Read Hmar INṬANNA 2 Bible Online

INṬANNA 2 - Hmar bible

INṬANNA 2

¹Chuongchun, hnuoi le vân chu an chunga umhai po po le chun siem zo a ni ta a.

²Chun, Pathienin ni sari nia chun a thilsiem chu a thaw zo a; ni sari nia chun a thilsiem po po chu a châwlsan ta a.

³Chuongchun, Pathienin ni sari ni chu mal a sâwm a, ân ser ta a: chu ni chun Pathienin a thilsiem po po, thu ngawta a siem le kuta a siemhai chu a châwlsan ta leiin.

⁴Hienghai hi hnuoi le vân siem an ni dân chanchin chu a nih.

⁵Hnuoia hlo hrim hrim hi hnuoiah a la um naw a, hnuoia thlai hrim hrim khawm hi a mâwng bawk nawh. LALPA Pathienin hnuoi chungah ruo a lân sûrtir si naw a, hnuoi inlettu dingin mihriem hlak an la um bawk nawh;

⁶amiruokchu, hnuoia inthawkin sûm a hung suok a, hnuoi chung po po chu a sukhnâwng a.

⁷Chun, LALPA Pathienin hnuoia pilvutin mihriem a siem a, a hnâra chun hringna thuok chu ân thuok lût a; chuongchun, mihriem chu mi hring a hung ni ta a.

⁸Chun, LALPA Pathienin saktieng Edena chun huon a siem a; a mihriem siem chu chutaka chun ân umtir a.

⁹Chun, hnuoia inthawkin, LALPA Pathienin thing mitlatak le fâkmi tinrêng ân mâwngtir a; hringna thing khawm huon lailung taka chun ân mâwngtir bawk a; a suol le a ṭha hrietna thing khawm.

¹⁰Chun, Edena inthawkin huon sukhnâwng dingin vadung a luong suok a; chutaka inthawk chun ân ṭhe dar a, pali a hung ni ta a.

¹¹A pakhatna hming chu Pison a na; chu chu Havila ram po po luong huoltu chu a nih; chutaka chun rângkachak a um a;

¹²chu rama rângkachak chu ṭhatak a nih; chutaka chun delium le onik lung khawm a um.

¹³Vadung pahnina hming chu Gihon a nih; chu chu Kus[1] ram po po luong huoltu chu a nih.

¹⁴Vadung pathumna hming chu Hiddekel a nih; chu chu Assuria ram saktienga luong chu a nih. Vadung palina chu Euphrates a nih.

¹⁵LALPA Pathien chun mihriem chu a ṭhuoi a, Eden huona chun enkawltu le vêngtu dingin a sie ta a.

¹⁶Chun, LALPA Pathien chun mihriem kuomah, “Huona thing tinrêng rahai hi i nuom nuomin i fâk thei a,

¹⁷a suol le a ṭha hrietna thing ra ruok hi chu i fâk ding a ni nawh; i fâk chun i fâk ni ngeiin i thi ngei ding a nih,” tiin thu a pêk a.

¹⁸Chun, LALPA Pathien chun, “Mihriem ama khât baka a um hi a ṭha nawh ie; ama ṭhangpuitu ding, ân kawppui ding âwm mî siempêk ka tih ie,” a ta.

¹⁹Chun, LALPA Pathien chun pila inthawkin ramsa tinrêng le chunglêng vate tinrêng chu a siem a; an hmingah ieng ieng am ân bûk ding ti hrietna dingin mihriem kuoma chun a ṭhuoi tâwl a; chun, thilhring tinrênghai chu mihriem chun an hming a lo inbûk po chu an hming a ni sawng ta a.

²⁰Chuongchun, mihriem chun ran po po dâm, chunglêng vate dâm, ramsa tinrêng dâm hming chu a sak seng a; nisienlakhawm, mihriem ta ding chun a ṭhangpuitu ding a kawppui âwm mi a um naw a.

²¹Chuongchun, LALPA Pathien chun mihriem chu inhniktakin ân intir a; chuongchun, a in ta a; chun, a nâkru pakhat a lâk a, chu ai chu taksain ân hluosiptir a;

²²chun, LALPA Pathien chun mihriema inthawka a lâk nâkru chu nuhmeiah a siem a, mihriem kuoma chun a ṭhuoi a.

²³Chun, mihriem chun, “Hi zet hi chu ka ru ang ru neia, ka tisa ang tisa nei ngei chu a nih; Pasala inthawka lâk suok a ni leiin, ‘Nuhmei’ ti ding nîng a tih,” a ta.[2]

²⁴Chuleiin, pasalin a nu le pa mâksan a ta, a nuhmei chel a tih, chuongchun, tisa pumkhat hung ni tâng an tih.

²⁵Chun, pasal le a nuhmei chu an pahni chun saruokin an um a, an inzak chuong naw a.