Read Hmar INṬANNA 33 Bible Online

INṬANNA 33 - Hmar bible

INṬANNA 33

¹Chun, Jakob chu a hang dâk a, a thlîr a, Esau, a mi za lihai le hung chu a hmu a. Chuongchun, a nauhai chu Leah kuoma dâm, Rakil kuoma dâm, suoknuhai pahni kuoma dâm a sem diet diet a.

²Suoknuhai le an nauhai chu a hmatâwng takah, Leah le a nauhai chu a dawtah, Rakil le Josef chu a nuhnung takah a sie a.

³Ama chu an hmaa chun a fe a, a unaupa kuom tieng pana a fe chun a kuom a tlung hmain, vawisari hnuoi sikin chibai a bûk hman a.

⁴Chun, Esau chu ama lâwm dingin a tlân a, a kuo a, a ir a suktuo a, a fâwp a; chun, an ṭap ve ve ta a.

⁵Esau chu a hang dâk a, nuhmeihai le naupanghai chu a hmu a, “I ṭhuoihai hi tuhai am an ni a?” a ti a. Ama chun, “Pathienin lunginsiettaka i siehlaw kuoma a pêk naupanghai an ni hi,” a ti a.

⁶Chuongchun, suoknuhai chu an nauhai le chun an hung hnai a, an kûn a,

⁷Leah khawm a nauhai le chun an hung hnai a, an kûn a; chu hnunga chun Rakil le Josef chu an hung hnai a, an kûn ve a.

⁸Esau chun, “Ran ruol ka întuokpui zozaihai kha ieng i tina am a ni a?” a ti a. Jakob chun, “Ka lalpa, i lunginsietna ka hmu theina dingin ka ti a nih,” a ti a.

⁹Chun, Esau chun, “Kei khawmin ka hau ie, ka sangpa, i nei po po chu i ta ni raw se,” a ti a.

¹⁰Jakob chun, “Ni lo e, i mi lunginsiet thei chun lunginsiettakin ka lâwmman hi mi pawmpêk rawh: Pathien hmêl hmu angin i hmêl ka hmu a, ka chungah i lâwm si a.

¹¹Pathienin a mi lunginsiet a, ka nei ṭeu leiin lunginsiettakin ka thil hung pêk che hi chu pawm rawh,” a ta. Chuong ang chun a thlêm a, ama chun a pawm ta a.

¹²Chun, Esau chun, “Hung rawh fêng ei tih, hma ṭhuoi pêk ka ti che,” a ti a.

¹³Jakob chun a kuomah, “Naupanghai hi an la chîn a, berâm ruol le ran ruol ka kuoma umhai khawm hi te ṭhuoi an nih ti ka lalpain i hriet a; ni khat chau khawm khal hrât taluo inla, ran ruol po po hi thi vawng el an tih.

¹⁴Ka lalpa, lunginsiettakin i siehlaw hmaa hin fe la, kei chu Seir tlângah ka lalpa kuom ka tlung hmakhat chu, ka hmaa ran fe hi an fe thei tâwk ang peiin le, naupanghai fe thei tâwk ang peiin, damtein hung sawm lem ka tih,” a ti a.

¹⁵Chun, Esau chun, “Ka kuoma um mi ṭhenkhathai bêk hi mâksanpêk ka ti che aw,” a ti a. Ama chun, “Iengding kherin am ie? ka lalpa, i lunginsietna mîn hmutir el rawh,” a ti a.

¹⁶Chuongchun, Esau chu chu ni ma chun Seir tlâng tieng panin a kîr nâwk ta a.

¹⁷Chun, Jakob chu Sukkoth-ah a fe a, ama ta dingin in a bâwl a, a ranhai ta dingin bûk a bâwl bawk a; chuleiin, chu hmun hming chu Sukkoth an ti ta a.

¹⁸Chun, Jakob chu Paddan-aram rama inthawka hungin, Kanaan rama um Sekem khuo chu himtakin a tlung a, khawhnâwma chun a puon in a zar ta a.

¹⁹A puon in zarna hmun chu Sekem pa Hamor nauhaia inthawkin tangka zain ân châwk a.

²⁰Chutaka chun maichâm a siem a, a hmingah El-elohe-Israel[40] ân bûk a.