Read Hmar INṬANNA 21 Bible Online

INṬANNA 21 - Hmar bible

INṬANNA 21

¹LALPA chun a hril ta angin Sara chu a zu kan a, LALPA chun a tiem ta angin Sara chungah a thawpêk bawk a.

²Chuongchun, Sara chu ân rai a, Pathienin a kuoma a hril hun ruot taka chun Abraham chu a tar hnungin naupasal a neipêk ta a.

³Abraham chun a naupasal nei, Sarain a neipêk chu a hmingah Isak[20] a sak a.

⁴Chun, Abrahamin Pathienin a kuoma thu a pêk ang khan, a naupa Isak chu ni riet a tlingin a ser a tanpêk a.

⁵Abraham chu a naupa Isak a nei lai chun kum za mi a nih.

⁶Chun, Sara chun, “Pathienin a mi suknui tah; mi tin a hre taphawt chun mîn nuipui an tih,” a ti a.

⁷Ama bawk chun, “Sara hin nautehai a la pawm ding a nih ti tuin am Abraham kuomah hril ngaina hrieng an ta? a tar hnung hin naupasal ka neipêk ta hi,” a tis a.

⁸Chun, naute chu a hung inṭhang a, nene nêk an inbântir ta a, Isak chu nene nêk an inbântir ni chun Abrahamin ruoi ropuitak a ṭhe a.

⁹Chun, Aigupta mi, Hagar naupa, Abraham ta dinga a neipêk chun a nuisan lai Sara chun a hmu a.

¹⁰Chuleichun, Abraham kuoma chun, “Hi suoknu le a naupa hi hnawt suok rawh; hi suoknu naupa hi ka naupa Isak ro hluopuitu ding ni thei naw nih,” a ta.

¹¹Chu thu chu a naupa Ismael lei chun Abraham ta ding chun lungngaithlâk tak a nih.

¹²Nisienlakhawm, Pathienin Abraham kuoma chun, “Naupang le i suoknu chungchâng thu lei hin beidawng naw rawh: Sarain i kuoma thu a hril po po chu zâwm rawh, Isaka hin i thlahai an la suok ding a ni si a.

¹³Chun, suoknu naupaa khawm hin i thla a ni leiin chi ti khawp zet la siem ka tih,” a ta.

¹⁴Chuongchun, Abraham chu zîngkâr inhmatakin a tho a, bei le tuiûm a lâk a, Hagar kuomah a pêk a, a liengkoah ân chuonpêk a, naupang le chun ân fetir ta a; chuongchun, a fe a, Beer-seba thlalêra chun ân vâk ân vâk ta a.

¹⁵Chun, tuiûma tui chu a hung bo ta a, chuongchun, naupang chu chîmbuk pakhat hnuoiah a sie el ta a.

¹⁶Chun, “Naupang thi ding chu ka en ngam nawh,” a ti leiin a fe a, hla fe thal kâp phâk ding chena hin, a hma zâwna chun a va ṭhung ta chawt a. Chuonga a hma zâwna a ṭhung lai chun inringtakin[21] a ṭap ta a.

¹⁷Chun, Pathienin naupang râwl chu a hriet a, chun Pathien vântirkoin vâna inthawkin Hagar chu a zuk ko a, a kuomah, “Hagar, iengin am a sukbuoi che leh? ṭi naw; a umnaa naupang râwl kha Pathienin a hriet a nih.

¹⁸Tho la, naupang kha keitho la, i kutin chel rawh, ama chu chi ropuitakah ka siem ding a nih,” a ta.

¹⁹Chun, Pathienin a mit a sukvarpêk a, tuisunsuo a hmu a: chuongchun, a va fe a, tuiûma chun tui chu a thun sip a, naupang chu ân dâwntir ta a.

²⁰Chun, Pathien chu naupang kuoma chun a um hlak a, a hung inṭhang lien pei a; thlalêrah a um hlak a, thal kâp thiem mi a hung ni ta a.

²¹Paran thlalêra chun a um a; chun, a nuin Aigupta rama inthawk nuhmei a neipêk ta a.

²²Chuong lai chun Abimelek le a sipai pâwl hotu Phikol chun Abraham kuomah, “I thilthaw taphawtah Pathien i kuomah a um pei hlak a:

²³chuleiin, ka lo lunginsiet ta che ang khan kei le hi i khuolchâmna ram hi lunginsiet ve thunga, kei le ka naupa le ka naupa naupa khawm hlêm lo dingin Pathien hming sâlin tuhin ka kuomah inkhâm rawh,” a ti a.

²⁴Abraham chun, “Inkhâm ta naw ning am,” a ti a.

²⁵Chun, Abimelek siehlawhaiin tuisunsuo an lâkpêk lei chun Abimelek chu Abraham chun a lo kâwk a.

²⁶Abimelek chun, “Chu thil thawtu chu tu am a nih ka hriet dêr naw a; nang hlakin i mi hril si naw a, vawisûn chau naw chu ka la hriet dêr nawh,” a ta.

²⁷Chuongchun, Abraham chun berâmhai le bâwngchalhai a ṭhuoi a, Abimelek kuomah a pêk a: chun, an pahni chun thu an thlung ta a.

²⁸Abraham chun a berâm ruol laia mi berâmte a la pasari a sie tum a.

²⁹Abimelek chun Abraham kuomah, “Berâmte a la pasari a tuma i sie hi ieng tina am a na?” a ta.

³⁰Ama chun, “Hi tuisunsuo hi keiin ka cho a nih ti i mi hrietpuina dingin hi berâmte a la pasari hi ka kuta inthawkin i lâk ding a nih,” a ti a.

³¹Chuleichun, chu hmun chu Beer-seba[22] ân bûk a: chutaka chun an pahniha ṭawng an inkhâm rêl leiin.

³²Chuongchun, Beer-sebaa chun thu an thlung ta a: chun, Abimelek chu a tho a, a sipai pâwl hotu Phikol leh Philistinhai rama chun an kîr nâwk ta a.

³³Abraham chun Beer-sebaa chun tamarisk thing a phun a, chutaka chun LALPA Chatuon Pathien hming chu a lam a.

³⁴Chuongchun, Abraham chu Philistin mihai rama chun sâwttak a um a.