Read Hmar INṬANNA 35 Bible Online

INṬANNA 35 - Hmar bible

INṬANNA 35

¹Chun, Pathienin Jakob kuoma chun, “Tho la, Bethelah hang fe la, chutaka chun um rawh: i u Esaua inthawka i tlân hmang laia i kuoma inlâr Pathien ta ding khan chutaka chun maichâm siem rawh,” a ti a.

²Chuongchun, Jakob chun a sûnghai le a kuoma umhai po po kuoma chun, “Nangni laia mi dang pathien umhai chu sie hmang dai unla, insukthiengin in silfênhai inthleng ro:

³tho ei ta, Bethelah fêng ei tiu: chuongchun, ka lunginzîng laia mi dawna, ka fenaa ka kuoma um pei Pathien ta ding khan maichâm siem ka tih,” a ta.

⁴Chuongchun, mi dang pathien an kuta um po po le, an naa nabe an ibe po po chu Jakob an pêk a, chun Jakob chun Sekem khaw kâwla thingsaisuo hnuoia chun a thuphmang ta a.

⁵Chun, an fe a, an vêla khuohai chun an lo ṭi nasa hle a, Jakob naupasalhai chu an hnawt ngam naw a.

⁶Chuongchun, Jakob chun Kanaan rama Luz khuo (chu chu Bethel) chu a tlung a, ama le a kuoma umhai po po leh.

⁷Chun, chutaka chun maichâm a siem a, a u kuoma inthawka a tlân hmang lai khan chutaka chun Pathien a kuoma ân lâr leiin a hmun chu, “El-Bethel,”[41] ân bûk a.

⁸Chun, Rebeka dawntu Debora chu a thi a, Bethel thlanga thingsaisuo hnuoia chun an phûm a; thingsaisuo hminga chun “Ṭapna thingsaisuo”[42] an inbûk ta a.

⁹Chun, Jakob chu Paddan-aram rama inthawka a hung nâwk chun Pathien a kuomah ân lâr nâwk a, mal a sâwm a,

¹⁰Pathien chun a kuomah, “I hming hi Jakob a ni a, i hming hi Jakob ti nâwk ta naw ni hai chea, i hming chu Israel ni lem tâng a tih,” a ta; chuongchun, a hminga chun Israel ti a ni ta a.

¹¹Pathien bawk chun a kuomah, “Kei Pathien Iengkimthawthei[43] ka nih: chi tamtak inthlain hung pung rawh. Chi ti khawp le chi tum tum um khâwm khawm nanga inthawkin la hung um an tih; i ṭhalbea inthawkin lalhai khawm la hung suok bawk an tih.

¹²Abraham le Isak kuoma ram ka pêkhai hi i kuomah pêng ka ti che, i um naw hnunga i thlahai kuoma khawm ram hi pe pei ka tih,” a ti a.

¹³Chun, Pathienin ama a biekna hmuna inthawk chun Jakob chu a fesan ta a.

¹⁴Chun, a biekna hmuna chun Jakobin ban (lung ban) a phun a, a chunga chun thilinhlân dâwn mi a buok a, a chungah sahriek a buok bawk a.

¹⁵Chun, Jakob chun Pathienin ama a biekna hmun hminga chun Bethel ân bûk a.

¹⁶Chun, Bethela inthawk chun an fe a; Ephrath tlungna ding chu hla rei a la ni a, Rakil chun nauha ân vawi a, na deu el hin ân vawi ta a.

¹⁷Chun, nataka ân vawi lai chun nau dawm mi chun, “Ṭi naw rawh, naupasal dang i nei ding a ni hi,” a ti a.

¹⁸Chun, a thlarau a suok ding lai chun (a thi ta si a) a hminga chun Ben-oni[44] a sak a; a pa ruok chun Benjamin[45] a sak a.

¹⁹Chuongchun, Rakil chu a thi a, Ephrath lampuia chun an phûm a (Ephrath chu Bethlehem a nih).

²⁰Chun, a thlân chunga chun Jakobin lung a phun a. Chu chu tu chen a Rakil thlân Lungphun la um chu a nih.

²¹Chun, Israel chu a fe pei a Eder. Insâng[46] khêla chun puon in a zar ta a.

²²Israel chu chu rama a um lai chun, Reubenin a pa thaikêm Bilha chu a va zâlpui a; chun, Israel chun chu chu a hriet a. Tuhin Jakob naupasalhai chu sâwmpahni an ni tah.

²³Leah naupasalhai chu Reuben (Jakob nau lutîr), Simeon, Levi, Juda, Issakar le Jebulun an nih.

²⁴Rakil naupasalhai chu Josef le Benjamin an nih.

²⁵Rakil suoknu Bilha naupasalhai chu Dan le Naphtali an nih.

²⁶Leah suoknu Zilpah naupasalhai chu Gad le Aser an nih. Chuong chu Jakob naupasal, Paddan-aram rama pienghai chu an nih.

²⁷Chun, Jakob chu Abraham le Isak khuolchâmna hmun Kiriatharba (Hebron an ti bawk) Mamrea a pa Isak kuom chu a tlung ta a.

²⁸Chun, Isak dam sûng chu kum za le sâwmriet a nih.

²⁹Chun, Isak chun a thlarau ân thla a, upatak, tarkûna damin a thi a, a chipuihai kuoma ṭhuoiin a um ta a: chun, a naupasalhai Esau le Jakob chun an phûm ta a.