Read Hmar INṬANNA 26 Bible Online

INṬANNA 26 - Hmar bible

INṬANNA 26

¹Chun, chu rama chun Abraham dam laia ṭâm tla hmasa lem ti lo khawm kha, ṭâm a hung tla nâwk a. Chuongchun, Isak chu Philistin mihai lai Abimelek kuomah, Gerarah a zu fe a.

²Chun, LALPA chu a kuomah a hung inlâr a, “Aigupta rama chun zu fe naw rawh; ram ka hril ding chea chun um rawh.

³Hi rama hin um hri phawt la, chuongchun, i kuomah um ka ta, mal ka sâwm ding che a nih: hieng ram po po hi i kuoma le i thlahai kuomah pein i pa Abraham kuoma kân khâmna kha ka sukdet ding a nih.

⁴Vâna arasi zâtin i thlahai chu la sukpung ka ta, hieng ram po po hi i thlahai kuomah la pe bawk ka tih; chun, i thlaa chun khawvêla chi tin la thawveng an tih:

⁵Abraham chun ka thu a awi a, ka hrilhai , ka thupêkhai, ka thuruothai, ka dânhai khawm a zâwm lei khan,” a ti a.

⁶Chuongchun, Isak chun Gerara chun umhmun a khuor ta a.

⁷Chu khuoa mihai chun a nuhmei chanchin an indawn a; ama chun, “Ka farnu a nih,” a ta: a hmêl a ṭhat leiin, “Hi khuoa mihai hin Rebeka lei hin mi that rawi an tih,” tiin, “Ka nuhmei a nih,” a ti ngam naw a nih.

⁸Chutaka chun sâwttak a um hnungin, Philistin mihai lal Abimelek chun tukvera inthawkin a hei thlîr a; chun, ngai ta, Isak chun a nuhmei Rebeka chu ân saipui lai a hei hmu a.

⁹Chuongchun, Abimelekin Isak chu a ko a, “Ngai ta, i nuhmei a ni ngei hi, iengdinga ‘Ka farnu a nih,’ i ti am a na?” a ti a. Isak chun a kuomah, “Ama leiin thi rawi ka tih ka ti lei a nih,” a ta.

¹⁰Abimelek chun, “Kan chunga i thilthaw hi iengtizie am a na? Mihai laia mi tukhawmin i nuhmei hi an lo zâlpui el thei i sawnnaw; chuongchun, kan chunga hin thiemnawna i hung intlungtir a ni ding a nih,” a ta.

¹¹Abimelek bawk chun, “Tukhawm ama hi amanih, a nuhmei hi amanih tâwk tâwk chu sukhlum ngei ding a nih,” tiin, mi po po chu thu a pêk a.

¹²Chun, Isak chun chu rama chun bu a chîng a, chu kum chun a let za a hmu a. LALPAIN ama chu mal a sâwm a,

¹³chuongchun, mi chu a hung hausa ta hle a, nasataka mi neinung hung ni rau khawpin a hung lien ta duok duok a.

¹⁴Berâm ruolhai, ran ruolhai a nei a, sûnghai tamtak a nei bawk a; chuongchun, Philistin mihai chun an thîk ta a.

¹⁵A pa Abraham dam laia a siehlawhaiin tuisunsuo an cho po po khawm chu Philistin mihai chun an nel a, pilin an vur bit ta vawng el a.

¹⁶Chun, Abimelekin Isak kuomah, “Keini nêkin i hrât lem si a, kan kuoma inthawk hin fe hmang dai rawh,” a ti a.

¹⁷Chuongchun, Isak chu chutaka inthawk chun a suok a, Gerar ruomah a puon in a zar a, chutaka chun umhmun a khuor a.

¹⁸Chun, Isak chun a pa Abraham dam laia an tuisunsuo chohai chu a cho nâwk a; Abraham thi hnung khan Philistin mihai chun an lo nel tâwl ta si a; chun, a pain a lo inbûk ta ang pei khan an hming chu ân bûk a.

¹⁹Isak siehlawhai chun ruomah an cho a, chutaka chun tuisunsuo hnâr nei an hmu ta hlau a.

²⁰Gerar ranpuhai chun, “Tui hi kan ta a nih,” tiin Isak ranpuhai chu an insêlpui a: chuonga ama leh an insêl leiin tuisunsuo hminga chun Esek[28] ân bûk ta a.

²¹Tuisunsuo dang an cho nâwk a, chu khawm chu lâkpêk tumin an insêlpui nâwk a; chuongchun, a hmingah Sitna[29] ân bûk a.

²²Chutaka inthawk chu ân tâwl a, tuisunsuo dang a cho nâwk a: chu ruok chu chu lâkpêk tumin an insêlpui ta naw a: chuongchun, “Tuhin chu LALPAIN hmun lientak a mi siempêk ta a, hi rama hin chi tamtak thla tâng ei tih,” tiin, a hmingah Rehoboth[30] ân bûk a.

²³Chutaka inthawk chun Beersebaah a hang fe a.

²⁴Chu zân ngei chun LALPA chu a kuomah a hung inlâr a, “Kei hi i pa Abraham Pathien chu ka nih, ṭi naw rawh, i kuomah ka um annâwm, mal sâwm ka ti che a, ka siehlaw Abraham leiin i thlahai chu ka la sukpung ding a nih,” a ti a.

²⁵Chuongchun, chutaka chun maichâm a siem a, LALPA hming a lam a, chutaka chun a puon in a zar bawk a. Chun, Isak siehlawhai chun chutaka chun tuisunsuo an cho nâwk a.

²⁶Chun, Gerara inthawkin Abimelek chu ama thurâwntu[31] Ahuzzath le a sipai hotu Phikol leh a kuomah an fe a.

²⁷Isak chun an kuomah, “In mi theida a in kuoma inthawkin in mîn fe hmangtir si a, iengdinga ka kuoma hung am in ni a?” a ta.

²⁸Anni chun a kuomah, “LALPA chu i kuomah a um ti chiengtakin kan hriet a: chuongchun, ei kârah, keini le nangma kâr ngeia hin inkhâmna um sienla, i kuomah thu mîn thlungtir la kan ti a nih:

²⁹i pawi iengkhawm kan tâwk naw a, thil ṭha bak naw chu i chunga hrim iengkhawm kan thaw naw a, tlangtaka kan infetir el che ang khan, nang khawma kan sietna ding hrim i thaw nawna dingin: tuhin nang chu LALPA malsâwmna dawngtu i ni ta hi,” an ti a.

³⁰Chuongchun, an ta dingin ruoi an ṭhe a, an fâkin an dâwn ta a.

³¹Zîngtieng chun inhmatakin an tho a, ṭawng an inkhâm tuo a. Chun, Isakin anni chu ân fetir ta a, a kuoma inthawk chu lungmuongtakin an suok ta a.

³²Chu ni le le chun Isak siehlawhai chu an hung a, an tuisunsuo cho chanchin an hung hril a, a kuomah, “Tui kan hmu tah,” an ti a.

³³Chu tuisunsuo chu Shiba[32] ân bûk a: chuleiin, chu khaw hming chu tu chen hin Beer-seba a ni zing.

³⁴Chun, Esau chu kum sâwmli mi a niin Hit mi Beeri naunu Judith le Hit mi Elon naunu Basemath nuhmeiah a nei a;

³⁵chuonghai chu Isak le Rebeka lungril sukrimsitu an nih.