Read Hmar INṬANNA 19 Bible Online

INṬANNA 19 - Hmar bible

INṬANNA 19

¹Vântirko pahni chu zântieng chun Sodom khuo an tlung a, Lota chu Sodom khaw kul kawtkhâra chun a lo ṭhung a: Lotain anni a lo hmu chun lâwm dingin a ngîr a, a hmaia hnuoi sikin chibai a bûk ta a;

²chun, “Puhai, lunginsiettakin in siehlaw ina hin lût phawt unla, riek unla, in kehai sâwp ro khai: chun, inhmatakin tho in ta, fe nâwk de ti niu,” a ti a. Anni chun, “Ni lo e, khawlaiah riek lem kan tih,” an ti a.

³Nisienlakhawm, ama chun a thlêm a thlêm a; chuongchun, ama chu an zui a, a ina chun an lût a: chun, ama chun hme a siempêk a, chawl ṭhanglo bei a zeu a, an fâk ta a.

⁴Nisienlakhawm, an zâl hmain khuoa mi, Sodoma mi ngei, vêng tina mi po po, alien achînin in chu an inhuol khup el a;

⁵chun, Lota chu an ko a, a kuomah, “Vawizâna i kuoma mi hung lûthai kha khawlai am an um a? Anni kan pâwl theina dingin kan kuomah hung ṭhuoi suok rawh,” an ti a.

⁶Lota chu kawtkhâr bulah an kuoma chun a va suok a, kawt chu a khâr nâwk a.

⁷Chun, “Ka unauhai, lunginsiettakin chuong ang êm êm chun suol da ta unla;

⁸ngai ta u, pasal la pâwl ngailo naunuhmei pahni ka nei a: anni chu in kuomah hung ṭhuoi suok ka ta, ṭha in ti angin an chungah thaw de ti niu: hihai chunga ruok hin chu iengkhawm thaw lul naw ro khai; ka in sûng huolhimna hnuoia hung lût an ni si a,” a ta.

⁹Anni chun, “Inkieng el rawh ie,” an ti a. Anni bawk chun, “Hi mipa hrep hi hitaka um ding hin a hung inpêm lût a, rorêltua um a tum vei a! Tuhin chu anni chunga thaw nêk hmanin i chungah kan thaw ṭha naw nâwk zuol ding a nih,” an ti a. Chun, mi (Lota) chu an hung baw huk a, kawtkhâr chu sukse dingin an hung hnai a.

¹⁰Nisienlakhawm, mihai chun an kut an pur dawka Lota chu an kuomah in sûnga chun an kei lût a, kawt chu an khâr ta tlat a.

¹¹Chun, kawtkhâr bula mihai chu achîn alienin, an mit an sukdelpêk a; chuongchun, kawtkhâr chu an hmu zo ta naw a.

¹²Chun, mihai chun Lota kuomah, “Hienghai naw hi hitaka hin sûnghai dang i nei am? I mâkpahai, i naupasalhai, i naunuhmeihai le khaw sûnga i nei taphawt chu hi hmuna inthawk ṭhuoi suok rawh.

¹³LALPA hmaa chun an khêkri chu a lo nasa ta hle leiin hi khuo hi kan sukbohmang ding a nih; sukbohmang dingin LALPA chun a mi tir bawk si a,” an ti a.

¹⁴Chuongchun, Lota chu a fe suok a, a naunuhmeihai neitu a mâkpahai kuoma chun a va hril a, “Tho unla, hi hmuna inthawk hin suok ro; LALPAIN khuo hi a sukbohmang ding a nih,” a ti a. Nisienlakhawm, a mâkpahai ngaia chun fiemthu hril ang chau a nih.

¹⁵Vârṭien a hung ni chun vântirkohai chun, “Tho la, i nuhmei le i naunuhmei pahni umhai hi ṭhuoi rawh, chuong naw chun, hi khaw hremnaa hin bohmang ve rawi in tih,” tiin Lota chu an tur ta a.

¹⁶Ama hlak chu a la muong hle si a; chuongchun, LALPAIN ama chu a lunginsiet leiin mihai chun a kuta le a nuhmei kuta le, a naunuhmeihai pahni kuta chun an chel a, chuongchun, an ṭhuoi suok a, khawhnâwma chun an sie ta a.

¹⁷Chun, khawhnâwma an ṭhuoi suok hnung chun, “I hringna dingin tlân suok rawh: i hnungtieng ngha naw la, phaizâwla hrim hrim hin châwl bawk naw rawh; tlânga sawn tlân rawh, chuong naw chun, bohmang rawi i tih,”[15] a ti a.

