Read Hmar INṬANNA 34 Bible Online

INṬANNA 34 - Hmar bible

INṬANNA 34

¹Chun, Leah naunu Dina, Jakob a neipêk chu, chu ram nunghâkhai hmu dingin a va lêng suok a.

²Chun, Hiv mi Hamor, chu ram lal naupa Sekem chun ama chu a lo hmu a; a man a, a zâlpui a, ân tlâwm ta a.

³Chun, a lungril chu Jakob naunu Dina chunga chun a um tlat a, chu nunghâk chu a hmangai a, bau ṭhatakin a biek a.

⁴Sekem chun a pa Hamor chu a biek a, “Chu nunghâk chu nuhmeiin mi neipêk rawh,” a ti a.

⁵Jakob chun a naunu Dina chu Sekem chun a sukkhawhlo ti a lo hriet a, nisienlakhawm, a naupasalhai chu phûlah ran lai an um leiin an hung hmakhat chu a to zing a.

⁶Sekem pa Hamor chu Jakob be dingin a kuomah a fe a.

⁷Jakob naupasalhai chun an hriet phingleh phûla inthawk chun an hung a; chun, Jakob naunu zâlpuiin Israelhai laiah thil suol invêtthlâktak, thil thaw dêr lo ding chu a thaw ta leiin an lungngai a, an lunginsen ta êm êm a.

⁸Hamor ruok chun anni a biek a, “Ka naupa Sekem lungril chu in naunu chungah a um tlat a: lunginsiettakin nuhmeiin inneitir ta unla.

⁹Innei pawl ei tiu, in naunuhmei hai mîn neitir unla, kan naunuhmeihai khawm nei bawk ro.

¹⁰Kan ramah keini lai um in ta, in nuomna hmun hmunah um bawk unla, hienglai hin um unla, sumdâwng unla, insukmuk ro,” a ti a.

¹¹Sekem khawm chun a nunghâk pa le ṭahai kuomah, “Mi lunginsiet ro, ka kuoma in hril taphawt pêng ka ti cheu.

¹²Man le thilpêk chu iengzat khawm ngên unla, in ti ang peiin pêng ka ti cheu: iengkhawm ni sienla, nunghâk chu nuhmeiin mîn neitir phawt el ro,” a ti a.

¹³Jakob nauhai chun an farnu Dina a sukkhawhlopêk lei chun Sekem le a pa Hamor chu zaihlêmin an dawn a,

¹⁴an kuomah, “Hi thil, sertanlo mi kuoma kan farnu pêk hi thaw thei naw ning ungah; chu chu kan ta dingin hmingsietna ding a ni si a:

¹⁵hieng anga in tiem ruok chun in thu ang chu remti thei kan tih: nangni laia pasal taphawt chu keini angin sertanin um unla.

¹⁶Chuongchun, kan naunuhmeihai inneitir kan ti cheu a, keini khawma in naunuhmeihai nei bawk kan ta; chun, in kuomah um kan ta, chi khat ei hung ni ding annâwm.

¹⁷Nisienlakhawm, sertan kawnga kan thu in zâwm naw ding chun, kan naunu chu ṭhuoi kan ta, fe el kan tih,” an ti a.

¹⁸An thu chun Hamor le Hamor naupa Sekem chu an suklâwm ta a.

¹⁹Chuongchun, tlangvâl chun Jakob naunu chu a dit hle si a, chu thil chu sâwt nghâk lovin a thaw nghâl ta a; ama chu a pa sûnghai laia inzâkai tak a nih.

²⁰Chun, Hamor le a naupa Sekem chun an khaw kul kawtkhâr chu an tlung a, an khuohai chu an biek a,

²¹Sawtaka mihai saw mi remtakin an um a, chuleiin, hi rama hin umin, hieng lai hin sumdâwng raw hai se, ngai ta u, an ta dingin ram khawm hi a lien huntâwk bawk a; an naunuhmeihai saw nuhmeiahai nei inla, ei naunuhmeihai khawm anni inneitir bawk ei tiu.

²²“Nisienlakhawm, chi khat ei hung nina dinga ei kuoma um chu hieng anga ei tiem chau hin sawhai sawn an mi remtipui ding a ni a, sertan an ni angin eini laia pasal taphawt chu sertan hung ni ve inla.

²³An ran dâm, an sum dâm, an sa po po dâm eini ta a ni vawng naw ding am a nih? An thu hi remtipui el ei tiu, chuongchun, ei kuomah an um el ding a nih.” an ti a.

²⁴Chun, Hamor le a naupa Sekem thu chu a khaw kul kawtkhâra suok taphawt chun an zâwm a, a khaw kul kawtkhâra suok po po, pasal taphawt chun ser an intantir ta vawng a.

²⁵Chun, ni thum nia an nat laitak chun, Jakob naupasalhai laia mi pahni, Dina ṭahai Simon le Levi chun an kâwlhnâm chawi ve vein inrûkin khuo chu an thaw a, pasal po po chu an that zo vawng el ta a.

²⁶Chuongchun, Hamor le a naupa Sekem chu kâwlhnâm ngeiin an that a, Sekem ina inthawkin Dina chu an ṭhuoi a, an suok ta a.

²⁷Jakob naupasalhai chun an mi thathai chu an va nangchîng a, an farnu an sukkhawhlo pêk leiin khuo chu an rawk ta a.

²⁸An berâm ruolhai, an bâwngruolhai, an sabengtunghai, khuoa thil umhai le loa thil umhai an lâkpêk a;

²⁹an sum po po an lâk a, an nauhai le an nuhmeihai po po an man a, in sûnga um taphawt chu an fe hmangpui ta a.

³⁰Chun, Jakobin Simeon le Levi kuoma chun, “Nangnîn hi rama um Kanaan mihai le Periz mihai laia hin, theida in mîn phurtirin in mi suklungzîng hle a nih; kei tlâwmte ka ni leiin mi thaw dingin hung inpun khâwm an ta, mi that el an tih; chuongchun, sukbohmangin um ka tih, kei le ka sûnghai le hin,” a ti a.

³¹Anni ruok chun, “Kan farnu hi nawchizawr thawin a thaw el ding a ni?” an ti a.