Read Hmar INṬANNA 15 Bible Online

INṬANNA 15 - Hmar bible

INṬANNA 15

¹Chuong thil hnunga chun, “Abram, ṭi naw rawh; kei hi i phaw le i lâwmman nasatak el chu ka nih,” tiin LALPA thu chu Abram kuomah mang angin a hung tlung a.

²Abram ruok chun, “Aw LALPA Pathien, iengam mi pêng i ta? nau nei lovin ka um sawng ding a na, ka ro inkhâwmtu ding chu Damaskaa mi Eliezer hi a ni si a,” a ti a.

³Abram bawk chun, “Ngai ta, chi hrim hrim i mîn thlatir si naw a; en ta, ka ina pieng siehlaw hi ka rohluotu ding a nih,” a ta.

⁴Chun, ngai ta, “Ama kha i rohluotu ding ni naw nih, nanga rîla hung ra ding ngei chu i ro hluotu ding ni lem a tih,” tiin LALPA thu chu a kuomah a hung tlung a.

⁵Chun, ama chu tuolah a ṭhuoi suok a, “Vân tieng khi en la, arasihai khi i tiem thei chun tiem ta khai,” a ta. Chun, ama bawkin, “I thlahai chu khieng zât khi la nîng an tih,” a ta.

⁶Chun, ama chun LALPA chu a ring a; chuongchun, ama chun chu chu a felnaah a ruotpêk ta a.

⁷Chun, a kuomah, “Hi ram hi hluo dinga pe ding che a, Kaldaihai khuo Ura inthawka ṭhuoi suoktu che LALPA kha ka nih,” a ta.

⁸Ama chun, “Aw Lalpa PATHIEN, hluong ka tih ti iengtin am hrieng ka ta?” a ti a.

⁹Ama chun a kuomah, “Bâwngla kum thum mi, kêlpui kum thum mi, berâmchal kum thum mi, le vaṭhu le pârva te mi hung lapêk rawh,” a ti a.

¹⁰Chuongchun, chuong po po chu a hung lâk a, a laitakah a khawi seng a, a her pakhat chu a her khingtieng zâwna chun a sie seng a, vatehai ruok chu a khawi ve naw a.

¹¹Chun, vate sa-sel fa mihai chu saruonghai chunga chun an zu fu hlak a, Abram chun a lo hâwl hmang pei a.

¹²Nisa a tla dier dier laiin Abram chu a lo in dêr el a; chun, ngai ta, inthim nasatak thil râpthlâktak el hin ama a hung inkhum a.

¹³Chun, LALPA chun Abram kuomah, “I thlahai chu anni ram ni lovah mikhuolin la um an ta, chutaka chun suokin um an tih ti chiengtakin hre raw khai; chun, kum za li sukinum an ta;

¹⁴chun, rawng an ibâwlpêk ding hnam chungthu khawm chu la ngaituong ka tih, chu hnunga chun sum tamtak neiin la hung suok an tih.

¹⁵Nang ruok chu i thlatuhai kuomah thlamuongtakin fêng i ta, tar tak i ni hnungin phûm an ti che.

¹⁶Chun, suon linaa chun hitaka hin hung kîr nâwk an tih, Amorhai suolnahai hi a la kim hri si nawh,” a ta.

¹⁷Chun, nisa a hung tla a, khuo a hung inthim chun, ngai ta, rawtuina mei khu mup mup le chuong saherhai kâra chun meiser chawk vung vung inlawn inlawn a um a.

¹⁸Chu ni chun LALPA chun, “Hi ram hi Aigupta vadunga inthawka vadung lientak (Euphrates vadung) chenin i thlahai kuomah ka pêk tah.

¹⁹Ken-hai, Keniz-hai, Kadmon-hai,

²⁰Hit-hai, Periz-hai, Rephaim-hai,

²¹Amor-hai, Kanaan-hai, Girgashai le, Jebus-hai ram le hin ka pêk bawk a,” tiin Abram kuoma chun thu a thlung ta a.