¹⁸Nisienlakhawm, Lota chun a kuomah, “Chuongchu ni lo e, Pu,

¹⁹ngai ta, i siehlaw hin i lunginsietna a hmu a, ka hringna hi humhimin i zângaina chu nasatakin i suklang a; nisienlakhawm, tlânga sawn chu tlân thei naw ningah: thil ṭha nawtak hin mi hung nangin thi hlau rawi ka tih.

²⁰En ta, saw khuo saw tlânna dingin a hnai tak a, khaw chite a ni sia. (Khaw chite ni lo am a nih?)chu taka chun mîn tlântir lem rawh, chuongchun, dam ka tih,” a ti a.

²¹Ama chun a kuomah, “Ngai ta, chu thil kawnga khawm chun ka zâwm che a nih, khuo i hril chu sukbohmang naw el ka tih.

²²Inhmaw la, chutaka chun tlân rawh, chu chu i tlung hmakhat chu iengkhawm ka thaw thei âwm si naw a,” a ti a. Chuleiin, chu khaw hminga chun Zoar[16] an inbûk ta a.

²³Lotain Zoar a tlung chun hnuoi chunga chun nisa a hung suok ta a.

²⁴Chun, LALPA chun Sodom le Gomorra chunga chun vâna LALPA kuoma inthawk kât le mei ân sûrtir a;

²⁵chuongchun, chuong khuohai chu, phaizâwl po po, khuoa mi po pohai le, hnuoia thil mâwnghai le chun a sukbohmang ta vawng a.

²⁶A nuhmei ruok chu Lota hnunga inthawk chun a ngha kîr a, chikhâwn banah a lo inchang ta a.

²⁷Chun, Abraham chu zîngkâr inhmatakin LALPA hmaa a ngirna hmuna khan a hang fe a;

²⁸Sodom le Gomorra khaw tieng le, phaizâwl po po tieng chu a thlîr a, a en zing a: chun, ngai ta, chu rama meikhu chu rawtuina meikhu ang elin a khu tung lui lui el a.

²⁹Chun, Pathienin phaizâwl khuohai chu a sukbohmang lai chun, Pathienin Abraham chu a hriet zing a, Lota umna khuohai a sukbohmang laiin Lota chu bohmangnaa inthawk a tir suok a.

³⁰Chun, Lota chu Zoara inthawk chun a hang fe a, tlânga chun a um a, a naunuhmeihai pahni chu a kuomah an um ve a; Zoarah a um ngam si naw a: chun, ama le a naunuhmeihai pahni chu pûkah an um ta a.

³¹Chun, a upa lem chun a naupang lem kuoma chun, “Ei pa hi a upa ta a, khawvêl po po dân anga eini mi pâwl dingin hnuoi chunga hin pasal pakhat khawm an um ta si naw a:

³²thaw rawh, ei pa hi uoin indâwntir ei ti khai, chuongchun, ei pa suonmawng lova ei siem theina dingin a kuomah zâl ei tih,” a ti a.

³³Chuongchun, chu zân chun an pa chu uoin an indâwntir ta a; chun, a upa lem chu a lût a, a pa kâwla chun a va zâl a; ama chun amanu hung zâl lai chu a hriet naw a, a tho nâwk lai khawm chu a hriet bawk naw a.

³⁴Chun, a zînga chun a upa lem chun a naupang lem kuoma chun, “Ngai ta, zâni zân khan ka pa kâwlah ka zâl a; vawizân khawm hin uoin indâwntir nâwk ei ti khai; chun, nang lût la, ei pa suonmawng lova ei siem theina dingin a kâwlah va zâl ve rawh,” a ta.

³⁵Chuongchun, chu zân khawm chun an pa chu uoin an indâwntir nâwk a: chun, a naupang lem chu a tho a, a kuomah a va zâl ta a; ama chun amanu hung zâl lai chu a hriet naw a, a tho nâwk lai khawm chu a hriet bawk nawh.

³⁶Chuong ang chun Lota naunuhmeihai pahni chun an paa inthawk chun nau an lo vawn ta a.

³⁷A upa lem chun naupasal a nei a, a hmingah Moab[17] a sak a: ama chu tulaia Moab mihai thlatu a nih.

³⁸A naupang lem khawm chun naupasal a nei ve a, a hmingah Ben-ammi[18] a sak a; ama chu tulaia Ammon mihai thlatu a nih.