Read Hmar INṬANNA 22 Bible Online

INṬANNA 22 - Hmar bible

INṬANNA 22

¹Chuong thil hnunga chun Pathienin Abraham chu a fie a, a kuomah, “Abraham” a ta. Ama chun, “Hitaka hi ka um” a ta.

²Chun, Pathien chun, “I naupa, i naupasal nei sun, i lunginsiettak, Isak ngei kha ṭhuoi la, Moria rama chun fe la, chutaka chun tlâng pakhat hril ka ti che a, pumrawhmang inhlânah inhlân rawh,” a ti a.

³Chun, Abraham chu zîngkâr inhmatakin a tho a, a sabengtung a siem a, a kuomah a siehlaw tlangvâl pahni a ṭhuoi a, a naupa Isak le chun; chun, pumrawhmanga inthawina ding chun thing a chêk a, a tho a, Pathienin a hrilna hmun tieng chun a fe ta a.

⁴A ni thum nia chun Abraham chun a hang en a, a hmun chu hlatakah a hang hmu a.

⁵Chuongchun, Abraham chun a siehlaw tlangvâlhai kuoma chun, “Hitaka hin sabengtung le hin lo um ro, kei le naupang hi sawtaka sawn fêng kan ta; chun Pathien va bieng kan ta, in kuomah hung kîr nâwk kan tih,” a ta.

⁶Abraham chun pumrawhmang inhlânna thing chu a lâk a, a naupa Isak chu ân puttir a: ama chun mei le chemte a chawi a, chuongchun, an pahni chun an fe ta a.

⁷Chun, Isakin a pa Abraham chu a biek a, “Pa,” a ti a. Ama chun, “Hitaka hi ka um, ka naupa,” a ti a. Chun, ama chun, “En ta, mei le thing chu a um a; anleh pumrawhmanga inhlân ding berâmte chu khawlai am a um a?” a ti a.

⁸Abraham chun, “Ka naupa, Pathienin ama ta dinga pumrawhmang inthawina ding berâmte chu ngaituo fâwm el a tih,” a ti a: chuongchun, an pahni chun an fe pei ta a.

⁹Chun, Pathienin a hril hmun chu an va tlung a; Abraham chun chutaka chun maichâm a siem a, thing chu a sep khâwm a, a naupa Isak chu a khuop a, maichâma thing chunga chun ân zâltir a.

¹⁰Chun, Abrahamin a kutin a ban a, a naupa sukhlumna dingin chemte chu a lâk a.

¹¹Nisienlakhawm, LALPA vântirkoin vâna inthawkin ama chu a zuk ko a, “Abraham, Abraham,” a zuk ti a; ama chun, “Hitaka hi ka um,” a ta.

¹²Ama chun, “Naupang chunga khan i kut thlâk naw la, ama kha iengkhawm law naw rawh; i naupasal nei sun khawm mi pêk în ro naw leiin Pathien i ṭi ti tuhin ka hriet tah,” a ta.

¹³Chun,Abraham chu a hang ngha a, a en a; a hnungtieng chun berâmchal a ki thinghnawka lo intâng tlat hi a hmu a: chuongchun, Abraham chun berâmchal chu a va man a, chu chu a naupa aiah pumrawhmang inhlânna ding chun a hmang ta a.

¹⁴Chuongchun, Abrahamin chu hmun hminga chun “Lalpain ngaituong a tih”[23] ti ân bûk a; vawisûn chena “LALPA tlânga chun ngaituo nîng a tih,” an ti hlak ang hin.

¹⁵Chun, LALPA vântirko chun a ṭum hninaah vâna inthawkin Abraham chu a zuk ko a,

¹⁶“LALPA chun,‘Mâni le mâni insâlin kân khâm a nih: Hi thil hi i thaw ta lei le, i naupa, i nei sun khawm chu în ro naw leiin

¹⁷mal sâwm ngei ngei ka ti che a, vâna arasi zât le tuisuoriet panga phaiphin zâtin i thlahai chu la sukpung ngei ngei ka ta, i thlahai chun an dohai kul kawtkhâr chu neipêk an ta, ka thu i âwi ta leiin,

¹⁸i thlahaia chun khawvêla chi tin la thawveng an tih’ a tih,” tiin.

¹⁹Chuongchun, Abraham chu a siehlaw tlangvâlhai kuoma chun, a kîr nâwk ta a, chun, an tho a, Beer-sebaa chun, an fe tâwl ta a: chun Abraham chu Beer-sebaah a um ta zing a.

²⁰Chuong thil hnunga chun, “Ngai ta, Milka khawm khan i sang Nahor chu nauhai a neipêk tah,” tiin Abraham chu hrilin a um a.

²¹An nau lutîr chu Uz, a sang chu Buz a nih, Aram pa Kemuel leh;

²²Chesed, Hazo, Pildas, Jidlaph le Bethuel an nih.

²³Bethuel chun naunuhmei Rebeka a nei a; chuonghai pariet chu Milka chun Abraham sangpa Nahor chu a neipêk a.

²⁴A hmei, a hming Reuma khawmin Teba, Gaham, Tahas le Maaka a nei bawk a.