Read Hmar INṬANNA 18 Bible Online

INṬANNA 18 - Hmar bible

INṬANNA 18

¹Abraham chu sûn nisa lum lai taka puon in kawtkhâr bula a ṭhung laiin, LALPA chu Mamre thingsaisuohai kâwla chun a kuomah a hung inlâr a.

²A hang dâk a, a thlîr a, a kâwl ela mi pathum lo ngirhai chu a hmu a; a hmu phingleh puon in kawtkhâra inthawk anni chu tuok dingin a va tlân a, hnuoi sikin chibai a bûk a,

³“Pu, i mi lunginsiet thei chun lunginsiettakin in siehlaw hi mi fe khêl lul naw ro khai,

⁴tui tlâwmte bêk hung la hai sienla, in kehai sâwp unla, thing hnuoia hin châwl hri ta u;

⁵bei tlawmte bêk va lâng ka ta, in lungril sukhar ro khai, chu hnunga chun fe pei de ti niu, in siehlaw hi in mi hung sir ta si si hin chu,” a ta. Anni chun, “I hril ang chun va thaw rawh,” an ti a.

⁶Chuongchun, Abraham chu puon in sûnga Sara kuoma chun a va lût vak a, “Beiphit indi tak tekhâwng thum siem la, hmet la, beiphêkhaiah siem rawh,” a ta.

⁷Chun, Abraham chu bâwngruol tieng a va tlân a, bâwngte ṭhatak hi a hung lâk a, siehlaw kuomah a pêk a; ama chun a lo siem vat vat a.

⁸Chun, nenetui kîng dâm, nenetui dâm, a bâwngte sa siem dâm chu a lâk a, an hmaah a va pêk a; chun, an fâk lai chun an kâwlah thing hnuoia chun a ngîr zing a.

⁹Chun, anni chun a kuomah, “I nuhmei Sara khawlai am a um a?” an ti a. Ama chun, “Saw puon ina sawn,” a ti a.

¹⁰Chun, ama chun, “Hi hun hi a hung tlung nâwk pha chun i kuomah hung nâwk ngei ka tih, chun, i nuhmei Sara chun naupasal nei a tih,” a ta. Chun, a hnunga puon in kawtkhâr bula inthawk chun Sarain a lo hriet a.

¹¹Abraham le Sara chu upatak, tartak el an ni ta a; nuhmei dân pângngai chu Sara chun a nei ta naw a.

¹²Chuongchun, Sarain, “Tar ka ni ta hnung hin, lâwmna nei ka ti maw, ka lalpa hlak tar a ni ta si a?” tiin a lungrilin ân nui a.

¹³Chun, LALPA chun Abraham kuomah, “Iengdinga Sarain, 'Tar ka ni hnung hin nau nei ka ti maw?’, tiin ân nui am a na?

¹⁴ LALPA ta dingin thil hrim hrim intak taluo a um am a nih? Hun ruotah, hun a tlung tiktik chun, i kuomah hung nâwk ka tih, chun Sara chun naupasal nei a tih,” a ta.

¹⁵Chuongchun, Sara chun, “Kân nui nawh,” tiin ân pha a; a ṭi si a. Chun, ama chun, “Awi lo lo chu, în nui de kha,” a ti a.

¹⁶Chun, mihai chu chutaka inthawk chu an tho a, Sodom tieng chu an en a; chun, Abraham chu anni inthla dingin anni lai chun a fe ve a.

¹⁷LALPA chun, “Ka thilthaw ding hi Abraham kuoma hin ka ip ding am a ni aw?

¹⁸Abraham hi chi ropui le thilthawtheitak a la hung ni ngei ding a ni si a, amaa chun khawvêla chi tin an la thawveng ding a ni si a.

¹⁹LALPA lampui an hraw theina dingin, a hnunga a nauhai le a sûnghai, thil feltaka thaw ding le rorêl anga thaw dinga thu a pêk theina dingin ama chu ka ruot ta si a, a chungchâng thu a hril chu LALPAIN Abraham chunga ân tlungtir theina dingin,” a ta.

²⁰Chuongchun, LALPA chun, “Sodom le Gomorra khêkri a nasa hlein, an suol a nasa êm êm a ni ngei a nih;

²¹tuhin zu fêng ka ta, an khêkri ka kuoma hung tlung ang hin an thaw ngei le an thaw ngei naw en ka ta; an thaw naw chun hre el ka tih,” a ta.

²²Chun, mihai chu chutaka inthawk chun an inher a, Sodom tieng an pan ta a; Abraham ruok chu LALPA hmaa chun a la ngir zing a.

²³Chun, Abraham chun a va hnai a, “Mi felhai chu mi suolhai lai chun i sukbohmang ve ding am a nih?

²⁴Khaw sûnga chun mi fel sâwmnga bêk an um el rawi mawh, a sûnga mi fel sâwmnga umhai lei chun khuo chu hla lovin i sukbohmang el ding am a nih?

²⁵Nang êm chun, chuong ang êm chun, mi felhai chu mi suolhai anga an um vena dinga mi felhai chu mi suolhai laia sukhlum ve el chu i thaw awm êm si naw a; nang êm chun i thaw âwm êm si naw a: hnuoi chung po po Rorêltu chun feltakin a thaw naw ding am a nih?” a ta.

²⁶Chun, LALPA chun, “Sodom sûnga chun mi fel sâwmnga khawm ka hmu chun anni lei chun khaw pumpui chu hla el ka tih,” a ta.

²⁷Abraham chun, “Ngai ta, kei pilvut le meivâm el hin Lalpa chu ka biek pawp sa ta che chu:

²⁸mi fel chu pangain sâwmnga an tling naw a ni rawi mawh; Pangaa an tling naw leiin khaw pumpui chu i sukbohmang ding am a nih?” a ti a. Chun, ama chun, “Chutaka chun sâwmli le panga khawm ka hmu chun sukbohmang naw ning,” a ti a.

²⁹Ama chun ama chu a biek nâwk pei a, “Chutaka chun sâwmli bak i hmu el rawi mawh,” a ti a. Ama chun, “Sâwmli lei khawm chun sukbohmang naw ning,” a ta.

³⁰Chun, ama chun, “Aw, Lalpa chu lunginsen naw la, hril nâwk ka tih: chutaka chun sâwmthum chau i hmu el rawi mawh,” a ta. Chun, ama chun, “Chutaka chun sâwmthum khawm ka hmu chun sukbohmang naw el ka tih,” a ta.

³¹Ama chun, “Ngai ta, Lalpa chu ka biek pawp sa ta che; chutaka chun sâwmhni bak khawm i hmu el rawi mawh,” a ta. Ama chun, “Sâwmhni lei khawm chun sukbohmang naw ning,” a ta.

³²Chun, ama chun, “Aw Lalpa, lunginsen naw la, vawikhat bak hang hril nâwk ka tih; chutaka chun sâwm bak khawm i hmu el rawi mawh,” a ta. Chun, ama chun,“Sâwm lei khawm chun sukbohmang naw ning,” a ti a.

³³Chun, LALPA chu Abraham le an inbiek zo phingleh a fe ta a, Abraham chu ama umna tieng a kîr nâwk ta a.