Read Hmar INṬANNA 28 Bible Online

INṬANNA 28 - Hmar bible

INṬANNA 28

¹Chuongchun, Isak chun Jakob chu a ko a, mal a sâwm a, thu a pêk bawk a, a kuomah, “Kanaan ram nunghâkhai laia mi hi nuhmeiin i nei ding a ni nawh.

²Tho la, Paddan-aram rama i nu pa, Bethuel inah fe la, chutaka mi i nu ṭapa Laban naunuhmeihai laia mi chu nuhmeiin va nei rawh.

³Pathien Iengkimthawthei chun mal sâwm chein, hnam tamtak um khâwm hung ni dingin chi tamtak inthlatir chein, sukpung raw se che.

⁴Mikhuol i nina ram, Pathienin Abraham kuoma a pêk hi i hluo theina dingin Abraham malsâwmna chu indawngtir bawk raw se che, nang le i thlahai khawm,” a ti a.

⁵Chuongchun, Isakin Jakob chu ân fe hmangtir a: chun, Paddan-aram rama Jakob le Esau nu Rebeka ṭapa Aram mi Bethuel naupa Laban kuoma chun a fe ta a.

⁶Chun, Esau chun Isakin Jakob mal a sâwm a, nuhmei nei dingin Paddan-aram ramah ân fe hmangtir ti le, mal a sâwm laiin, “Kanaan nunghâkhai laia mi hi nuhmeiah i nei ding a ni nawh,” tiin thu a pêk ti,

⁷le Jakobin a nu le pa thu awiin Paddan-aram ramah a fe tah ti a hriet a.

⁸Chuonga Esauin Kanaan nunghâkhai chun a pa Isak lung chu an buo naw hle ti a hriet chun,

⁹Esau chu Ismael kuomah a va fe a, Abraham naupa Ismael naunu Mahalath, Nebaioth farnu chu, nuhmei dingin a nuhmei nei sahai bâka chun a va nei sa ta a.

¹⁰Jakob chu Beer-sebaa inthawkin a suok a, Haran tieng a pan ta a.

¹¹Chun, hmun ieng amanih a hang tlung a, nisa a tla ta leiin chutaka chun a riek ta a. Chu hmuna lung pakhat chu a lâk a, lukhamah a hmang a, chu hmuna chun in dingin a zâl ta a.

¹²Chun, mang a nei a, hnuoi chunga hin leilâk a lo indaw a, a tâwp chun vân a sun a; a chunga chun Pathien vântirkohai ṭum le kaiin a hmu a.

¹³A tâwpa chun LALPA a ngîr a, “Kei hi LALPA i pu Abraham Pathien le Isak Pathien chu ka nih, i zâlna hnuoi kha i kuoma le i thlahai kuomah la pêng ka ti cheu;

¹⁴i thlahai chu hnuoia pilvut zâtin la um an ta, thlangtieng dâm, saktieng dâm, hmârtieng dâm, simtieng dâm indar lien i ta, nangma le i thlahaia chun khawvêla hnam tin la thawveng an tih.

¹⁵Ngai ta, i kuomah ka um a, i fena taphawtah vêng pei ka ti che a, hi rama hin ṭhuoi kîr nâwk ka ti che: i kuoma ka hril hi ka thaw hmakhat chun thlathlam naw ning che,” a ti a.

¹⁶Chun, Jakob chu a in a hung har a, “Hi hmuna hin LALPA chu a um ngei el, ka lo hriet si nawh,” a ti a.

¹⁷Chun, a ṭi a, “Hi hmun hi ṭi a va um ngei de! Hi hi hmun dang a ni naw a, Pathien in a lo ni hi tie, hi hi vân kawtkhâr a lo ni hi,” a ti a.

¹⁸Chun, Jakob chu zîngtieng inhmatakin a tho a, lung a ilukham chu a lâk a, lungphun dingin a phun a, a sîpa chun sahriek a buok a.

¹⁹Chu hmun hminga chun Bethel ân bûk a, a khaw hming hmasa chu Luz a nih.

²⁰Chun, Jakob chun thu a tiem ta a, “Pathien ka kuomah a um a, hi ka fena lampuia hin mi vêng a, fâk ding bei le sil ding silfên a mi pêk a,

²¹chuonga ka pa in tienga thlamuongtaka ka hung kîr nâwk phawt chun, LALPA chu ka Pathien nîng a ta,

²²hi lungphun ka phun khawm hi Pathien in nîng a tih: chun, ka kuoma i mi pêk ding po poa chun sâwma pakhat chu pe ngei ngei ka ti che,” tiin.