zâwng chun, Jordan phaizâwl po po chu LALPA huon ang, Aigupta ram ang khan ram tina tui um furna hmun a nih ti a hriet a, LALPAIN Sodom le Gomorra a suksiet hma kha a ni si a.

¹¹Chuongchun, Lota chun Jordan phaizâwl po po chu a thlang ta a; chun, Lota chu saktieng chun ân tâwl ta a: chuongchun, an inṭhe ta a.

¹²Abram chu Kanaana chun a um a, Lota chu phaizâwl khuohaia chun a um a, a puon in chu Sodom chenin a tâwl pei a.

¹³Chun, Sodom mihai chu Pathien mithmuin nasataka ṭha naw le suolin an um a.

¹⁴Chun, a kuoma inthawka Lota a tuma a um hnung chun, LALPAIN Abram kuomah, “Dâk la, i umnaa inthawk khan hmârtieng dâm, simtieng dâm, saktieng dâm, thlangtieng dâm en rawh:

¹⁵i ram hmu po po hi i kuoma le i thlahai kuomah kumkhuoa dingin ka pêk ding che a nih.

¹⁶Chun, i thlahai chu hnuoia pilvut ang elin la siem ka tih: chuongchun, mîn hnuoia pilvut hi an tiem sêng chun i thlahai khawm chu tiem sêng ni bawk an tih.

¹⁷Tho la, ram hi a dung a khangin fang suok rawh; i kuomah ka pêk ding che a nih,” a ti a.

¹⁸Chuongchun, Abram chun a puon in chu a tâwl a, Hebrona um Mamre thingsaisuo[7] kâwlhaia chun umhmun a va khuor a, chutaka chun LALPA ta dingin maichâm a siem a.