Read Hmar INṬANNA 20 Bible Online

INṬANNA 20 - Hmar bible

INṬANNA 20

¹Abraham chu Mamrea inthawk chun Sim[19] ram tieng panin ân tâwl a; Kades le Sur inkârah umhmun a khuor a; Gerarah a um hri ta a.

²Chun, Abrahamin a nuhmei Sara chu, “Ka farnu a nih,” a ti a: chuongchun, Gerar lal Abimelek chun mi a tir a, Sara chu a vân ṭhuoitir a.

³Nisienlakhawm, Pathien chu Abimelek kuomah zânah a mangah a hung a, a kuomah, “Ngai ta, i nuhmei ṭhuoi lei hin mi thi el i ni tah; mi nuhmei a ni si a,” a ta.

⁴Abimelek ruok chun a la pâwl hri naw a; chuongchun, “Lalpa, pawi tâwklo mi khawm i sukhlum ding am a nih?

⁵Ama ngei khawmin ka kuomah, ‘Ka farnu a nih’ a ti ni lo am a nih? Chun amanu (Sara) ngei khawmin, ‘Ka ṭapa a nih,’ a ti bawk si a: lungril ṭhatak le kut inthiengtak nei pumin hi hi ka thaw a nih,” a ti a.

⁶Chun, Pathienin a manga chun, “Anih, hi hi lungril ṭhatak putin i thaw a nih ti ka hriet a; chuongchun, kei khawmin ka chunga i thil thaw suol ding chu ka khap che a nih; chuleiin a nih ama i them ka phal naw chu.

⁷Chuongchun, tuhin mi nuhmei kha pe kîr nâwk rawh; ama chu zâwlnei a ni si a, ṭawngṭaipêk a ti che a; chun, dam el i tih: i pêk kîr nâwk naw chun i thi ngei ding a nih ti hre rawh, nang le i nei po pohai leh,” a ti a.

⁸Chuongchun, Abimelek chu zîngkâr inhmatakin a tho a, a siehlawhai po po a ko a, an na hrietah chuong thu po po chu a hril a: anni chun an ṭi ta êm êm a.

⁹Chuongchun, Abimelek chun Abraham a ko a, a kuomah, “Kan chunga i thil thaw hi iengtizie am a ni a? Ieng kawng âm i chungah thil kan suksuola kei le ka khuoletuihai chunga hin thil suol nasatak i hung intlungtir hi? Thil thaw âwm naw tak ka chungah i thaw ta hi,” a ti a.

¹⁰Abimelek bawk chun Abraham kuomah, “Iengam i ngaituoa hieng ang thil hi thaw i ni a?” a ti nâwk a.

¹¹Abraham chun, “Hi khuoa hin Pathien ṭina a um dêr naw a ni ka ring a, ka nuhmei lei hin mi sukhlum el in tih ti ka ring lei a nih.

¹²Chu nâksapah ka farnu a ni hrim bawk a, ka pa naunu a ni a, ka nu naunu ruok chu a ni nawh; chun, ka nuhmei a hung ni tah a nih.

¹³Pathienin ka pa ina inthawka a mîn vaitir lai khan a kuomah, ‘Hi hi i lunginsietna ka chunga înlangtir ding chu a nih: ei tlungna hmun taphawtah, ‘Ka ṭapa a nih,’ mi ti pei rawh ka ti hrim a nih,” a ta.

¹⁴Chun, Abimelek chun berâmhai, bâwngchalhai le, suokpahai le suoknuhai a ṭhuoi a, Abraham kuoma chun a pêk a, a nuhmei Sara khawm chu a pêk kîr nâwk ta a.

¹⁵Chun, Abimelek chun, “En ta, ka ram a um duoi annâwm, i nuomna taphawta hin um rawh,” a ta.

¹⁶Chun, Sara kuoma chun, “En ta, i ṭapa kuoma hin tangka sâng khat ka pêk ta a, ngai ta, i kuoma um po pohaia inthawka mit inkhumna ding a ni hi: i chungthu hrim hrima hin i fel nâwk vawng tah a nih,” a ti a.

¹⁷Chuongchun, Abraham chu Pathien kuomah a ṭawngṭai a; chun Pathienin Abimelek le a nuhmei le a suoknuhai chu a sukdam nâwk a; chuongchun, nauhai an hung nei nâwk ta a.

¹⁸Abraham nuhmei Sara lei chun LALPA chun Abimelek sûnghai po po chu a lo sukching tâwl ta si a.